ఫ్లాప్ అని ముద్ర పడినా, కోట్ల మంది హృదయాల్లో ‘విక్టరీ’ కొట్టిన సినిమా ఏదైనా ఉందంటే అది కచ్చితంగా విక్టరీ వెంకటేష్ నటించిన ‘దేవీపుత్రుడు’. 2001 సంక్రాంతి కానుకగా విడుదలైన ఈ చిత్రం, అప్పటికి టాలీవుడ్లోనే అత్యంత భారీ బడ్జెట్ (₹14 కోట్లు) సినిమా. నేటికి పాతిక ఏళ్లు కావస్తున్నా, ఈ సినిమా ఇచ్చే అనుభూతి మాత్రం వెరీ స్పెషల్.
ఆ అంచనాలు.. ఆ క్రేజ్!
అప్పట్లో విక్టరీ వెంకటేష్ వరుస హిట్లతో భీభత్సమైన ఫామ్లో ఉన్నారు. దానికి తోడు ‘శతృవు’ వంటి హిట్ ఇచ్చిన కోడి రామకృష్ణ – ఎం.ఎస్. రాజు కాంబినేషన్ కావడంతో అంచనాలు ఆకాశాన్ని తాకాయి. నైజాం ఏరియాలోనే ఈ సినిమా ₹5 కోట్లకు అమ్ముడుపోవడం అప్పట్లో ఒక సంచలనం. మణిశర్మ అందించిన సంగీతం రిలీజ్కు ముందే చార్ట్బస్టర్గా నిలిచింది.
అద్భుతమైన విజువల్స్.. హాంట్ చేసే మ్యూజిక్
ఈ సినిమా నేటికీ ఎందుకు గుర్తుంటుందంటే:
- ద్వారక విజువల్స్: సముద్ర గర్భంలో మునిగిపోయిన ద్వారక నగరాన్ని అప్పట్లోనే గ్రాఫిక్స్లో చూపించిన తీరు అమోఘం.
- ఆ పవర్ ఫుల్ బాక్స్: సినిమా అంతా ఒక పవర్ ఫుల్ బాక్స్ చుట్టూ తిరుగుతుంది. దాన్ని ఓపెన్ చేసేటప్పుడు వచ్చే సౌండ్ ఎఫెక్ట్స్, గ్రాఫిక్స్ థియేటర్లో కూర్చున్న ప్రేక్షకుడిని మరో లోకానికి తీసుకెళ్లేవి.
- మణిశర్మ మ్యాజిక్: “కృష్ణుడు ఏలిన ద్వారక” పాట వింటే ఇప్పటికీ ఒళ్లు గగుర్పొడుస్తుంది. అలాగే “ఓ ప్రేమ ప్రణయవీణ” మెలోడీ ఇప్పటికీ ఎందరికో ఫేవరెట్.
గుజరాత్ భూకంపం – ఒక విచిత్రమైన కోయిన్సిడెన్స్:
ఈ సినిమా విడుదలైన సరిగ్గా 10 రోజులకు (జనవరి 26, 2001) గుజరాత్లో భారీ భూకంపం సంభవించింది. సినిమాలో కూడా ప్రకృతి వైపరీత్యాలు, భూకంపం వంటి అంశాలు ఉండటం, ద్వారక నేపథ్యం ఉండటంతో అప్పట్లో అందరూ ఆశ్చర్యపోయారు. ఈ సినిమా పుణ్యమా అని చాలా మందికి గుజరాత్లోని ద్వారక గురించి, అక్కడి రహస్యాల గురించి తెలిసింది.
ఆగిపోయిన ‘అంజనీపుత్రుడు’:
దేవీపుత్రుడు(Devi Putrudu)గనుక హిట్ అయి ఉంటే, ఎం.ఎస్. రాజు గారు వెంకటేష్తోనే ₹25 కోట్ల భారీ బడ్జెట్తో ‘అంజనీపుత్రుడు’ చేయాలని ప్లాన్ చేశారు. కానీ ఈ సినిమా పరాజయంతో ఆ ప్రాజెక్ట్ ఆలోచనలు కాస్తా కనుమరుగయ్యాయి. లేదంటే వెంకటేష్ కెరీర్ గ్రాఫ్ మరో రేంజ్లో ఉండేది.
దేవీపుత్రుడు కేవలం సినిమా కాదు, అదొక విజువల్ వండర్. ఈరోజు చూసినా ఎక్కడా బోర్ కొట్టదు. కాలం గడిచే కొద్దీ ఈ సినిమాకు ‘కల్ట్ క్లాసిక్’ హోదా దక్కింది. హిట్ అవ్వాల్సిన సినిమా ఫ్లాప్ అయితే ఎంత బాధగా ఉంటుందో చెప్పడానికి ‘దేవీపుత్రుడు’ ఒక ఉదాహరణ.
