హైదరాబాద్లో అగ్ని ప్రమాదాల నివారణకు HYDRA కఠిన చర్యలు
నిబంధనలు ఉల్లంఘించిన భవనాలకు తాళాలు, కరెంట్ కట్ హెచ్చరిక
ఇవి కూడా చదవండి
సెల్లార్ల దుర్వినియోగంపై ప్రత్యేక తనిఖీలు ప్రారంభం
హైదరాబాద్ నగరంలో వరుసగా చోటుచేసుకుంటున్న అగ్ని ప్రమాదాల నేపథ్యంలో హైడ్రా (HYDRA) కఠిన చర్యలకు శ్రీకారం చుట్టింది. వాణిజ్య భవనాలు, షాపింగ్ మాల్స్, గోదాముల్లో అగ్నిమాపక భద్రతా నిబంధనల అమలుపై నేటి నుంచే ప్రత్యేక తనిఖీలు నిర్వహించనున్నట్లు హైడ్రా కమిషనర్ ఏవీ రంగనాథ్ ప్రకటించారు. నిబంధనలు పాటించని భవనాలకు తాళాలు వేయడంతో పాటు విద్యుత్ సరఫరాను కూడా నిలిపివేస్తామని ఆయన స్పష్టం చేశారు.
ఇటీవల నాంపల్లిలో జరిగిన ఘోర అగ్ని ప్రమాదం నగర యంత్రాంగాన్ని కలచివేసింది. ఈ ఘటనపై నిర్వహించిన సమీక్షలో కీలక విషయాలు వెలుగులోకి వచ్చాయి. పార్కింగ్ కోసం కేటాయించిన సెల్లార్ను గోదాముగా మార్చడం. మండే స్వభావం ఉన్న వస్తువులను అక్రమంగా నిల్వ చేయడం. వంటి కారణాల వల్లే ప్రాణ నష్టం తీవ్రత పెరిగిందని అధికారులు గుర్తించారు. ఈ నేపథ్యంలో నగరవ్యాప్తంగా ఇలాంటి ఉల్లంఘనలకు చెక్ పెట్టాలని నిర్ణయించారు.
సెల్లార్లు ఖాళీ చేయాల్సిందే :
- కమిషనర్ ఏవీ రంగనాథ్ అన్ని వాణిజ్య సంస్థలకు స్పష్టమైన ఆదేశాలు జారీ చేశారు.
- సెల్లార్లను వెంటనే ఖాళీ చేయాలి
- వాటిని కేవలం పార్కింగ్ అవసరాలకే వినియోగించాలి
- గోదాములుగా, నిల్వ కేంద్రాలుగా వాడితే కఠిన చర్యలు తప్పవు
- తనిఖీల్లో సెల్లార్ల దుర్వినియోగం తేలితే ఎలాంటి ఉపేక్ష ఉండదని ఆయన తేల్చిచెప్పారు.
ఉన్నతస్థాయి సమావేశంలో కీలక నిర్ణయాలు :
బుద్ధభవన్లో జరిగిన ఉన్నతస్థాయి సమావేశంలో అధికారులు పలు కీలక సూచనలు అందుకున్నారు.
అందులో ముఖ్యంగా:
- అగ్నిమాపక భద్రతా ప్రమాణాలు పాటించని భవనాల ముందు ‘ప్రమాదకరం’ అనే బోర్డులు ఏర్పాటు
- అలాంటి భవనాలకు వెంటనే విద్యుత్ సరఫరా నిలిపివేత
- మెట్లు, కారిడార్లు, ఎమర్జెన్సీ ఎగ్జిట్ మార్గాలు ఎప్పటికప్పుడు ఖాళీగా ఉంచడం
- ఫైర్ సేఫ్టీ పరికరాలు పనిచేసే స్థితిలో ఉండేలా చూసుకోవడం
ఆందోళన కలిగిస్తున్న గణాంకాలు
గతేడాది హైదరాబాద్ నగరంలో నెలకు సగటున మూడు చొప్పున మొత్తం 36 భారీ అగ్ని ప్రమాదాలు జరిగాయని కమిషనర్ వెల్లడించారు. ఈ సంఖ్య నగర భద్రతపై తీవ్ర ఆందోళన కలిగిస్తోందన్నారు.
ప్రజల భాగస్వామ్యం అవసరం :
అగ్ని ప్రమాదాల నివారణలో ప్రజల పాత్ర కూడా కీలకమని హైడ్రా కమిషనర్ పిలుపునిచ్చారు.
నిబంధనలు ఉల్లంఘిస్తున్న భవనాలు, గోదాముల వివరాలను ఫొటోలు, వీడియోలతో పాటు వాట్సాప్ నంబర్: 90001 13667 కు పంపాలని కోరారు
సమాచారం ఇచ్చిన వారి వివరాలను పూర్తిగా గోప్యంగా ఉంచుతామని హామీ ఇచ్చారు.
నివాస ప్రాంతాల్లో గోదాములపై ఉక్కుపాదం :
ఈ సందర్భంగా నివాస ప్రాంతాల్లో మండే స్వభావం ఉన్న వస్తువులను నిల్వ చేసే గోదాములపై కఠిన చర్యలు తప్పవని ఏవీ రంగనాథ్ హెచ్చరించారు. ప్రజల ప్రాణాలే ప్రధానమని, భద్రత విషయంలో ఎలాంటి రాజీ ఉండదని స్పష్టం చేశారు.
మొత్తానికి, హైదరాబాద్లో అగ్ని ప్రమాదాల నివారణకు హైడ్రా చేపట్టిన ఈ కఠిన చర్యలు నగర భద్రతకు కీలక మలుపుగా మారనున్నాయని అధికారులు అభిప్రాయపడుతున్నారు
