భారత క్రికెట్ జట్టు టెస్ట్, వన్డే కెప్టెన్ శుభ్మన్ గిల్ టెన్నిస్ ఆటపై తనకున్న ఇష్టాన్ని, అంచనాలను బహిరంగంగా పంచుకున్నారు.
జియోస్టార్ స్పెషల్ టీవీ షోలో పాల్గొన్న ఆయన, టెన్నిస్ లెజెండ్ రోజర్ ఫెదరర్ తన అత్యంత ఇష్టమైన టెన్నిస్ ఆటగాడని వెల్లడించారు. ఫెదరర్ ఆటలోని లాలిత్యం, హుందాతనం తనను ఎంతగానో ఆకట్టుకుంటాయని గిల్ పేర్కొన్నారు.
“నేను పెరుగుతున్న రోజుల్లో చాలా మంది ఫెదరర్ గురించి చెబుతూ.. ఆయన ఆటలో ప్రతిదీ చాలా సులువుగా (Effortless) కనిపిస్తుందని అనేవారు. కానీ ఒక క్రీడాకారుడిగా మనకు తెలిసేది ఏంటంటే, ఒక షాట్ను అంత సులువుగా చూపించడం వెనుక ఎంత కష్టం దాగి ఉంటుందో నాకు తెలుసు.
క్రికెట్లో నన్ను కూడా చాలా మంది ఎఫర్ట్లెస్ అంటుంటారు, కానీ దాని వెనుక ఉన్న నా శ్రమ నాకు మాత్రమే తెలుసు. ఫెదరర్ చూపించే ఆ ప్రత్యేకమైన గ్రేస్ వల్లే నేనాయనను ఆరాధిస్తాను” అని గిల్ వివరించారు.
టెన్నిస్ కోర్టులో అల్కరాజ్, సిన్నర్లపై అంచనాలు
టెన్నిస్ క్రీడకు సంబంధించిన విభిన్న అంశాలపై శుభ్మన్ గిల్ తన మనసులోని మాటను పంచుకున్నారు. స్పానిష్ యువ సంచలనం కార్లోస్ అల్కరాజ్ ఆడే డ్రాప్ షాట్, తాను క్రికెట్లో ఆడే ట్రేడ్మార్క్ షాట్ అయిన ‘షార్ట్-ఆర్మ్ జాబ్’ను గుర్తుకు తెస్తుందని గిల్ అన్నారు.
ఆ షాట్ చాలా వేగంగా, మోసపూరితంగా మరియు అత్యంత ప్రభావవంతంగా ఉంటుందని కొనియాడారు. భవిష్యత్తులో టెన్నిస్ డబుల్స్ ఆడే అవకాశం వస్తే కార్లోస్ అల్కరాజ్తో జతకట్టడానికి తాను సిద్ధమని, కోర్టులో అల్కరాజ్ ఆటను బాగా ఎంజాయ్ చేస్తాడని గిల్ పేర్కొన్నారు.
మరోవైపు, ఈ ఏడాది ప్రతిష్టాత్మక వింబుల్డన్ టోర్నమెంట్లో జాన్నిక్ సిన్నర్ విజేతగా నిలుస్తాడని గిల్ గట్టిగా నమ్ముతున్నారు. సిన్నర్ అద్భుతమైన ఆటగాడని, కోర్టు లోపల, వెలుపలా అతను నడుచుకునే విధానం ఎంతో హుందాతనంతో కూడి ఉంటుందని ప్రశంసించారు.
నలుగురు లెజెండ్స్తో ‘డ్రీమ్ డిన్నర్’
ఒకవేళ తన జీవితంలో ఒక అద్భుతమైన డిన్నర్ మీటింగ్ ఏర్పాటు చేసుకునే అవకాశం వస్తే, తాను ఆహ్వానించే నలుగురు కలల అతిథుల (Dream Dinner Guests) పేర్లను గిల్ ఈ సందర్భంగా బయటపెట్టారు.
ఆ జాబితాలో ఇద్దరు టెన్నిస్ దిగ్గజాలు, ఇద్దరు క్రికెట్ లెజెండ్స్ ఉండటం విశేషం. టెన్నిస్ నుండి సెరెనా విలియమ్స్, రోజర్ ఫెదరర్ కాగా, క్రికెట్ ప్రపంచం నుండి వివియన్ రిచర్డ్స్ మరియు సచిన్ టెండూల్కర్ లతో కలిసి డిన్నర్ చేయాలని ఉందని గిల్ చెప్పారు.
ఈ నలుగురు లెజెండ్స్ తమ తమ కాలాల్లో ఆయా క్రీడలను శాసించారని, వారి ప్రయాణం గురించి మాట్లాడేటప్పుడు వచ్చే సంభాషణలు ఎంతో అద్భుతంగా ఉంటాయని ఆశాభావం వ్యక్తం చేశారు. వారందరితో కలిసి ఒకే టేబుల్పై కూర్చుని డిన్నర్ చేయడం అనేది తనకు ఒక కల నిజమవ్వడం లాంటిదేనని గిల్ సంతోషంగా చెప్పుకొచ్చారు.
Also Read: గంభీర్ ముందు కఠిన సవాల్: నాలుగో టీ20లో సంజూ శాంసన్ రీఎంట్రీ ఇస్తాడా?
