‘భారత్ టాక్సీ’ విస్తరణ.. డ్రైవర్లకే పూర్తి ఆదాయం ఇచ్చే కొత్త మోడల్

డ్రైవర్ల ఆదాయాన్ని పెంచడం, ప్రజలకు తక్కువ ఖర్చుతో రవాణా సేవలు అందించడమే లక్ష్యంగా కేంద్ర ప్రభుత్వం ప్రోత్సహిస్తున్న ‘భారత్ టాక్సీ’ ప్రాజెక్ట్ ఇప్పుడు దేశవ్యాప్తంగా విస్తరించేందుకు సిద్ధమైంది.

సహకార మోడల్‌పై నడిచే ఈ డిజిటల్ టాక్సీ ప్లాట్‌ఫామ్ ప్రస్తుతం ఢిల్లీ NCR మరియు గుజరాత్‌లోని కొన్ని నగరాల్లో పనిచేస్తుండగా, వచ్చే మూడు సంవత్సరాల్లో టియర్-2, టియర్-3 నగరాలకు విస్తరించనుంది.

2025 జూన్ 6న మల్టీ-స్టేట్ కోఆపరేటివ్ సొసైటీగా ప్రారంభమైన భారత్ టాక్సీ, డ్రైవర్లను సభ్యులుగా తీసుకుని వారే యజమానులుగా ఉండే విధంగా రూపొందించబడింది. ఇది ప్రస్తుతం ఉన్న కమిషన్ ఆధారిత టాక్సీ యాప్‌లకు ప్రత్యామ్నాయంగా నిలుస్తోంది. ముఖ్యంగా, ఈ ప్లాట్‌ఫామ్ డ్రైవర్ల నుంచి ఎటువంటి కమిషన్ తీసుకోదు. ప్రయాణికులు చెల్లించే మొత్తం చార్జ్, ప్రభుత్వ పన్నులు మినహా, నేరుగా డ్రైవర్లకే చేరుతుంది.

సహకార మోడల్ ప్రత్యేకత

ఈ మోడల్‌లో డ్రైవర్లకు మాత్రమే కాకుండా, సేవల నాణ్యతకు కూడా ప్రాధాన్యత ఇచ్చారు. ధరలు పారదర్శకంగా నిర్ణయించబడతాయి. దూరం, నిర్వహణ ఖర్చులు, మార్కెట్ పరిస్థితుల ఆధారంగా చార్జీలు ఫిక్స్ చేస్తారు. దీంతో ప్రయాణికులకు న్యాయమైన ధరలు, డ్రైవర్లకు సరైన ఆదాయం లభించేలా వ్యవస్థ రూపొందించారు.

Also Read: రంజాన్ ఈద్ ట్రాఫిక్ అలర్ట్.. హైదరాబాద్‌లో పలు ప్రాంతాల్లో భారీ రద్దీ

డిజిటల్ సాంకేతికతతో సేవలు

డిజిటల్ సాంకేతికతతో కూడిన ఈ ప్లాట్‌ఫామ్‌లో రైడ్ బుకింగ్, వాహన ట్రాకింగ్, డిజిటల్ పేమెంట్స్, కస్టమర్ సపోర్ట్ వంటి సేవలు అందుబాటులో ఉంటాయి. ONDC నెట్‌వర్క్ ద్వారా DigiHaat, Bob Rides, OneTicket వంటి ప్లాట్‌ఫామ్‌లతో అనుసంధానం చేయడం ద్వారా విస్తృత సేవలు అందించేలా ప్రణాళిక రూపొందించారు.

డ్రైవర్ల సంక్షేమంపై దృష్టి

ఇక డ్రైవర్ల సంక్షేమంపై కూడా ప్రత్యేక దృష్టి సారించారు. బ్యాంకింగ్, ఇన్సూరెన్స్, డిజిటల్ పేమెంట్ సేవల కోసం పలు సంస్థలతో ఒప్పందాలు కుదుర్చుకున్నారు. దీని ద్వారా డ్రైవర్లకు ఆర్థిక భద్రత, గౌరవప్రదమైన పని పరిస్థితులు కల్పించాలనే లక్ష్యం ఉంది.

Ola, Uberకు ప్రత్యామ్నాయం

ప్రస్తుతం Ola, Uber వంటి యాప్‌లు డ్రైవర్ల నుంచి భారీ కమిషన్లు తీసుకుంటున్నాయన్న విమర్శలు ఉన్నాయి. ఈ నేపథ్యంలో కమిషన్ లేకుండా డ్రైవర్లకు పూర్తి ఆదాయం ఇచ్చే ‘భారత్ టాక్సీ’ మోడల్ ఒక ప్రత్యామ్నాయంగా నిలుస్తోంది.

గ్రామీణ ప్రాంతాలకు విస్తరణ

ఇది కేవలం టాక్సీ సేవలలోనే కాకుండా, సహకార రంగంలో కొత్త దిశగా భావిస్తున్నారు. చిన్న పట్టణాలు, గ్రామీణ ప్రాంతాల్లో కూడా ఈ సేవలు అందుబాటులోకి వస్తే, రవాణా సౌకర్యాలు మెరుగుపడటమే కాకుండా స్థానిక ఉపాధి అవకాశాలు కూడా పెరుగుతాయి.

అంతేకాకుండా, సహకార వ్యవస్థ ద్వారా ప్రజలే యజమానులుగా మారడం వల్ల లాభాలు సమానంగా పంచబడే అవకాశం ఉంటుంది. దీంతో సమగ్ర అభివృద్ధి సాధ్యమవుతుందని నిపుణులు అభిప్రాయపడుతున్నారు.

మొత్తంగా, ‘సహకారంతో సమృద్ధి’ లక్ష్యంతో ముందుకు సాగుతున్న భారత్ టాక్సీ ప్రాజెక్ట్, దేశ రవాణా రంగంలో గణనీయమైన మార్పులకు దారి తీసే అవకాశముంది.