EPF 2026: కొత్త PF నిబంధనలతో కంపెనీలు, ఉద్యోగులకు ఏం మారింది?

EPF 2026 కొత్త నిబంధనలు అమల్లోకి.. ఏమి మారింది?

జూలై 1 నుంచి ఉద్యోగుల భవిష్య నిధి సంస్థ (EPFO) కొత్త EPF 2026 నిబంధనలను అమల్లోకి తీసుకొచ్చింది. 1952 నుంచి అమలులో ఉన్న పాత విధానానికి బదులుగా కొత్త ఫ్రేమ్‌వర్క్ అమలవుతోంది. ముఖ్యంగా యజమానులు (Employers) చెల్లించాల్సిన తప్పనిసరి PF కాంట్రిబ్యూషన్‌లో కీలక మార్పులు చేశారు.

ఇప్పటి వరకు అధిక వేతనం పొందుతున్న ఉద్యోగుల విషయంలో కంపెనీలు ఉద్యోగి చెల్లించినంత మొత్తాన్ని PFగా జమ చేయాల్సి వచ్చేది. కొత్త నిబంధనలతో ఆ బాధ్యతలో మార్పు రావడంతో కంపెనీలపై ఆర్థిక భారం తగ్గే అవకాశం ఉందని నిపుణులు భావిస్తున్నారు.

PF కాంట్రిబ్యూషన్‌లో అసలు మార్పు ఏమిటి?

పాత నిబంధనల ప్రకారం ఉద్యోగి బేసిక్ వేతనం, డియర్నెస్ అలవెన్స్‌పై 12 శాతం PF ఉద్యోగి, మరో 12 శాతం యజమాని చెల్లించేవారు. కనీస వేతన పరిమితి రూ.15,000 ఆధారంగా యజమాని కనీసంగా రూ.1,800 చెల్లించడం తప్పనిసరి.

అయితే ఉద్యోగి నెలకు రూ.1 లక్ష బేసిక్ వేతనం పొందితే, ఉద్యోగి రూ.12,000, కంపెనీ కూడా రూ.12,000 PFగా చెల్లించాల్సి వచ్చేది. ఈ విధానం అధిక వేతన ఉద్యోగుల విషయంలో కంపెనీలకు అదనపు వ్యయంగా మారేది.

కొత్త EPF 2026 నిబంధనల్లో కనీస రూ.1,800 తప్పనిసరి చెల్లింపు కొనసాగుతుండగా, దానికంటే ఎక్కువ మొత్తాన్ని కంపెనీలు తప్పనిసరిగా చెల్లించాల్సిన అవసరం లేదని స్పష్టం చేశారు.

కంపెనీలకు ఎలా లాభం?

కొత్త నిబంధనలతో కంపెనీలు అధిక వేతనం పొందే ఉద్యోగుల కోసం భారీ మొత్తంలో PF చెల్లించాల్సిన బాధ్యత నుంచి కొంతవరకు విముక్తి పొందుతాయి.

ఉదాహరణకు:

• ఉద్యోగి బేసిక్ వేతనం: రూ.1,00,00
• పాత విధానం ప్రకారం కంపెనీ PF: రూ.12,000
• కొత్త విధానం ప్రకారం తప్పనిసరి PF: రూ.1,800
• ఒక్క ఉద్యోగిపై నెలకు కంపెనీ ఆదా: రూ.10,200 (ఉదాహరణ ఆధారంగా)

అయితే సంస్థలు కోరుకుంటే స్వచ్ఛందంగా (Voluntary) అదనపు PF చెల్లించవచ్చు. దీనిపై ఎలాంటి నిషేధం లేదు.

ఉద్యోగులకు కలిగే ప్రయోజనాలు

కొత్త విధానం ఉద్యోగులకు కూడా కొన్ని ఎంపికలను అందిస్తోంది.

ప్రధానంగా:

• అధిక PF కాంట్రిబ్యూషన్ కొనసాగించాలా వద్దా అనేది ఉద్యోగి నిర్ణయించుకోవచ్చు.
• అదనపు PF చెల్లించకపోతే ఆ మొత్తం జీతంలోనే చేరే అవకాశం ఉంటుంది.
• కంపెనీ CTCలో మార్పులు చేయకపోతే నెలవారీ టేక్-హోమ్ సాలరీ పెరగవచ్చు.
• వ్యక్తిగత పెట్టుబడి ప్రణాళిక ప్రకారం PF లేదా ఇతర పెట్టుబడులను ఉద్యోగి ఎంచుకునే అవకాశం ఉంటుంది.

ఆర్థిక నిపుణుల అభిప్రాయం ప్రకారం, దీర్ఘకాలిక పదవీ విరమణ పొదుపులను దృష్టిలో పెట్టుకునే ఉద్యోగులు స్వచ్ఛందంగా అధిక PF కొనసాగించడం ప్రయోజనకరంగా ఉండొచ్చు. తక్షణ నగదు అవసరాలు ఉన్నవారు మాత్రం టేక్-హోమ్ సాలరీ పెంచుకోవడాన్ని ఎంచుకునే అవకాశం ఉంది.

PF ఉపసంహరణలో కూడా భారీ వెసులుబాటు

EPF 2026లో మరో ముఖ్యమైన మార్పు PF ఉపసంహరణకు సంబంధించినది.

కొత్త నిబంధనల ప్రకారం:

• అనారోగ్యం, ఉన్నత విద్య, వివాహం, ఇతర ప్రత్యేక అవసరాల కోసం
• ప్రస్తుత PF బ్యాలెన్స్‌లో 75 శాతం వరకు ఉపసంహరించుకునే అవకాశం కల్పించారు.
• ఇది ఉద్యోగులకు అత్యవసర సమయాల్లో ఆర్థిక భరోసాగా ఉపయోగపడుతుందని భావిస్తున్నారు.
• ఉపసంహరణల సంఖ్య కూడా పెరిగింది
• పాత నిబంధనల్లో వివాహం, ఉన్నత విద్య వంటి అవసరాలకు జీవితకాలంలో కేవలం మూడు సార్లు మాత్రమే PF ఉపసంహరణకు అనుమతి ఉండేది.
• కొత్త విధానంలో ఈ పరిమితిని 10 సార్ల వరకు పెంచారు.
• దీంతో ఉద్యోగులు జీవితంలో వివిధ దశల్లో PF నిధిని మరింత సౌకర్యవంతంగా వినియోగించుకునే అవకాశం ఉంటుంది.

ఉద్యోగులు ఏ విషయాలు గుర్తుంచుకోవాలి?

EPF 2026 అమలుతో ఉద్యోగులు తమ ఆర్థిక ప్రణాళికను మళ్లీ సమీక్షించుకోవడం అవసరం.

గుర్తుంచుకోవాల్సిన అంశాలు:

• PF తగ్గిస్తే టేక్-హోమ్ జీతం పెరగొచ్చు.
• కానీ పదవీ విరమణ సమయంలో PF కార్పస్ తక్కువగా ఉండే అవకాశం ఉంది.
• దీర్ఘకాలిక పొదుపులు, పన్ను ప్రయోజనాలు, భవిష్యత్ అవసరాలను దృష్టిలో పెట్టుకుని నిర్ణయం తీసుకోవడం మంచిదని ఆర్థిక నిపుణులు సూచిస్తున్నారు.

Also read: Delhi EV Policy: కొత్త ఈవీ కొనేవారికి పండగే.. ఏకంగా రూ. 30,000 సబ్సిడీ ప్రకటించిన కేబినెట్