కేసీఆర్ విజన్ వర్సెస్ రేవంత్ రెడ్డి పాలన: తెరపైకి వచ్చిన అసలు నిజాలు

ప్రపంచ బ్యాంక్ నివేదికతో మారిన పొలిటికల్ సీన్

తెలంగాణ రాష్ట్ర ఆర్థిక వ్యవస్థపై అంతర్జాతీయ స్థాయిలో మరోసారి పెద్ద గుర్తింపు లభించింది. ప్రపంచ బ్యాంక్ విడుదల చేసిన తాజా ఆదాయ వర్గీకరణ గణాంకాల ప్రకారం, దేశంలోనే అత్యధిక తలసరి ఆదాయం కలిగిన మొదటి ఐదు రాష్ట్రాల్లో తెలంగాణ మూడో స్థానాన్ని దక్కించుకుంది. రాష్ట్ర వార్షిక తలసరి ఆదాయం ఏకంగా $5,407 డాలర్లకు (దాదాపు ₹4.19 లక్షలు) చేరుకోవడంతో, అంతర్జాతీయ ప్రమాణాల ప్రకారం తెలంగాణ ‘అప్పర్-మిడిల్ ఇన్‌కమ్’ (ఎగువ మధ్య ఆదాయ) విభాగంలోకి అధికారికంగా అడుగుపెట్టింది.

ఈ అద్భుతమైన మైలురాయిపై బీఆర్ఎస్ వర్కింగ్ ప్రెసిడెంట్ కేటీఆర్ సాషల్ మీడియా వేదికగా ఘాటుగా స్పందించారు. తెలంగాణ ఆర్థికంగా దివాలా తీసిందంటూ ముఖ్యమంత్రి రేవంత్ రెడ్డి చేస్తున్న వ్యాఖ్యలకు, ఇచ్చిన హామీల నుంచి తప్పుకోవడానికి చెప్తున్న సాకులకు ఈ అంతర్జాతీయ నివేదికే సరైన సమాధానమని ఆయన పేర్కొన్నారు. దశాబ్దాల నిర్లక్ష్యం నుంచి విముక్తి పొంది, ప్రత్యేక రాష్ట్రం ఏర్పడిన కేవలం పదేళ్ల కాలంలోనే స్వతంత్ర భారత దేశ చరిత్రలో అత్యంత వేగంగా వృద్ధి చెందిన రాష్ట్రంగా తెలంగాణ చరిత్ర సృష్టించిందని కేటీఆర్ స్పష్టం చేశారు.

కేసీఆర్ పాలనలోని సంస్కరణలే అసలు కారణం

గత పదేళ్ల కాలంలో కేసీఆర్ నాయకత్వంలో అమలు చేసిన విప్లవాత్మక సంస్కరణలే ఈ రోజు తెలంగాణను అంతర్జాతీయ స్థాయిలో నిలబెట్టాయని బీఆర్ఎస్ శ్రేణులు గుర్తు చేస్తున్నాయి. పారిశ్రామిక రంగాన్ని పరుగులు పెట్టించిన ‘టీఎస్-ఐపాస్’ (TS-iPASS), ప్రపంచంలోనే అతిపెద్ద ఎత్తిపోతల పథకమైన కాళేశ్వరం ప్రాజెక్టు, భూగర్భ జలాలను పెంచిన మిషన్ కాకతీయ, రైతుల్లో భరోసా నింపిన రైతు బంధు వంటి వినూత్న పథకాలు రాష్ట్ర ముఖచిత్రాన్ని మార్చేశాయని కేటీఆర్ వివరించారు. ఎటువంటి పూర్వపు అనుకూలతలు లేదా వారసత్వ ప్రయోజనాలు లేకపోయినా, కేవలం విజన్ ఉన్న నాయకత్వం వల్లే రాష్ట్రం ఈ స్థాయికి చేరిందని ఆయన కొనియాడారు.

When the World Bank validates Telangana’s economic transformation, it is global recognition of KCR Garu’s vision.

From decades of neglect to earning a place among India’s World Bank Upper-Middle Income category states with a per capita income of $5,407, Telangana scripted one of… pic.twitter.com/Aa5KiaCutv

— KTR (@KTRBRS) July 8, 2026

ప్రపంచ బ్యాంక్ నివేదిక ప్రకారం, భారతదేశం మొత్తంగా ఇంకా ‘లోయర్-మిడిల్ ఇన్‌కమ్’ (దిగువ మధ్య ఆదాయ) కేటగిరీలోనే కొనసాగుతోంది. కానీ ఢిల్లీ ($6,217), కర్ణాటక ($5,579) తర్వాత $5,407 డాలర్లతో తెలంగాణ మూడో స్థానంలో నిలిచి ఈ గ్లోబల్ బెంచ్‌మార్క్‌ను దాటిపోయింది. తమిళనాడు, గుజరాత్ వంటి పారిశ్రామిక దిగ్గజ రాష్ట్రాల కంటే కూడా తెలంగాణ ముందంజలో ఉండటం గమనార్హం.

