చిన్నారి అభిమాని కోరిక తీర్చిన పవన్ కళ్యాణ్.. మంచానికే పరిమితమైన నిరంజన్‌ను ఇంటికెళ్లి పరామర్శించిన డిప్యూటీ సీఎం

ఆంధ్రప్రదేశ్ ఉప ముఖ్యమంత్రి, జనసేన పార్టీ అధ్యక్షుడు పవన్ కళ్యాణ్ మరోసారి తన మానవత్వాన్ని చాటుకున్నారు. అరుదైన జన్యుపరమైన వ్యాధితో మంచానికే పరిమితమైన తన అభిమాని నిరంజన్ కోరికను గౌరవిస్తూ స్వయంగా అతని ఇంటికి వెళ్లి పరామర్శించారు.

తెలంగాణలోని హనుమకొండ పట్టణం హనుమాన్ నగర్‌కు చెందిన 17 ఏళ్ల నిరంజన్ డి.ఎన్.డి (DND) అనే అరుదైన జన్యుపరమైన వ్యాధితో బాధపడుతున్నాడు. శారీరక ఎదుగుదల ఆగిపోవడంతో చాలా కాలంగా మంచానికే పరిమితమయ్యాడు. అయినప్పటికీ పవన్ కళ్యాణ్‌పై అతనికి చిన్నప్పటి నుంచి ప్రత్యేక అభిమానం ఉంది.

“పవన్‌ను ఒక్కసారి చూడాలి”.. చివరి కోరిక

తన జీవితంలో ఒకసారి అయినా పవన్ కళ్యాణ్‌ను కలవాలని నిరంజన్ కోరిక వ్యక్తం చేశాడు. ఈ విషయం తెలంగాణ జనసేన నాయకుల ద్వారా పవన్ కళ్యాణ్ దృష్టికి వెళ్లింది.

విషయం తెలుసుకున్న వెంటనే పవన్ కళ్యాణ్ బుధవారం హనుమకొండకు వెళ్లి నిరంజన్ ఇంటిని సందర్శించారు. ఇంట్లోకి వెళ్లిన వెంటనే మంచంపై ఉన్న నిరంజన్‌ను చూసి భావోద్వేగానికి గురయ్యారు.

అతని పక్కనే కూర్చుని ఆత్మీయంగా హత్తుకున్నారు. నుదిటిపై ముద్దుపెట్టి పలకరించారు.

“చిన్నప్పటి నుంచి మీరంటే ఇష్టం”

“చిన్నప్పటి నుంచి మీరంటే నాకు చాలా ఇష్టం” అని నిరంజన్ చెప్పిన మాటలు విని పవన్ కళ్యాణ్ కదిలిపోయారు.

నిరంజన్ ఆరోగ్యంగా ఉన్న సమయంలో పవన్ కళ్యాణ్‌ను అనుకరిస్తూ చేసిన డ్యాన్స్ వీడియోలు, ఫొటోలను కూడా ఆయన పరిశీలించారు. తనను అందరూ “చోటా గబ్బర్ సింగ్” అని పిలుస్తారని నిరంజన్ చెప్పడంతో పవన్ చిరునవ్వు చిందించారు.

కుటుంబానికి భరోసా

నిరంజన్ తల్లిదండ్రులు పొనుగోటి రాంగోపాల్, మానసతో పవన్ కళ్యాణ్ మాట్లాడారు. ప్రస్తుతం ఎక్కడ వైద్యం చేయిస్తున్నారని, ఇంకా ఏమైనా మెరుగైన చికిత్స అవకాశాలు ఉన్నాయా అని అడిగి తెలుసుకున్నారు.

“ధైర్యంగా ఉండండి.. భగవంతుని ఆశీస్సులు బాబుకి ఉంటాయి” అంటూ కుటుంబ సభ్యులకు మనోధైర్యం చెప్పారు.

వైద్య ఖర్చుల నిమిత్తం రూ.1 లక్ష ఆర్థిక సాయం అందించారు.

తిరుమల తీర్థ ప్రసాదాలు.. భద్రకాళి అమ్మవారికి ప్రత్యేక పూజలు

నిరంజన్‌కు తిరుమల శ్రీ వెంకటేశ్వరస్వామి ఆలయం నుంచి తెప్పించిన తీర్థ ప్రసాదాలు, వస్త్రాలు అందజేశారు.

అలాగే అతని ఆరోగ్యం కోసం వరంగల్ ప్రసిద్ధ భద్రకాళి అమ్మవారి ఆలయంలో ప్రత్యేక పూజలు చేయిస్తానని తెలిపారు. భద్రకాళి అమ్మవారి వెండి ప్రతిమను కూడా పూజ చేయించి కుటుంబ సభ్యులకు అందజేస్తానని హామీ ఇచ్చారు.

కుక్క పిల్ల కోరిక కూడా తీర్చనున్న పవన్

ఈ సందర్భంగా నిరంజన్ తనకు కుక్క పిల్లను పెంచుకోవాలని ఉందని చెప్పాడు. వెంటనే పవన్ కళ్యాణ్ “కొని పంపిస్తాను” అని హామీ ఇచ్చారు.

అయితే ఇంటి యజమానుల అనుమతి అవసరమని నిరంజన్ తండ్రి చెప్పడంతో, పవన్ స్వయంగా ఇంటి యజమానులను పిలిపించి మాట్లాడినట్లు జనసేన వర్గాలు తెలిపాయి.

కుటుంబ జీవనోపాధికి సహాయం

నిరంజన్ తల్లిదండ్రులు గతంలో కాకతీయ ఆసుపత్రిలో క్యాంటీన్ నిర్వహించేవారని తెలుసుకున్న పవన్ కళ్యాణ్, వారి జీవనోపాధి మెరుగుపడేందుకు సహాయం చేయాలని జనసేన తెలంగాణ నాయకులకు సూచించారు.

కుటుంబానికి క్యాంటీన్ ఏర్పాటు చేసే అవకాశాలను పరిశీలించాలని పార్టీ నాయకులకు దిశానిర్దేశం చేశారు.

పరామర్శ అనంతరం భద్రకాళి ఆలయానికి

నిరంజన్‌ను పరామర్శించిన అనంతరం పవన్ కళ్యాణ్ నేరుగా వరంగల్ భద్రకాళి అమ్మవారి ఆలయానికి వెళ్లారు.

ఈ కార్యక్రమంలో జనసేన తెలంగాణ ఇన్‌చార్జ్ శంకర్ గౌడ్, పార్టీ ప్రధాన కార్యదర్శి రామ్ తాళ్లూరి, పార్టీ నాయకులు రాధారం రాజలింగం, ఆర్.కే సాగర్ తదితరులు పాల్గొన్నారు.