ప్రముఖ ఈ-కామర్స్ సంస్థ ఫ్లిప్కార్ట్ తన ఉద్యోగులకు షాక్ ఇచ్చింది. వార్షిక పనితీరు సమీక్ష (Performance Review) ప్రక్రియలో భాగంగా సుమారు 250 నుంచి 300 మంది ఉద్యోగులను సంస్థ నుంచి తొలగించినట్లు సమాచారం. వివిధ విభాగాలు, వివిధ స్థాయిల్లో ఈ కోతలు ఉన్నట్లు తెలుస్తోంది. కంపెనీ తొలి పబ్లిక్ ఇష్యూ (IPO) కోసం సన్నాహాలు చేస్తున్న సమయంలో ఈ నిర్ణయం తీసుకోవడం ప్రాధాన్యత సంతరించుకుంది. టెక్ మరియు ఈ-కామర్స్ రంగాల్లో ఖర్చులను నియంత్రించడం, పనితీరును మెరుగుపరచడం లక్ష్యంగా కంపెనీ ఈ చర్యలు తీసుకున్నట్లు పరిశ్రమ వర్గాలు చెబుతున్నాయి.
ఫ్లిప్కార్ట్ స్పందన
ఈ తొలగింపులపై ఫ్లిప్కార్ట్ యాజమాన్యం స్పందించింది. ఉద్యోగుల పనితీరును తాము క్రమం తప్పకుండా సమీక్షిస్తామని, సంస్థ నిర్దేశించిన అంచనాలను అందుకోలేకపోయిన కొద్ది శాతం మంది ఉద్యోగులు మాత్రమే సంస్థ నుంచి బయటకు వెళ్లాల్సి వచ్చిందని తెలిపింది. ఇది ప్రతి ఏడాది జరిగే సాధారణ ప్రక్రియలో భాగమని కంపెనీ పేర్కొంది. అయితే ఎంతమందిని తొలగించారన్న విషయాన్ని ఫ్లిప్కార్ట్ అధికారికంగా వెల్లడించలేదు.
Also Read: 80 ఏళ్ల వయసులో అథ్లెటిక్స్లో సంచలనం
ఐపీఓ సన్నాహాల మధ్య కోతలు
ఒకవైపు ఐపీఓ కోసం పెద్ద ఎత్తున సన్నాహాలు చేస్తూ, మరోవైపు సీనియర్ స్థాయి ఉద్యోగాల్లో కొత్త నియామకాలు జరుపుతున్న ఫ్లిప్కార్ట్.. అదే సమయంలో ఉద్యోగులను తొలగించడం పరిశ్రమలో చర్చకు దారి తీసింది. వ్యాపార వ్యూహాన్ని పునర్వ్యవస్థీకరించే ప్రక్రియలో భాగంగానే ఈ నిర్ణయం తీసుకున్నారని విశ్లేషకులు భావిస్తున్నారు.
గతంలో కూడా ఉద్యోగాల కోతలు
గతంలో కూడా ఫ్లిప్కార్ట్ ఇలాంటి చర్యలు తీసుకుంది. ముఖ్యంగా 2024లో సంస్థ దాదాపు 1000 మంది ఉద్యోగులను తొలగించింది. అప్పట్లో కూడా ఖర్చులను తగ్గించడం, వ్యాపార సామర్థ్యాన్ని పెంచడం లక్ష్యంగా ఈ చర్యలు తీసుకున్నట్లు కంపెనీ తెలిపింది.
భారత్కు ప్రధాన కార్యాలయం
అమెరికాకు చెందిన రిటైల్ దిగ్గజం వాల్మార్ట్ మద్దతు ఉన్న ఫ్లిప్కార్ట్ త్వరలోనే ఐపీఓకు రావాలని ప్రణాళికలు రూపొందిస్తోంది. ఇందులో భాగంగా సింగపూర్లో ఉన్న తన ప్రధాన కార్యాలయాన్ని భారత్కు తరలించింది. అలాగే భారత నియంత్రణ సంస్థల అవసరాలకు అనుగుణంగా తన హోల్డింగ్ నిర్మాణంలో కూడా పలు మార్పులు చేసింది.
టెక్ రంగంలో చర్చ
మొత్తానికి ఐపీఓ సన్నాహాల నేపథ్యంలో ఫ్లిప్కార్ట్ తీసుకున్న తాజా నిర్ణయాలు టెక్ రంగంలో చర్చనీయాంశంగా మారాయి. ఉద్యోగాల కోతలు, వ్యాపార పునర్వ్యవస్థీకరణ వంటి చర్యలు భవిష్యత్ వ్యూహంలో భాగమా అన్నది రాబోయే రోజుల్లో స్పష్టత రానుంది.
