విశాఖపట్నం: ఆంధ్రప్రదేశ్ ఆర్థిక రాజధానిగా వేగంగా ఎదుగుతున్న విశాఖపట్నం భవిష్యత్ అభివృద్ధికి భారీ ప్రణాళిక సిద్ధమవుతోంది. విశాఖపట్నం మెట్రోపాలిటన్ రీజియన్ డెవలప్‌మెంట్ అథారిటీ (VMRDA) 2041 మాస్టర్‌ప్లాన్‌లో నగరాన్ని ప్రాంతాల వారీగా అభివృద్ధి చేసేందుకు 8 ప్రత్యేక గ్రోత్ జోన్లను ప్రతిపాదించింది. నివాస, పారిశ్రామిక, సాంకేతిక, వైద్య, వాణిజ్య రంగాల అవసరాలకు అనుగుణంగా ఈ జోన్లను రూపొందించారు.
ఏ ప్రాంతానికి ఎలాంటి అభివృద్ధి?
తగరాపువలస: నివాస ప్రాంతాలతో పాటు వాణిజ్య, విద్యా సంస్థల అభివృద్ధికి ప్రాధాన్యం ఇవ్వనున్నారు. నగర విస్తరణలో ఈ ప్రాంతాన్ని కీలక కేంద్రంగా తీర్చిదిద్దే అవకాశం ఉంది.
ఆనందపురం: టెక్నాలజీ పార్కులు, డేటా సెంటర్ల ఏర్పాటుకు ప్రత్యేకంగా అభివృద్ధి చేయాలని ప్రతిపాదించారు. ఐటీ, డిజిటల్ రంగాల్లో కొత్త పెట్టుబడులను ఆకర్షించడమే లక్ష్యంగా కనిపిస్తోంది.
మేఘాద్రి గెడ్డ: సరస్సు అభివృద్ధి, వినోద కేంద్రాల ఏర్పాటుతో పర్యాటక, రిక్రియేషన్ హబ్గా తీర్చిదిద్దే ప్రణాళిక ఉంది.
రవాడ: గృహ నిర్మాణానికి ప్రాధాన్యం ఇస్తూ ప్రధాన రెసిడెన్షియల్ జోన్‌గా అభివృద్ధి చేయాలని ప్రతిపాదించారు.
భోగాపురం: ఫైనాన్స్, ఐటీ, పర్యాటకం, వ్యాపార, వాణిజ్య కార్యకలాపాలకు కేంద్రంగా అభివృద్ధి చేయనున్నారు. విమానాశ్రయ అభివృద్ధితో ఈ ప్రాంత ప్రాధాన్యం మరింత పెరిగే అవకాశం ఉంది.
మధురవాడ: ఇప్పటికే అభివృద్ధి చెందుతున్న నివాస ప్రాంతంతో పాటు ఐటీ, ఐటీఈఎస్ రంగాల విస్తరణకు ప్రాధాన్యం ఇవ్వనున్నారు.
హనుమంతవాక: అత్యాధునిక వైద్య సేవలు, ఆసుపత్రులు, అనుబంధ ఆరోగ్య సేవలతో మెడిసిటీగా అభివృద్ధి చేయాలని ప్రతిపాదించారు.
నరవ: రోడ్డు, రైలు తదితర రవాణా వ్యవస్థలను అనుసంధానించే మల్టీ-మోడల్ ట్రాన్స్‌పోర్టేషన్ హబ్గా తీర్చిదిద్దే ప్రణాళిక ఉంది.
రద్దీ తగ్గించి.. సమతుల్య అభివృద్ధిపై ఫోకస్
విశాఖలో పెరుగుతున్న జనాభా, పారిశ్రామిక కార్యకలాపాలు, ఐటీ రంగం విస్తరణను దృష్టిలో ఉంచుకుని నగర అభివృద్ధిని ఒకే ప్రాంతానికి పరిమితం కాకుండా వికేంద్రీకరించడమే ఈ మాస్టర్‌ప్లాన్ ప్రధాన ఉద్దేశంగా కనిపిస్తోంది. ప్రాంతాల వారీగా ప్రత్యేక అభివృద్ధి కేంద్రాలు ఏర్పడితే నగరంలోని రద్దీ తగ్గడంతో పాటు మౌలిక సదుపాయాలపై ఒత్తిడి కూడా కొంత తగ్గే అవకాశం ఉంది.
భోగాపురం ఎయిర్‌పోర్ట్, పోర్ట్ ఆధారిత పరిశ్రమలు, ఐటీ రంగం విస్తరణతో విశాఖ ప్రాధాన్యం ఇప్పటికే పెరుగుతోంది. ఇప్పుడు మెడిసిటీలు, టెక్నాలజీ పార్కులు, ఫైనాన్షియల్ హబ్‌లు, ట్రాన్స్‌పోర్ట్ కేంద్రాల ఏర్పాటుకు ప్రణాళికలు రూపొందిస్తే ఉపాధి అవకాశాలకు కూడా ఊతం లభించే అవకాశం ఉంది.
2041 నాటికి అంతర్జాతీయ స్థాయి నగరంగా?
ఈ ప్రత్యేక జోన్ల అభివృద్ధితో రియల్ ఎస్టేట్, వాణిజ్య, పారిశ్రామిక రంగాల్లో కొత్త అవకాశాలు ఏర్పడవచ్చు. ముఖ్యంగా మల్టీ-మోడల్ ట్రాన్స్‌పోర్ట్ హబ్ ద్వారా నగరంలోని వివిధ ప్రాంతాల మధ్య కనెక్టివిటీ మెరుగుపడే అవకాశం ఉంది.
2041 నాటికి విశాఖపట్నాన్ని ఆధునిక మౌలిక సదుపాయాలు, సమతుల్య అభివృద్ధి, అంతర్జాతీయ స్థాయి వ్యాపార అవకాశాలతో కూడిన మెట్రో నగరంగా తీర్చిదిద్దడమే VMRDA మాస్టర్‌ప్లాన్ ప్రధాన లక్ష్యంగా కనిపిస్తోంది.
