సంక్షేమ పథకాల అమలులో కఠిన చర్యలు.. ముఖ గుర్తింపు తప్పనిసరి.. సీఎం రేవంత్ రెడ్డి కీల‌క ఆదేశాలు

తెలంగాణ ముఖ్యమంత్రి రేవంత్ రెడ్డి ఆధ్వర్యంలోని కాంగ్రెస్ ప్రభుత్వం అధికారంలోకి వచ్చిన తర్వాత అనేక సంక్షేమ పథకాలను అమలు చేస్తోంది. పేదలు, మహిళలు, బలహీన వర్గాల ప్రజలను ఆర్థికంగా బలోపేతం చేయడమే లక్ష్యంగా పథకాలను రూపొందించి అమలు చేస్తున్న ప్రభుత్వం, ఇప్పుడు వాటి అమల్లో మరింత పారదర్శకత తీసుకురావడానికి కీలక నిర్ణయం తీసుకుంది.

కలెక్టర్ల సదస్సులో కీలక ఆదేశాలు

సచివాలయంలో మంగళవారం నిర్వహించిన కలెక్టర్ల సదస్సులో సీఎం రేవంత్ రెడ్డి పలు అంశాలపై స్పష్టమైన దిశానిర్దేశం చేశారు. ఈనెల 6 నుంచి జూన్ 12 వరకు “ప్రజా పాలన – ప్రగతి ప్రణాళిక” కార్యక్రమాన్ని నిర్వహించాలని సూచించారు. మొత్తం 99 రోజుల కార్యాచరణ ప్రణాళికను ఐదు దశల్లో అమలు చేయాలని ఆదేశించారు.

అర్హులందరికీ సంక్షేమ పథకాలు చేరేలా చర్యలు తీసుకోవాలని, అదే సమయంలో అనర్హులను తొలగించాలని కలెక్టర్లకు స్పష్టం చేశారు. ఒకే వ్యక్తికి రెండుసార్లు లబ్ధి చేకూరకుండా కట్టుదిట్టమైన చర్యలు తీసుకోవాలని పేర్కొన్నారు.

Also Read: Telangana: డ్వాక్రా మహిళలకు రూ.10 లక్షల బీమా… రుణ భారం నుంచి పూర్తి రక్షణ

ప్రతి పథకానికి ముఖ గుర్తింపు

ఇకపై అన్ని సంక్షేమ పథకాల అమల్లో ముఖ గుర్తింపు విధానాన్ని తప్పనిసరిగా అమలు చేయాలని సీఎం ఆదేశించారు. “అర్హులకే లబ్ధి చేరాలి. అనర్హులు ఒక్కరైనా లబ్ధి పొందకూడదు” అని ఆయన స్పష్టం చేశారు. ఆసరా పింఛన్లలో ముఖ గుర్తింపు విధానం అమలు చేయడంతో ఇప్పటికే 3 లక్షల మంది అనర్హులను తొలగించగలిగామని ఆయన వెల్లడించారు.

రేషన్ కార్డుల పంపిణీ, సన్నబియ్యం సరఫరా, ఇందిరమ్మ ఇళ్లు, 200 యూనిట్లలోపు ఉచిత విద్యుత్ వంటి పథకాలను ప్రజల్లో విస్తృతంగా ప్రచారం చేయాలని సీఎం సూచించారు. అర్హులైన ప్రతి కుటుంబానికి లబ్ధి అందేలా పర్యవేక్షణ పెంచాలని చెప్పారు.

విద్య, వైద్యంలో సంస్కరణలు

విద్యా వ్యవస్థలో ప్రభుత్వం చేపడుతున్న మార్పులపై ప్రజల్లో అవగాహన కల్పించాలని అధికారులకు సూచించారు. తెలంగాణ ప్రభుత్వ ఆసుపత్రులను బలోపేతం చేసే దిశగా వాటిని సమీప వైద్య కళాశాలలకు అనుసంధానం చేయాలని పేర్కొన్నారు. ఆరోగ్య సేవల నాణ్యత పెరగడానికి ఇది దోహదపడుతుందని తెలిపారు.

అలాగే మధ్యాహ్న భోజన పథకం నిర్వహిస్తున్న ఏజెన్సీలకు ప్రతినెలా బిల్లులు సమయానికి చెల్లించాలని ఆదేశించారు. ఎటువంటి బకాయిలు లేకుండా వ్యవస్థను సజావుగా నడపాలని స్పష్టం చేశారు.

పారదర్శక పాలన దిశగా అడుగులు

సంక్షేమ పథకాల అమల్లో పారదర్శకత, బాధ్యతాయుత వ్యవహారం కీలకమని సీఎం రేవంత్ రెడ్డి అన్నారు. అర్హులైన ప్రజలకు న్యాయం జరిగేలా అధికారులంతా కృషి చేయాలని పిలుపునిచ్చారు. ప్రభుత్వం చేపడుతున్న ఈ చర్యలు పథకాల అమల్లో నిష్పక్షపాత విధానానికి దోహదపడతాయని విశ్లేషకులు అభిప్రాయపడుతున్నారు.