పిఠాపురం రాజకీయాలు ఒక్కసారిగా వేడెక్కాయి. కూటమి పార్టీల మధ్య నెలకొన్న ఫ్లెక్సీ వివాదం ఇప్పుడు పెద్ద రాజకీయ దుమారంగా మారింది. తెలుగు దేశం పార్టీ మాజీ ఎమ్మెల్యే వర్మ, జనసేన పార్టీలో చేరిన మాజీ ఎమ్మెల్యే పెండెం దొరబాబు మధ్య మాటల యుద్ధం రోజురోజుకు ముదురుతోంది.
వివాదానికి కారణం ఏమిటి?
పిఠాపురం ఏరియా డెవలప్మెంట్ అథారిటీ (PADA) కార్యాలయంలో జరిగిన ఒక ప్రభుత్వ కార్యక్రమంలో ఏర్పాటు చేసిన ఫ్లెక్సీలో ముఖ్యమంత్రి నారా చంద్రబాబు నాయుడు ఫోటో లేకపోవడం ఈ వివాదానికి కేంద్ర బిందువైంది. దీనిపై ఆగ్రహం వ్యక్తం చేసిన వర్మ, అక్కడి అధికారులను ప్రశ్నించారు. ఈ సమయంలో జనసేన నేతలు, ముఖ్యంగా పెండెం దొరబాబు అక్కడికి చేరుకోవడంతో వాగ్వాదం మొదలై, తోపులాటకు దారితీసింది.
వర్మ ఆరోపణలు
ఈ ఘటనపై వర్మ సోషల్ మీడియా ద్వారా తీవ్రంగా స్పందించారు. “చంద్రబాబు ఫోటో ఎందుకు లేదని అడిగితే నాపై, టీడీపీ కార్యకర్తలపై దాడి చేశారు” అంటూ ఆవేదన వ్యక్తం చేశారు. పిఠాపురంలో పవన్ కళ్యాణ్కి వ్యతిరేకంగా పని చేసిన దొరబాబు ఇప్పుడు కూటమిలోకి వచ్చి పెత్తనం చలాయిస్తున్నారని ఆరోపించారు. అలాగే దొరబాబు వైఎస్సార్సీపీ కోవర్ట్గా పనిచేస్తూ కూటమిలో తగాదాలు సృష్టిస్తున్నారని విమర్శించారు.
దొరబాబు కౌంటర్
దొరబాబు కూడా వర్మ వ్యాఖ్యలకు తక్షణమే కౌంటర్ ఇచ్చారు. వర్మ చీకటి బాగోతాలను తాను బయటపెడతానని హెచ్చరించారు. ఇదే సమయంలో వర్మ తనపై చేసిన ఆరోపణలను ఖండించారు.
స్కామ్ల ఆరోపణలు
వర్మ మరో అడుగు ముందుకేసి, “దొరబాబు చేసిన స్కామ్లన్నీ బయటపెడతాను” అంటూ సంచలన వ్యాఖ్యలు చేశారు. ఆ స్కామ్లు బయటపడకుండా ఉండేందుకు దొరబాబు పార్టీ మార్చారని ఆరోపించారు. అదే సమయంలో టీడీపీ అధినేత, ముఖ్యమంత్రి చంద్రబాబుకు అవమానం జరిగితే తాము ఊరుకోమని, అలాగే డిప్యూటీ సీఎం పవన్ కళ్యాణ్కు అవమానం జరిగినా సహించబోమని స్పష్టం చేశారు.
ఫ్లెక్సీలో ఫోటో లేకపోవడం చిన్న విషయంగా కనిపించినా, అది ఇప్పుడు పెద్ద రాజకీయ వివాదంగా మారింది. పిఠాపురంలో కూటమి పార్టీల మధ్య అంతర్గత విభేదాలు బహిర్గతం కావడంతో రాజకీయ వర్గాల్లో చర్చనీయాంశంగా మారింది. ఇప్పటికే నేతల మధ్య పరస్పర ఆరోపణలు పెరుగుతుండగా, ఈ వివాదం మరింత ముదిరే అవకాశాలు కనిపిస్తున్నాయి. పరిస్థితి ఎలాంటి మలుపు తిరుగుతుందో చూడాలి.
Also Read:
