జనసేనకు తగిన ప్రాతినిధ్యం ఇవ్వాలి.. స్థానిక ఎన్నికలపై పవన్ కీలక వ్యాఖ్యలు!

రంపచోడవరం ప్రాంత అభివృద్ధి కోసం ప్రభుత్వం చిత్తశుద్ధితో పనిచేస్తోందని డిప్యూటీ సీఎం పవన్ కల్యాణ్ అన్నారు. తాము వేస్తున్న రోడ్ల నాణ్యత ఎలా ఉందో ప్రజలు కూడా పరిశీలించాలని, రోడ్డు వేసిన తర్వాత అది బాగుందా లేదా అని చూడాల్సిన బాధ్యత ప్రజలపైనా ఉందని చెప్పారు.

ప్రజలు బాగుండాలన్న ఉద్దేశంతోనే తాము చిత్తశుద్ధితో పనిచేస్తున్నామని పవన్ కల్యాణ్ అన్నారు. ప్రధానమంత్రి, కేంద్రం నుంచి నిధులు ఇవ్వడంతో పాటు, రాష్ట్ర ప్రభుత్వం కూడా నిధుల కోసం కృషి చేస్తోందని తెలిపారు. గౌరవ ముఖ్యమంత్రి ఆర్థిక పరిస్థితులను చక్కదిద్దుతూ, ఉన్న అప్పులు తీరుస్తూ, కొత్త అప్పులు చేస్తూ, మరోవైపు ఆదాయం పెంచుకుంటూ ముందుకు వెళ్తున్నారని చెప్పారు.

ఈ విధంగా ఆర్థిక పరిస్థితులను నిర్వహించేందుకు ప్రజల ఆశీస్సులు, అండదండలు అవసరమని పవన్ కల్యాణ్ అన్నారు.

స్థానిక ఎన్నికల్లో కూటమికి సహకరించాలి

స్థానిక ఎన్నికల్లో కూటమికి సంపూర్ణ సహకారం అందించాలని పవన్ కల్యాణ్ ప్రజలను కోరారు. ప్రజల మద్దతు ఉంటే మరింత ధైర్యంగా పనిచేయగలమని అన్నారు.

ముఖ్యంగా ఈ ప్రాంతాల్లో వైఎస్సార్ మద్దతుదారులు కూడా తమను ఆలోచించాలని పవన్ కల్యాణ్ అన్నారు. గతంలో వారిని పట్టించుకోకుండా గాలికి వదిలేశారని, అయితే తాము అధికారంలోకి వచ్చిన తర్వాత అందరినీ పట్టించుకుంటున్నామని చెప్పారు.

తాను పంచాయతీరాజ్ శాఖ మంత్రిగా ఉన్నప్పుడు దాదాపు 80 శాతం వైసీపీ పంచాయతీలు ఉన్నప్పటికీ, అందరికీ ప్రత్యేకంగా నిధులు ఇప్పించానని పవన్ కల్యాణ్ తెలిపారు.

“నేను వ్యవస్థ బతకాలని అనుకునే వ్యక్తిని. పార్టీ బతకాలని అనుకునే వ్యక్తిని కాదు. వ్యవస్థ బతకాలి” అని అన్నారు.

వ్యవస్థ బాగుంటే రోడ్లు వస్తాయని, సెల్ టవర్లు వస్తాయని, పాఠశాలలు బాగుపడతాయని, ఉపాధి అవకాశాలు మెరుగవుతాయని చెప్పారు. వ్యవస్థ బాగుంటే ప్రజల జీవనం కూడా మెరుగవుతుందని అన్నారు.

ఎక్కడికక్కడ లంచాలు తీసుకుంటూ, ఆధిపత్యపు అహంకారంతో అధికారం చెలాయిస్తే భయపడకూడదని పవన్ కల్యాణ్ అన్నారు. ప్రజాస్వామ్యం ధైర్యంగా ఉండాలని, అదే సమయంలో బాధ్యతగా కూడా ఉండాలని చెప్పారు.

గిరిజన యువతపై నమ్మకం ఉంది

గిరిజన యువతపై తనకు ఎందుకు నమ్మకం ఉందో పవన్ కల్యాణ్ వివరించారు. గిరిజన ఆడపడుచులు కష్టనష్టాలు తెలిసినవారని, గిరిజన యువత గుండె లోతుల్లో నుంచి మాట్లాడతారని అన్నారు.

“నేను తెలివితేటలు వాడను. నేను మనసు వాడతాను. దానివల్ల కష్టాలు ఉంటాయి. కానీ దాని వల్ల ఫలితాలు కూడా ఉంటాయి. నమ్మకం ఉంటుంది” అని పవన్ కల్యాణ్ అన్నారు.

కూటమి, రాష్ట్ర అభివృద్ధి, గిరిజన ఆవాసాలు, గ్రామాల అభివృద్ధి, పిల్లల భవిష్యత్తు, ప్రజల భవిష్యత్తు కోసం అందరూ అండగా ఉండాలని కోరారు.

తనకు ప్రజల మద్దతు ఉంటే కొండంత ధైర్యం వస్తుందని అన్నారు. పురిడి గ్రామంలో ఒక గిరిజన తల్లి తనతో చెప్పిన ఒక మాటను పవన్ కల్యాణ్ గుర్తుచేసుకున్నారు. “నువ్వు ఏదైనా వచ్చినప్పుడు ఏదైనా చేస్తావులే” అని ఆ తల్లి చెప్పిన మాట తనను ఏడు సంవత్సరాలు బతికించిందని అన్నారు.

ఈ ప్రాంతంలోని ప్రతి తల్లి, ప్రతి పెద్ద, ప్రతి యువకుడు, ప్రతి యువతి అభివృద్ధిలో భాగస్వాములు కావాలని పవన్ కల్యాణ్ కోరారు.

జనసైనికులకు తగిన ప్రాతినిధ్యం ఇవ్వాలి

రంపచోడవరం ప్రాంతంలో తాను పార్టీ పెట్టినప్పుడు యువత తనపై నమ్మకంతో ఎర్ర కండువాలు వేసుకుని వచ్చారని పవన్ కల్యాణ్ అన్నారు. వారికి గెలుస్తామనే గ్యారంటీ కూడా లేదని, తనపై ఉన్న నమ్మకంతోనే వారు వచ్చారని చెప్పారు.

వాళ్లకు గెలుపు కూడా అవసరం లేదని, పోరాటమే తెలుసని అన్నారు. ప్రజల కోసం, కూటమి కోసం జనసైనికులు పనిచేశారని చెప్పారు.

2014లో కూటమి కోసం పనిచేసినప్పటికీ ఒక్క చిన్నపాటి కౌన్సిలర్ గానీ, కార్పొరేటర్ గానీ పదవి తీసుకోలేదని తెలిపారు. తాను కూడా ఎలాంటి పదవి అడగలేదని చెప్పారు.

తన దేశం బాగుండాలని, నేల బాగుండాలని, ఆంధ్రప్రదేశ్ బాగుండాలని, తన మనుషులు బాగుండాలని మాత్రమే కోరుకున్నానని పవన్ కల్యాణ్ అన్నారు.

స్థానిక ఎన్నికల్లో జనసైనికులు పొత్తు ప్రకారం పోటీ చేస్తారని తెలిపారు. కూటమి నాయకులు, తెలుగుదేశం, భారతీయ జనతా పార్టీ నాయకులకు ఎంత ప్రాతినిధ్యం, గౌరవం ఇస్తారో జనసేన నాయకులు, కార్యకర్తలకు కూడా అంతే ప్రాతినిధ్యం, గౌరవం ఇవ్వాలని కోరారు.

2023లో గౌరవ ముఖ్యమంత్రి చంద్రబాబు నాయుడిని రాజమండ్రిలో జైల్లో పెట్టినప్పుడు ఎవరు రోడ్లపైకి రానప్పుడు జనసైనికులు, వీర మహిళలు రోడ్లపైకి వచ్చి రాష్ట్రానికి ధైర్యాన్ని, భరోసాను ఇచ్చారని పవన్ కల్యాణ్ అన్నారు.

గత ఎన్నికలను రాష్ట్ర భవిష్యత్తు కోసం చేశామని, ఈ ఎన్నికలు స్థానికంగా ప్రజల భవిష్యత్తు, స్థానిక అవసరాల కోసం జరుగుతున్నాయని చెప్పారు.

మూడు పార్టీలు బాగుండాలని, అయితే జనసేన చాలా త్యాగం చేసిందని పవన్ కల్యాణ్ అన్నారు. ఆ త్యాగానికి తగిన విధంగా ఈసారి జనసైనికులు, వీర మహిళలకు ప్రాతినిధ్యం ఇచ్చేలా ప్రతి నాయకుడు అండగా ఉండాలని కోరారు.

‘అడవి తల్లి బాట’ గిరిజన బిడ్డల భవిష్యత్తుకు బాసట

‘అడవి తల్లి బాట’ కేవలం రహదారుల బాట కాదని, గిరిజన బిడ్డల బంగారు భవిష్యత్తుకు బాసట అని పవన్ కల్యాణ్ అన్నారు.

ఈ కార్యక్రమాన్ని విజయవంతం చేసేందుకు వచ్చిన ప్రతి ఒక్కరికీ పేరు పేరున హృదయపూర్వక ధన్యవాదాలు తెలిపారు. తనతో పాటు వేదికను పంచుకున్న రంపచోడవరం నియోజకవర్గ శాసనసభ్యులు శ్రీమతి మిర్యాల శిరీష్ దేవి, ఆంధ్రప్రదేశ్ రాష్ట్ర ఎస్టీ కమిషన్ చైర్మన్ చొల్లా బుజ్జిరెడ్డి, కాకినాడ పార్లమెంట్ సభ్యులు తంగిల ఉదయ్, శాసనసభ్యులు పంతం నానాజీ తదితరులకు ధన్యవాదాలు తెలిపారు.

పాలకొండ నియోజకవర్గంలో జనసేన తరఫున పోటీ చేసిన నిమ్మక జయకృష్ణకు మద్దతుగా నిలిచిన వారిని కూడా పవన్ కల్యాణ్ ప్రస్తావించారు.

అలాగే జానపద కళలు, సృజనాత్మకత అకాడమీ చైర్మన్ గంగులయ్య, జనసేన నాయకులు కళ్యాణం కేకే, ఆంధ్రప్రదేశ్ రాష్ట్ర పౌర సరఫరాల శాఖకు చెందిన తోట సుధీర్, భారతీయ జనతా పార్టీ అధ్యక్షులు, రంపచోడవరం నియోజకవర్గ ఇన్‌చార్జ్ శ్రీకా బుల్లికొండల దొర తదితరులకు పవన్ కల్యాణ్ ధన్యవాదాలు తెలిపారు.

‘అడవి తల్లి బాట 2.0’ కార్యక్రమంలో భాగంగా రంపచోడవరం ప్రాంత అభివృద్ధి, గిరిజన ప్రజల భవిష్యత్తు, స్థానిక ఎన్నికల్లో కూటమికి మద్దతు అంశాలపై పవన్ కల్యాణ్ మాట్లాడారు.