AP Capital Issue: 3 రాజధానులు అటకెెక్కినట్లేనా?

3 రాజధానులు అటకెెక్కినట్లేనా? జగన్ తెచ్చిన ‘మావిగన్’ సరికొత్త వ్యూహం!

ఆంధ్రప్రదేశ్ రాజధాని అంశంలో వైఎస్సార్‌సీపీ సరికొత్త రాజకీయ వ్యూహాన్ని తెరపైకి తెచ్చింది. గతంలో వైజాగ్, అమరావతి, కర్నూలుతో కూడిన మూడు రాజధానుల ఫార్ములాను బలంగా వినిపించిన మాజీ సీఎం వైఎస్ జగన్ మోహన్ రెడ్డి, ఇప్పుడు దానికి బదులుగా MAVIGUN (మచిలీపట్నం – విజయవాడ – గుంటూరు) అనే సరికొత్త ప్రాంతీయ వికాస కారిడార్‌ను ప్రతిపాదించారు. తాడేపల్లి క్యాంప్ కార్యాలయంలో జరిగిన విలేకరుల సమావేశంలో ఆయన ఈ విషయాన్ని స్పష్టం చేశారు.

ఈ సరికొత్త ప్రతిపాదనతో గతంలో ప్రకటించిన వైజాగ్ (పరిపాలన రాజధాని), కర్నూలు (న్యాయ రాజధాని), అమరావతి (శాసన రాజధాని) అనే మూడు రాజధానుల అంశం దాదాపు అటకెక్కినట్లేనని రాజకీయ విశ్లేషకులు భావిస్తున్నారు
చ్చే ఎన్నికల్లో అమరావతి Vs మావిగన్

ప్రెస్‌మీట్‌లో వైఎస్ జగన్ మాట్లాడుతుండగా, వచ్చే ఎన్నికలు ప్రధానంగా ‘అమరావతి వర్సెస్ మావిగన్’ మధ్యే జరుగుతాయని తేల్చి చెప్పారు.

“అమరావతి కావాలనుకునే వారు తెలుగుదేశం పార్టీ (TDP) కి ఓటు వేస్తారు.. తక్కువ ఖర్చుతో కూడిన ‘మావిగన్’ (MAVIGUN) అభివృద్ధిని కోరుకునే వారు వైఎస్సార్‌సీపీ (YSRCP) కి ఓటు వేస్తారు”
— వైఎస్ జగన్ మోహన్ రెడ్డి

వైఎస్సార్‌సీపీ సుదీర్ఘకాలంగా అమరావతిని ఒక ‘వైట్ ఎలిఫెంట్’ (అపార వ్యయంతో కూడిన ప్రాజెక్ట్) గా అభివర్ణిస్తోంది. అంతేకాకుండా అమరావతి అనేది కేవలం బహుళ కోట్ల రియల్ ఎస్టేట్ స్కామ్ మాత్రమేనని, అది త్వరలో పూర్తయ్యే అవకాశం లేదని ఆరోపిస్తోంది. దీనికి భిన్నంగా 110 కిలోమీటర్ల పరిధిలోని మచిలీపట్నం, విజయవాడ, గుంటూరులను కలిపి తక్కువ బడ్జెట్‌తో ఆర్థిక, పారిశ్రామిక కారిడార్‌గా అభివృద్ధి చేయవచ్చని జగన్ ప్రతిపాదిస్తున్నారు.

కూటమి పార్టీల తిరస్కరణ.. 12 ఏళ్లుగా వీడని సంక్షోభం

మరోవైపు, అధికారంలో ఉన్న టీడీపీ-జనసేన-బీజేపీ కూటమి ప్రభుత్వం వైఎస్ జగన్ ప్రతిపాదించిన ఈ ‘మావిగన్’ మోడల్‌ను తీవ్రంగా తప్పుబడుతోంది. ఇదొక హాస్యాస్పదమైన ప్రతిపాదన అని వారు ఎద్దేవా చేస్తున్నారు. ఏపీ ప్రయోజనాలను దెబ్బతీయడానికే జగన్ ఇలాంటి వింత ఐడియాలను తెస్తున్నారని కూటమి నేతలు విమర్శిస్తున్నారు.

ఆంధ్రప్రదేశ్ రాష్ట్రం జూన్ 2, 2014న విభజించబడినప్పటి నుండి (అనగా 12 సంవత్సరాలకు పైగా) రాజధాని విషయంలో తీవ్ర సందిగ్ధతను, సంక్షోభాన్ని ఎదుర్కొంటూనే ఉంది. చంద్రబాబు నాయుడు అమరావతిని ఏకైక గ్లోబల్ సిటీగా నిర్మించాలని సంకల్పిస్తుండగా, జగన్ తెచ్చిన ఈ సరికొత్త పొలిటికల్ మరియు రీజినల్ కార్డ్ ఏపీ రాజకీయాల్లో ఎలాంటి సంచలనాలు సృష్టిస్తుందో చూడాలి.