తెలంగాణ మున్సిపల్ ఎన్నికలపై జనసేన ఫోకస్.. సొంత బలం చూపించడమే లక్ష్యంగా కొత్త వ్యూహం

Telangana Municipal Elections Janasena

తెలంగాణలో త్వరలో జరగనున్న మున్సిపల్ ఎన్నికలను జనసేన పార్టీ (Telangana Municipal Elections Janasena)కీలక అవకాశంగా భావిస్తోంది. ఆంధ్రప్రదేశ్ అసెంబ్లీ ఎన్నికల్లో కూటమితో కలిసి సాధించిన ఘన విజయం పార్టీ శ్రేణుల్లో ఉత్సాహాన్ని నింపడంతో, ఇప్పుడు తెలంగాణలోనూ రాజకీయంగా బలంగా నిలదొక్కుకునేందుకు జనసేన అడుగులు వేస్తోంది. పట్టణ రాజకీయాల్లో తన ఉనికిని స్పష్టంగా చూపించడమే లక్ష్యంగా ఈ ఎన్నికలను పవన్ కళ్యాణ్ వ్యూహాత్మకంగా చూస్తున్నట్లు పార్టీ వర్గాలు చెబుతున్నాయి. ఇటీవల జరిగిన పంచాయతీ ఎన్నికల్లో తెలంగాణలోని పలు ప్రాంతాల్లో జనసేన మద్దతుతో సర్పంచులు, వార్డు సభ్యులు విజయం సాధించడం పార్టీకి ధైర్యం ఇచ్చింది.

ఇవి మున్సిపల్ స్థాయిలో కూడా అవకాశాలు ఉన్నాయన్న నమ్మకాన్ని కలిగించాయి. ముఖ్యంగా యువత ఎక్కువగా ఉన్న పట్టణ ప్రాంతాల్లో జనసేనకు అనుకూల వాతావరణం ఉందని పార్టీ అంచనా వేస్తోంది. జాతీయ స్థాయిలో ఎన్డీఏ కూటమిలో భాగస్వామిగా ఉన్న జనసేన, తెలంగాణలో బీజేపీతో సత్సంబంధాలు కొనసాగిస్తోంది. అయితే మున్సిపల్ ఎన్నికల్లో బీజేపీతో కలిసి వెళ్లాలా లేక సొంతంగా పోటీ చేయాలా అన్న అంశంపై ఇంకా తుది నిర్ణయం తీసుకోలేదు.

గత గ్రేటర్ హైదరాబాద్ ఎన్నికల సమయంలో జనసేన పోటీ నుంచి తప్పుకోవడం కార్యకర్తల్లో అసంతృప్తికి కారణమైంది. ఈసారి మాత్రం పరిస్థితులు భిన్నంగా ఉన్నాయని పార్టీ నేతలు చెబుతున్నారు. ఏపీలో అధికార కూటమిలో భాగంగా ఉండటం, పవన్ కళ్యాణ్‌కు పెరుగుతున్న ఆదరణ నేపథ్యంలో తెలంగాణలోనూ జనసేన తన శక్తిని ప్రదర్శించగలదన్న విశ్వాసం వ్యక్తమవుతోంది.

తెలంగాణలో పార్టీని క్షేత్రస్థాయిలో బలోపేతం చేసే బాధ్యతను ప్రధాన కార్యదర్శి రామ్ తాళ్లూరి సమర్థంగా నిర్వహిస్తున్నారు. ఖమ్మంకు చెందిన ఆయన, స్థానిక రాజకీయ పరిస్థితులను దృష్టిలో పెట్టుకుని పార్టీ నిర్మాణాన్ని పటిష్టం చేస్తున్నారు. అభ్యర్థుల ఎంపికలో ఈసారి మరింత జాగ్రత్తగా వ్యవహరించాలని, పార్టీ సిద్ధాంతాలకు నిబద్ధత కలిగినవారికే అవకాశం ఇవ్వాలని పవన్ కళ్యాణ్ భావిస్తున్నట్లు సమాచారం. బీజేపీ నుంచి సానుకూల స్పందన వస్తే పొత్తుపై చర్చలు జరిపేందుకు జనసేన సిద్ధంగా ఉంది. ఇందుకోసం ప్రత్యేక కమిటీ ఏర్పాటు చేసే అవకాశముంది. అయితే గౌరవప్రదమైన స్థానం లభించకపోతే ఒంటరిగా బరిలోకి దిగడానికే మెజారిటీ నాయకులు మొగ్గు చూపుతున్నారు. మూసీ పరివాహక ప్రాంత సమస్యలు, పట్టణ మౌలిక సదుపాయాల లోపాలు వంటి అంశాలను ప్రజల్లోకి తీసుకెళ్లాలని పార్టీ ప్రణాళిక వేస్తోంది.

మరిన్ని పొలిటికల్ వార్తల కోసం ఇక్కడ క్లిక్ చేయండి