ఇచ్చిపడేసే గోత్రం.. ఇరగదీసే నక్షత్రం’ అంటూ ఈ ఉగాదికి థియేటర్‌లలో సందడి చేసేందుకు సిద్ధమయ్యారు పవన్‌ కల్యాణ్‌

పవర్ స్టార్ పవన్ కల్యాణ్ ప్రధాన పాత్రలో తెరకెక్కిన ‘ఉస్తాద్ భగత్ సింగ్’ సినిమా ఉగాది సందర్భంగా ప్రేక్షకుల ముందుకు రాబోతోంది. విడుదలకు ముందు నిర్వహించిన ప్రెస్‌మీట్‌లో దర్శకుడు హరీష్ శంకర్ చేసిన వ్యాఖ్యలు ఇప్పుడు సినీ వర్గాల్లో చర్చనీయాంశంగా మారాయి. ఈ సినిమా ప్రేక్షకులకు పూర్తి స్థాయి కమర్షియల్ ఎంటర్‌టైనర్‌గా నిలుస్తుందని ఆయన ధీమా వ్యక్తం చేశారు.

“ఈ ఉగాది ‘ఉస్తాద్ ఉగాది’గా మారుతుంది” అంటూ హరీష్ శంకర్ చెప్పిన మాటలు ఫ్యాన్స్‌లో మరింత హైప్ తీసుకొచ్చాయి. అగ్రహీరో నుంచి పూర్తి కమర్షియల్ సినిమా వచ్చి చాలా రోజులైందని, ఆ లోటును ఈ చిత్రం భర్తీ చేస్తుందని అన్నారు. “సినిమా చూసిన తర్వాత అందరూ ‘ఇలాంటి సినిమా చాలా రోజుల తర్వాత వచ్చింది’ అనుకుంటారు” అని ఆయన నమ్మకం వ్యక్తం చేశారు.

ఈ సందర్భంగా కలెక్షన్లపై కూడా హరీష్ శంకర్ ఆసక్తికర వ్యాఖ్యలు చేశారు. ఇతర సినిమాలకు ఉన్న టికెట్ రేట్లు ఈ సినిమాకు తెలంగాణలో లభించలేదని, అందువల్ల ఎంత వసూళ్లు చేస్తుందో చెప్పలేనని స్పష్టం చేశారు. “రూపాయి ఎక్కువా తక్కువా అన్నది ముఖ్యం కాదు… ప్రేక్షకులు ఎంజాయ్ చేస్తే అదే విజయంగా భావిస్తాను” అన్నారు.

రికార్డులపై దృష్టి లేదు

రికార్డుల గురించి తాను ఎలాంటి అంచనాలు పెట్టుకోలేదని హరీష్ శంకర్ తెలిపారు. సినిమా కలెక్షన్లు విడుదల సమయంపై ఆధారపడి ఉంటాయని, సంక్రాంతి, సమ్మర్, లేదా ఇతర సందర్భాల్లో వేరువేరుగా మారుతాయని చెప్పారు. అందుకే రికార్డుల కంటే మంచి సినిమా ఇవ్వడంపైనే దృష్టి పెట్టినట్లు వెల్లడించారు.

కాంపాక్ట్ మూవీ… ఎడిటింగ్ తక్కువ

ఈ సినిమాకు సంబంధించిన మరో ఆసక్తికర విషయం నిడివి. ఎడిటింగ్‌కు ముందు ఫస్ట్ హాఫ్ సుమారు 1 గంట 19 నిమిషాలు మాత్రమే ఉండగా, ఫైనల్ కట్‌లో మరింత కుదించారని తెలిపారు. సెకండ్ హాఫ్ కూడా తక్కువ నిడివితోనే ఉండటంతో సినిమా వేగంగా సాగుతుందని చెప్పారు. దీంతో ప్రేక్షకులకు బోర్ కాకుండా కంటిన్యూస్ ఎంటర్‌టైన్‌మెంట్ ఉంటుందని అంచనా.

పవన్ కల్యాణ్ – తమన్‌పై ప్రశంసలు

సినిమా ఇంత బాగా రావడానికి పవన్ కల్యాణ్ ప్రధాన కారణమని హరీష్ శంకర్ తెలిపారు. అలాగే సంగీత దర్శకుడు తమన్ చివరి నిమిషంలో చేరి, కేవలం 10-12 రోజుల్లో మ్యూజిక్ పూర్తి చేయడం గొప్ప విషయమని కొనియాడారు. “థియేటర్ నుంచి బయటకు వచ్చేటప్పుడు మొదట మాట్లాడేది తమన్ మ్యూజిక్ గురించే ఉంటుంది” అని అన్నారు.

టాలీవుడ్‌లో ఇటీవల కంటెంట్ డ్రైవన్ సినిమాలు ఎక్కువగా వస్తున్న నేపథ్యంలో, పూర్తి స్థాయి మాస్ కమర్షియల్ ఎంటర్‌టైనర్‌పై అభిమానులు ఆసక్తిగా ఎదురుచూస్తున్నారు. ‘ఉస్తాద్ భగత్ సింగ్’ ఆ గ్యాప్‌ను ఫిల్ చేస్తుందా లేదా అన్నది కీలకం.

ఉగాది వంటి పండగ సమయంలో విడుదల అవ్వడం ఈ సినిమాకు పెద్ద ప్లస్‌గా మారొచ్చు. పాజిటివ్ టాక్ వస్తే బాక్సాఫీస్ వద్ద భారీ వసూళ్లు నమోదు చేసే అవకాశం ఉంది.

Also Read:  ‘ధురంధర్‌ 2’ తెలుగు ఫ్యాన్స్‌కు షాక్… ప్రీమియర్స్‌ రద్దు