గ్యాస్ కొరత అంటూ పుకార్లు.. ఇండేన్ బుకింగ్ సిస్టమ్ క్రాష్, దేశవ్యాప్తంగా వినియోగదారులకు ఇబ్బందులు

దేశవ్యాప్తంగా ఇండేన్ గ్యాస్ వినియోగదారులు సోమవారం తీవ్ర ఇబ్బందులు ఎదుర్కొన్నారు. సాధారణంగా గ్యాస్ సిలిండర్ బుక్ చేసుకునేందుకు ఉపయోగించే ఐవీఆర్ఎస్ (IVRS) మరియు మిస్డ్ కాల్ సర్వీసులు ఒక్కసారిగా పనిచేయకుండా నిలిచిపోయాయి. దీంతో లక్షలాది మంది వినియోగదారులు తమ సిలిండర్లను బుక్ చేసుకునేందుకు గంటల తరబడి ప్రయత్నించినా ఫలితం లేక ఇబ్బందులు పడ్డారు.

సాధారణంగా ఇండేన్ గ్యాస్ వినియోగదారులు ఐవీఆర్ఎస్ నంబర్‌కు కాల్ చేసి లేదా మిస్డ్ కాల్ ఇచ్చి సులభంగా బుకింగ్ చేసుకునే అవకాశం ఉంటుంది. అయితే ఈ సేవలు ఒక్కసారిగా నిలిచిపోవడంతో వినియోగదారులు తీవ్ర అసౌకర్యానికి గురయ్యారు. కొందరికి కాల్ చేసినప్పుడు ‘లైన్ బిజీ’ అని సందేశం రావడం, మరికొందరికి కాల్ మధ్యలోనే కట్ కావడం వంటి సమస్యలు ఎదురయ్యాయి.

వేగంగా వ్యాపించిన పుకార్లు..

దేశవ్యాప్తంగా ఇండేన్ గ్యాస్‌కు సుమారు 15 కోట్లకు పైగా కనెక్షన్లు ఉన్నాయి. వీరిలో చాలా మంది ఐవీఆర్ఎస్ లేదా మిస్డ్ కాల్ సేవల ద్వారానే గ్యాస్ బుకింగ్ చేస్తుంటారు. అయితే దేశంలో ఎల్‌పీజీ గ్యాస్ కొరత ఏర్పడబోతోందన్న పుకార్లు గత కొన్ని రోజులుగా సోషల్ మీడియాలో వేగంగా వ్యాపించాయి. దీంతో వినియోగదారులు తమ వద్ద ఉన్న సిలిండర్ ఖాళీ కాకముందే ముందస్తుగా మరో సిలిండర్ బుక్ చేసుకోవాలని ప్రయత్నించారు.

Also Read: భద్రాద్రి కొత్తగూడెం: చండ్రుగొండలో కలెక్టర్ అంకిత్ ఆకస్మిక తనిఖీలు.. అభివృద్ధి పనులపై సమీక్ష

ఈ నేపథ్యంలో సాధారణంగా వచ్చే కాల్స్ కంటే 8 నుండి 10 రెట్లు ఎక్కువగా కాల్స్ రావడంతో ఇండేన్ బుకింగ్ సిస్టమ్ ఆ భారాన్ని తట్టుకోలేక క్రాష్ అయిందని సంబంధిత వర్గాలు వెల్లడించాయి. ఒకేసారి లక్షలాది మంది వినియోగదారులు బుకింగ్‌కు ప్రయత్నించడంతో సర్వర్లు పనిచేయకుండా పోయాయి.

గంటల తరబడి ప్రయత్నించినా బుకింగ్ పూర్తికాకపోవడంతో వినియోగదారులు సోషల్ మీడియా వేదికగా తమ అసహనాన్ని వ్యక్తం చేశారు. గ్యాస్ బుకింగ్ కోసం పదేపదే కాల్ చేసినా ఫలితం లేకపోవడంతో పలువురు వినియోగదారులు ఆందోళన వ్యక్తం చేశారు.

ఇది తాత్కాలిక స‌మ‌స్యే..

ఈ ఘటనపై స్పందించిన అధికారులు, సిస్టమ్ క్రాష్ అయిన విషయం వాస్తవమేనని అంగీకరించారు. అయితే ఇది తాత్కాలిక సాంకేతిక సమస్య మాత్రమేనని, సాంకేతిక బృందం ఇప్పటికే సమస్యను పరిష్కరించే పనిలో ఉందని తెలిపారు. త్వరలోనే సేవలు పూర్తిస్థాయిలో పునరుద్ధరించబడతాయని వెల్లడించారు.

అదేవిధంగా వినియోగదారులు గ్యాస్ కొరత గురించి వచ్చే పుకార్లను నమ్మాల్సిన అవసరం లేదని అధికారులు స్పష్టం చేశారు. దేశంలో ఎల్‌పీజీ సరఫరా ఎలాంటి అంతరాయం లేకుండా కొనసాగుతుందని హామీ ఇచ్చారు. గ్యాస్ బుకింగ్ కోసం ఐవీఆర్ఎస్ లేదా మిస్డ్ కాల్ సేవలు అందుబాటులో లేకపోతే మొబైల్ యాప్, వాట్సాప్ సేవలు లేదా అధికారిక వెబ్‌సైట్ ద్వారా కూడా సులభంగా బుకింగ్ చేసుకోవచ్చని సూచించారు.

గ్యాస్ సరఫరాలో ఎలాంటి కొరత లేదని, వినియోగదారులు అనవసరంగా ముందస్తు బుకింగ్‌ల కోసం తొందరపడాల్సిన అవసరం లేదని అధికారులు మరోసారి స్పష్టం చేశారు.