ప్రపంచవ్యాప్తంగా నెలకొన్న రాజకీయ అస్థిరత, అంతర్జాతీయ సంబంధాల్లో చోటు చేసుకుంటున్న వేగవంతమైన మార్పులు సేఫ్ ఇన్వెస్ట్మెంట్ల వైపు ఇన్వెస్టర్లను నెడుతున్నాయి. ఈ నేపథ్యంలో బంగారం ధరలు చరిత్రలోనే ఎప్పుడూ లేని స్థాయికి చేరాయి. అంతర్జాతీయ మార్కెట్లో ఔన్స్ బంగారం ధర $5,000 మార్క్ను దాటి సరికొత్త రికార్డును నమోదు చేసింది. సోమవారం ట్రేడింగ్లో స్పాట్ గోల్డ్ ధర 2.2 శాతం పెరిగి $5,089.78 వద్ద ముగిసింది. ట్రేడింగ్ సమయంలో ఒక దశలో ఇది $5,110.50 వరకు ఎగబాకడం మార్కెట్ను షాక్కు గురి చేసింది.
2025 సంవత్సరంలోనే బంగారం ధరలు ఏకంగా 64 శాతం వృద్ధి సాధించాయి. ఇది 1979 తర్వాత పసిడికి దక్కిన అత్యుత్తమ ఏడాదిగా నిపుణులు చెబుతున్నారు. అంతేకాదు, 2026 ప్రారంభమైనప్పటి నుంచే బంగారం ఇప్పటికే 18 శాతానికి పైగా లాభపడటం గమనార్హం. ఈ లెక్కలు చూస్తే పసిడి పరుగెత్తుడు ఎంత దూకుడుగా ఉందో అర్థమవుతోంది.
వెండికీ అదే జోరు
బంగారంతో పాటు వెండి కూడా వెనుకపడడం లేదు. శుక్రవారం ట్రేడింగ్లో వెండి ధర తొలిసారిగా ఔన్స్కు $100 మార్క్ను దాటి ఆల్టైమ్ రికార్డు నెలకొల్పింది. గత ఏడాదితో పోలిస్తే వెండి ధరలో సుమారు 147 శాతం పెరుగుదల నమోదైంది. రిటైల్ ఇన్వెస్టర్ల నుంచి డిమాండ్ భారీగా పెరగడం, మార్కెట్లో వెండి నిల్వలు తగ్గిపోవడం ధరల పెరుగుదలకు ప్రధాన కారణాలుగా విశ్లేషకులు చెబుతున్నారు.
Also Read: అంబులెన్స్ తలుపులు తెరుచుకోక పోయిన ప్రాణం.. ప్రభుత్వ నిర్లక్ష్యానికి బలైన వృద్ధుడు
పసిడి పరుగుకు కారణాలు ఇవే
బంగారం, వెండి ధరలు ఇలా రాకెట్లా దూసుకెళ్లడానికి పలు అంతర్జాతీయ కారణాలు దోహదపడుతున్నాయి.
అమెరికా రాజకీయ అనిశ్చితి: అమెరికా అధ్యక్షుడు డొనాల్డ్ ట్రంప్ తీసుకుంటున్న కొన్ని వివాదాస్పద నిర్ణయాలు మార్కెట్లలో కలవరం సృష్టిస్తున్నాయి.
ఫెడరల్ రిజర్వ్పై వ్యాఖ్యలు: అమెరికా కేంద్ర బ్యాంక్పై ట్రంప్ చేస్తున్న విమర్శలు ఇన్వెస్టర్లలో అనిశ్చితిని పెంచుతున్నాయి.
అంతర్జాతీయ ఉద్రిక్తతలు: గ్రీన్ల్యాండ్ అంశం, వెనిజులాలో సైనిక జోక్యం వంటి హెచ్చరికలు గ్లోబల్ టెన్షన్కు కారణమవుతున్నాయి.
కరెన్సీపై నమ్మకం తగ్గడం: ప్రభుత్వ బాండ్లు, కరెన్సీలపై నమ్మకం సడలడంతో ఇన్వెస్టర్లు బంగారం వైపు మొగ్గు చూపుతున్నారు. దీనిని నిపుణులు ‘డిబేస్మెంట్ ట్రేడ్’గా పేర్కొంటున్నారు.
ఈ విషయంపై క్యాపిటల్.కామ్ సీనియర్ మార్కెట్ అనలిస్ట్ కైల్ రోడ్డా మాట్లాడుతూ, అమెరికా ప్రభుత్వం తీసుకుంటున్న అస్థిర నిర్ణయాల వల్ల అమెరికన్ ఆస్తులపై ఇన్వెస్టర్ల విశ్వాసం తగ్గుతోంది. అందుకే సురక్షిత పెట్టుబడిగా భావించే బంగారం వైపు ప్రపంచం మొత్తం పరుగులు తీస్తోంది అని వ్యాఖ్యానించారు.
ఇక ముందు పరిస్థితి ఏంటి?
ప్రస్తుత పరిస్థితులు ఇలాగే కొనసాగితే ఈ ఏడాది చివరి నాటికి బంగారం ధర ఔన్స్కు $6,000కు చేరుకునే అవకాశం ఉందని మార్కెట్ నిపుణులు అంచనా వేస్తున్నారు.
కేంద్ర బ్యాంకులు భారీగా బంగారాన్ని నిల్వ చేసుకోవడం, రిటైల్ కొనుగోళ్లు పెరగడం పసిడి ధరలకు మరింత బలం చేకూరుస్తాయని రాయిటర్స్ పేర్కొంది.
తెలుగు రాష్ట్రాల్లో తాజా ధరలు
దేశీయ మార్కెట్లో కూడా ఈ అంతర్జాతీయ ప్రభావం స్పష్టంగా కనిపిస్తోంది. కరీంనగర్ టౌన్ గోల్డ్ అండ్ సిల్వర్ మర్చెంట్ వెల్ఫేర్ అసోసియేషన్ విడుదల చేసిన ధరల ప్రకారం:
బంగారం (10 గ్రాములు): రూ. 1,65,350
వెండి (10 గ్రాములు): రూ. 3,600
నగరం, ప్రాంతాన్ని బట్టి ఈ ధరల్లో స్వల్ప మార్పులు ఉండొచ్చని వ్యాపార వర్గాలు చెబుతున్నాయి.
మొత్తానికి, గ్లోబల్ రాజకీయాలు ప్రశాంతం అయ్యే వరకు పసిడి, వెండి ధరల ర్యాలీ కొనసాగే అవకాశాలే ఎక్కువగా కనిపిస్తున్నాయని మార్కెట్ వర్గాలు అభిప్రాయపడుతున్నాయి.