గణాంకాల సాక్షిగా తెలంగాణ ఆర్థిక ప్రగతి ప్రయాణం

తెలంగాణ రాష్ట్రం ఏర్పడిన 2014-15 ఆర్థిక సంవత్సరంలో రాష్ట్ర తలసరి ఆదాయం కేవలం ₹1.24 లక్షలుగా మాత్రమే ఉండేది. గడిచిన దశాబ్ద కాలంలో బీఆర్ఎస్ ప్రభుత్వ నిరంతర కృషి వల్ల అది 2025-26 నాటికి ₹4.19 లక్షలకు పెరిగింది. అంటే కేవలం పదేళ్లలోనే తెలంగాణ ప్రజల సగటు ఆదాయం మూడు రెట్లు పెరిగింది. ఇది జాతీయ సగటు ఆదాయమైన ₹2.19 లక్షల కంటే దాదాపు 1.9 రెట్లు ఎక్కువ కావడం విశేషం.

రాష్ట్ర అంతర్గత జిల్లాల విశ్లేషణను పరిశీలిస్తే, ఐటీ మరియు పారిశ్రామిక రంగానికి కేంద్రంగా ఉన్న రంగారెడ్డి జిల్లా ₹11.29 లక్షల తలసరి ఆదాయంతో రాష్ట్రంలోనే అగ్రస్థానంలో కొనసాగుతోంది. ఆ తర్వాతి స్థానంలో హైదరాబాద్ జిల్లా ₹4.77 లక్షలతో నిలిచింది. 2014 నుంచి 2023 వరకు తెలంగాణ స్థూల రాష్ట్ర దేశీయోత్పత్తి (GSDP) సగటున 12.7 శాతం వార్షిక వృద్ధి రేటును నమోదు చేసింది. ఇది దేశ సగటు వృద్ధి రేటు (10.5 శాతం) కంటే చాలా ఎక్కువ.

కాంగ్రెస్ హయాంలో మందగిస్తున్న వృద్ధి?

వరల్డ్ బ్యాంక్ డేటాను ప్రస్తావిస్తూనే, ప్రస్తుత కాంగ్రెస్ ప్రభుత్వంపై బీఆర్ఎస్ తీవ్ర విమర్శలు గుప్పించింది. గత పదేళ్ల పాటు దేశంలోనే అగ్రస్థానంలో దూసుకుపోయిన తెలంగాణ ఆర్థిక వృద్ధి వేగం, గత కొద్ది నెలలుగా కాంగ్రెస్ పాలనలో నెమ్మదించిందని ఆర్థిక నిపుణుల విశ్లేషణలను వారు గుర్తు చేస్తున్నారు. ప్రభుత్వం మారుతున్న తరుణంలో సరైన పారిశ్రామిక విధానాలు, పెట్టుబడుల ఆకర్షణపై దృష్టి పెట్టకపోవడం వల్లే ఎకానమీ మొమెంటం దెబ్బతింటోందని విపక్షాలు ఆరోపిస్తున్నాయి.

అయితే కాంగ్రెస్ ప్రభుత్వం ఈ ఆరోపణలను తోసిపుచ్చుతోంది. గత ప్రభుత్వం చేసిన విపరీతమైన అప్పుల భారాన్ని మోస్తూనే, తాము ప్రవేశపెట్టిన ఆరు గ్యారంటీల పథకాలను విజయవంతంగా అమలు చేస్తున్నామని ఆర్థిక మంత్రి మల్లు భట్టి విక్రమార్క బడ్జెట్ ప్రసంగంలో స్పష్టం చేశారు. 10.7 శాతం జీఎస్‌డీపీ వృద్ధి రేటుతో, రాబోయే రోజుల్లో తెలంగాణను 3 ట్రిలియన్ డాలర్ల ఆర్థిక వ్యవస్థగా మార్చడమే తమ లక్ష్యమని అధికార పక్షం చెప్తోంది.

Also Read: Cyberabad Updates: పాత దేవుడి పటాలు, పూజా సామాగ్రి ఉన్నాయా? జూలై 18న సైబరాబాద్‌లో స్పెషల్ డ్రైవ్!