హైదరాబాద్ చుట్టూ అభివృద్ధి చేయాలని ప్రతిష్టాత్మకంగా ప్రతిపాదించిన రీజినల్ రింగ్ రోడ్ (RRR) ప్రాజెక్ట్లో భారీ మార్పులు చోటుచేసుకున్నాయి. మొదట ప్రపంచ స్థాయి ప్రమాణాలతో రూపొందించాలనుకున్న ఈ ట్రిపుల్ ఆర్ ప్రాజెక్ట్ ఇప్పుడు సాధారణ హైవేగా మారిపోవడం చర్చనీయాంశమైంది. కేంద్ర, రాష్ట్ర ప్రభుత్వాలు భారీ వ్యయాన్ని దృష్టిలో పెట్టుకుని ప్రాజెక్ట్ డిజైన్లో కీలక మార్పులు చేసినట్లు తెలుస్తోంది.
ప్రారంభంలో ఈ రింగ్ రోడ్డును దేశంలోనే అత్యంత పొడవైన 8 లైన్ల హైస్పీడ్ కారిడార్గా నిర్మించాలనే లక్ష్యం పెట్టుకున్నారు. అయితే భవిష్యత్ ట్రాఫిక్ అవసరాలను పరిగణనలోకి తీసుకుని, 8 లైన్లు అవసరం లేదని కేంద్రం భావించి దాన్ని 6 లైన్లకు కుదించింది. దీంతో ప్రాజెక్ట్ వ్యయం కొంత తగ్గినా, దీర్ఘకాలిక అవసరాలపై సందేహాలు వ్యక్తమవుతున్నాయి.
ఇంకా, మొదట ORR తరహాలో ట్రిపుల్ ఆర్ మొత్తం పొడవునా సర్వీస్ రోడ్లు ఏర్పాటు చేయాలని ప్రతిపాదించారు. కానీ తాజా మార్పుల్లో సర్వీస్ రోడ్లను పూర్తిగా తొలగించి, కేవలం ఖాళీ స్థలం మాత్రమే ఉంచాలని నిర్ణయించారు. దీని వల్ల స్థానిక గ్రామాలకు కనెక్టివిటీ సమస్యలు తలెత్తే అవకాశముందని స్థానికులు ఆందోళన వ్యక్తం చేస్తున్నారు.
లైటింగ్ వ్యవస్థలో కూడా మార్పులు చేశారు. మొదట మొత్తం రోడ్డుకు LED స్ట్రీట్ లైటింగ్ ఏర్పాటు చేయాలని భావించగా, ఇప్పుడు ఖర్చులు అధికంగా ఉండటంతో కేవలం గ్రామాలు తగిలే ప్రాంతాల్లో మాత్రమే లైట్లు ఏర్పాటు చేయాలని నిర్ణయించారు. ఇది రాత్రి ప్రయాణ భద్రతపై ప్రభావం చూపే అవకాశం ఉందని నిపుణులు హెచ్చరిస్తున్నారు.
గరిష్ట వేగ పరిమితిని కూడా తగ్గించారు. మొదట గంటకు 120-130 కిలోమీటర్ల వేగంతో ప్రయాణించేందుకు డిజైన్ చేసిన రోడ్డును ఇప్పుడు 100 కిలోమీటర్లకు పరిమితం చేశారు. అలాగే వంతెనల నిర్మాణంలో కూడా కోతలు విధించారు. మొదట ప్రతిపాదించిన 204 వంతెనలు, కల్వర్టుల సంఖ్యను సగానికి తగ్గించారు.
రోడ్డు భద్రతకు కీలకమైన వర్టికల్ కర్వ్ డిజైన్ కూడా తగ్గించారు. మొదట 1300 మీటర్ల విజిబిలిటీతో ఉండేలా ప్లాన్ చేయగా, ఇప్పుడు 650 మీటర్లకు కుదించారు. దీని వల్ల వాహనదారులకు ముందస్తు హెచ్చరిక సమయం తగ్గి ప్రమాదాల అవకాశాలు పెరిగే ప్రమాదం ఉంది.
ట్రిపుల్ ఆర్ ప్రాజెక్ట్ హైదరాబాద్ భవిష్యత్ ట్రాఫిక్ అవసరాలకు కీలకంగా భావించబడింది. నగర విస్తరణ, పరిశ్రమల అభివృద్ధి, రవాణా సౌకర్యాల మెరుగుదలకు ఇది ముఖ్యమైన మౌలిక సదుపాయంగా ఉండాల్సింది.
అయితే ప్రాజెక్ట్లో జరిగిన మార్పులు దీని దీర్ఘకాలిక ప్రయోజనాలపై ప్రభావం చూపే అవకాశముంది. ఖర్చు తగ్గింపు ఒకవైపు అవసరమైనా, భద్రత, కనెక్టివిటీ, భవిష్యత్ అవసరాలను దృష్టిలో పెట్టుకుని నిర్ణయాలు తీసుకోవాలని నిపుణులు సూచిస్తున్నారు.
ముఖ్యంగా గ్రామీణ ప్రాంతాలకు కనెక్టివిటీ తగ్గడం, రాత్రి భద్రత సమస్యలు, ప్రమాదాల అవకాశాలు పెరగడం వంటి అంశాలు ఆందోళన కలిగిస్తున్నాయి.
మొత్తంగా, ‘అనుకున్నదొక్కటి.. అయిందొక్కటి’ అన్నట్లుగా ట్రిపుల్ ఆర్ ప్రాజెక్ట్ తన అసలు లక్ష్యాల నుంచి కొంత వెనక్కి తగ్గిందనే అభిప్రాయం వ్యక్తమవుతోంది. రాబోయే రోజుల్లో ఈ మార్పులపై ప్రభుత్వం మరింత స్పష్టత ఇవ్వాల్సిన అవసరం ఉంది.
Aslo read: హైదరాబాద్ మెట్రో ప్రభుత్వానికి… సాహసోపేత నిర్ణయం: మంత్రి భట్టి
