డెలివ‌రీ బాయ్ అవతార‌మెత్తిన టీడీపీ ఎమ్మెల్యే.. ఇంటింటికి వెళ్లి మ‌రీ..

Bode Prasad Swiggy Delivery

రాజకీయ నేతలు గతంలో ఎన్నికల సమయాల్లో మాత్రమే ప్రజల మధ్యకు వచ్చి, ప్రచారాలు చేసే పరిస్థితులు సాధారణంగా కనిపించేవి. పిల్లలకు స్నానం చేయించడం నుంచి మురికి కాలువలు శుభ్రం చేయడం వరకు నానా హడావుడి చేసి మీడియాలో కనిపించడమే లక్ష్యంగా చర్యలు చేపట్టేవారని విమర్శలు ఉన్నాయి. అయితే సోషల్ మీడియా ప్రభావం పెరిగిన నేపథ్యంలో నేతల వ్యవహార శైలి కూడా మారుతోంది. కొత్త తరహా ప్రజా సంబంధాల కోసం నేరుగా జనజీవితంలోకి దిగే ప్రయత్నాలు చేస్తున్నారు.

ఈ క్రమంలో టీడీపీ నేత, పెనమలూరు ఎమ్మెల్యే బోడె ప్రసాద్ చేసిన వినూత్న ప్రయత్నం ఇప్పుడు హాట్ టాపిక్‌గా మారింది. స్విగ్గీ డెలివరీ బాయ్ గెటప్‌లో ప్రజల ఇళ్లకు వెళ్లి ఫుడ్ డెలివరీ చేయడం సోషల్ మీడియాలో వైరల్ అవుతోంది. దీనికి సంబంధించిన వీడియోలు నెటిజన్ల దృష్టిని ఆకర్షిస్తున్నాయి.

డెలివరీ బాయ్స్ కష్టాలు తెలుసుకోవాలనే ఉద్దేశంతో

ఇటీవల గిగ్ వర్కర్స్, ముఖ్యంగా 10 నిమిషాల డెలివరీ వ్యవస్థపై దేశవ్యాప్తంగా చర్చ సాగింది. డెలివరీ సిబ్బందిపై ఒత్తిడి పెరుగుతోందన్న విమర్శల నేపథ్యంలో సుప్రీం కోర్టు కూడా ఆందోళన వ్యక్తం చేయడంతో బ్లింకిట్, జొమాటో, స్విగ్గీ వంటి సంస్థలు ఆ విధానంపై వెనక్కు తగ్గాయి. ఈ నేపథ్యంలో డెలివరీ బాయ్స్ ఎదుర్కొంటున్న సమస్యలను స్వయంగా తెలుసుకోవాలని బోడె ప్రసాద్ రంగంలోకి దిగినట్లు తెలిపారు.

ఎమ్మెల్యేని చూసి షాక్‌కి గురైన కుటుంబాలు :

• స్విగ్గీ డెలివరీ బాయ్ యూనిఫార్మ్‌లో నియోజకవర్గంలోని ఇళ్లకు వెళ్లిన బోడె ప్రసాద్‌ను చూసి చాలా మంది ఆశ్చర్యపోయారు.
• “సార్ మీరా… స్విగ్గీ డెలివరీ బాయ్ అనుకున్నాం” అంటూ మహిళలు అవాక్కయ్యారు.
• ప్రొఫెషనల్‌గా ఓటీపీ అడిగి మరీ ఫుడ్ డెలివరీ చేయడంతో అంతా నిజమని తెలిసింది.
• ఆ తర్వాతే తానే ఎమ్మెల్యే అని బోడె ప్రసాద్ చెప్పడంతో కుటుంబ సభ్యులు మరింత ఆశ్చర్యానికి గురయ్యారు.

ఎమ్మెల్యే బోడె ప్రసాద్ చెప్పిందేమిటంటే…

డెలివరీ బాయ్స్ రోజువారీ జీవితంలో ఎదుర్కొనే సమస్యలు, పనిభారం, ఒత్తిడి ఎలా ఉంటుందో తెలుసుకోవాలనే ఉద్దేశంతో తానే స్వయంగా ఈ ప్రయోగం చేశానని ఆయన తెలిపారు. గిగ్ వర్కర్స్‌కు మరింత మెరుగైన విధానాలు అవసరమని, వారి సమస్యలను పాలసీ స్థాయిలో తీసుకెళ్లాలన్నదే తన లక్ష్యమని అన్నారు.

సోషల్ మీడియాలో ప్రశంసల వెల్లువ:

• ఈ వినూత్న ప్రయత్నంపై నెటిజన్లు పెద్ద ఎత్తున స్పందిస్తున్నారు.
• “ఇలాంటి నాయకులు కావాలి” అంటూ ప్రశంసలు కురిపిస్తున్నారు
• “కేవలం మాటలు కాదు, చేతల్లో చూపించారు” అనే కామెంట్లు చేస్తున్నారు.
• గిగ్ వర్కర్స్ సమస్యలపై అవగాహన పెంచిన చర్యగా అభినందనలు వెల్లువెత్తుతున్నాయి.

ఎన్నికల ప్రచారాలకే పరిమితం కాకుండా, ప్రజల జీవితాలను ప్రత్యక్షంగా అనుభవించే ప్రయత్నం చేసిన బోడె ప్రసాద్ చర్య రాజకీయాల్లో కొత్త ట్రెండ్‌గా మారుతుందా? అన్న ప్రశ్న ఇప్పుడు చర్చనీయాంశంగా మారింది.