ఐటీఆర్ (ITR)ఫైలింగ్‌కు సమయం దగ్గరపడింది: జూలైలో మిస్ కాకూడని కీలక తేదీలు

జూలై నెలలో ట్యాక్స్ పేయర్లు అప్రమత్తంగా ఉండాలి

పన్ను చెల్లింపుదారులకు జూలై నెల ఎంతో కీలకమైనది. జూన్ 30 ముగిసిన తర్వాత, కొత్త ఆర్థిక సంవత్సరపు మొదటి త్రైమాసికానికి సంబంధించిన పలు రకాల పన్ను నిబంధనలను పూర్తి చేయాల్సి ఉంటుంది. మీరు శాలరీ తీసుకునే ఉద్యోగి అయినా, వ్యాపార యజమాని అయినా లేదా నిధులు మినహాయించే సంస్థ అయినా.. ఈ డెడ్‌లైన్లను సకాలంలో పాటించకపోతే భారీ పెనాల్టీలు, వడ్డీలు ఎదుర్కోవాల్సి వస్తుంది. జూలై 2026లో మీరు గుర్తుంచుకోవాల్సిన ఆరు ప్రధాన పన్ను గడువులు ఇక్కడ ఉన్నాయి.

జూలై 2026లోని 6 ప్రధాన పన్ను గడువుల (Deadlines) వివరాలు

1. జూలై 7: క్వార్టర్లీ టీడీఎస్ (TDS) డిపాజిట్
ఏప్రిల్-జూన్ త్రైమాసికానికి గాను క్వార్టర్లీ పేమెంట్ అప్రూవల్ పొందిన వారు, తాము మినహాయించిన టీడీఎస్ (TDS) మొత్తాన్ని ప్రభుత్వానికి డిపాజిట్ చేయడానికి జూలై 7 ఆఖరి తేదీ. గడువు దాటితే వడ్డీ చెల్లించాల్సి ఉంటుంది.

2. జూలై 15: రిపోర్టింగ్ అబ్లిగేషన్ల గడువు
ప్రభుత్వ కార్యాలయాలు, స్టాక్ ఎక్స్ఛేంజీలు, ఆథరైజ్డ్ డీలర్లు, ఐఎఫ్ఎస్‌సీ (IFSC) యూనిట్లు మరియు నాన్-రెసిడెంట్ ఇన్వెస్టర్లతో లావాదేవీలు జరిపే మధ్యవర్తులకు పలు రకాల రిపోర్టింగ్ బాధ్యతలను సమర్పించడానికి జూలై 15 చివరి తేదీగా నిర్ణయించారు.

3. జూలై 30: చలాన్-కమ్-స్టేట్‌మెంట్ ఫైలింగ్
జూన్ నెలలో నిర్దేశిత నిబంధనల ప్రకారం మినహాయించిన పన్నులకు (TDS) సంబంధించిన చలాన్-కమ్-స్టేట్‌మెంట్‌ను ఫైల్ చేయడానికి జూలై 30 ఆఖరి గడువు.

4. జూలై 31: ఐటీఆర్ (ITR-1 & ITR-2) ఫైలింగ్ డెడ్‌లైన్
సాధారణ పన్ను చెల్లింపుదారులు, జీతభత్యాలు పొందే వ్యక్తులు ఆర్థిక సంవత్సరం 2025-26 (Assesment Year 2026-27) కు గాను ఐటీఆర్-1, ఐటీఆర్-2 ఫారాల ద్వారా తమ ఆదాయపు పన్ను రిటర్న్స్‌ను దాఖలు చేయడానికి జూలై 31 ఆఖరి రోజు. ఈ గడువు దాటితే తీవ్ర జరిమానాలు పడతాయి.

5. జూలై 31: క్వార్టర్లీ టీడీఎస్ / టీసీఎస్ స్టేట్‌మెంట్లు
జూన్ 30తో ముగిసిన త్రైమాసికానికి గాను ఉద్యోగుల జీతాల చెల్లింపులు, అలాగే నాన్-రెసిడెంట్లకు చేసిన పేమెంట్లకు సంబంధించిన వివిధ త్రైమాసిక టీడీఎస్ (TDS), టీసీఎస్ (TCS) స్టేట్‌మెంట్లను సమర్పించడానికి కూడా జూలై 31నే గడువుగా నిర్ణయించారు.

6. జూలై 31: ప్రత్యేక ఫారాల (Forms) సమర్పణ
ఇంటి అద్దెపై సెక్షన్ 80GG కింద డిడక్షన్ క్లెయిమ్ చేయడానికి ‘ఫారం 10BA’, జీతం బకాయిలు లేదా అడ్వాన్స్ శాలరీపై ఉపశమనం కోసం ‘ఫారం 10E’ తో పాటు విదేశీ ఆదాయం, రాయల్టీ మినహాయింపులకు సంబంధించిన ఫారాలు 10H, 10CCE, 10CCD లను సమర్పించడానికి జూలై 31 ఆఖరి తేదీ.

ఐటీఆర్ (ITR) డెడ్‌లైన్ మిస్ అయితే ఏం జరుగుతుంది? పెనాల్టీ ఎంత?

ఒకవేళ మీరు జూలై 31 లోపు మీ ఆదాయపు పన్ను రిటర్న్స్‌ను దాఖలు చేయకపోతే, మీరు డిసెంబర్ 31, 2026 లోపు బిలేటెడ్ రిటర్న్స్ (Belated Return) దాఖలు చేసుకునే అవకాశం ఉంటుంది. అయితే దీనికోసం మీరు అదనపు లేట్ ఫీజు (పెనాల్టీ) చెల్లించాల్సి ఉంటుంది.

క్లియర్‌ట్యాక్స్ నివేదిక ప్రకారం పెనాల్టీ వివరాలు ఇలా ఉన్నాయి:

• రూ. 5 లక్షల లోపు ఆదాయం ఉన్నవారికి: గడువు ముగిసిన తర్వాత ఐటీఆర్ దాఖలు చేస్తే రూ. 1,000 జరిమానా విధిస్తారు.
• రూ. 5 లక్షల పైబడి ఆదాయం ఉన్నవారికి: గడువు దాటిన తర్వాత డిసెంబర్ 31 లోపు ఫైల్ చేస్తే గరిష్టంగా రూ. 5,000 వరకు లేట్ ఫీజు పడుతుంది.

ఇతర నష్టాలు: లేట్ ఫీజుతో పాటు, చెల్లించాల్సిన పన్నుపై అదనపు వడ్డీ పడుతుంది. అంతేకాకుండా, వ్యాపార లేదా పెట్టుబడి నష్టాలను (Losses) తదుపరి సంవత్సరాలకు క్యారీ ఫార్వర్డ్ చేసుకునే హక్కును పన్ను చెల్లింపుదారులు కోల్పోతారు. ఒకవేళ డిసెంబర్ 31 గడువు కూడా దాటిపోతే, అదనపు రుసుముతో 24 నెలల లోపు కేవలం అప్‌డేటెడ్ రిటర్న్స్ (ITR-U) మాత్రమే దాఖలు చేయడానికి వీలుంటుంది. కాబట్టి చివరి నిమిషం వరకు వేచి చూడకుండా ముందే ఐటీఆర్ పూర్తి చేయడం ఉత్తమం.

Also Read: రగ్బీ లీగ్ కప్ కొట్టిన హైదరాబాద్ హీరోస్.. రన్నరప్‌గా ముంబయ్ డ్రీమర్స్!