NEET పరీక్షా అవకతవకలపై ఢిల్లీ వేదికగా సాగుతున్న కాక్రోచ్ జనతా పార్టీ (సీజేపీ) నిరసనలు మరో మలుపు తిరిగాయి. ఈ ఆందోళనలు 32వ రోజుకు చేరుకోగా – ఉద్యమకారులు తమ డిమాండ్ల జాబితాను మరింత విస్తరించారు.
జూలై 20న జరిగిన నిరసనల్లో పాల్గొన్న శాంతియుత ఉద్యమకారులపై ఎలాంటి ఎఫ్ఐఆర్లు నమోదు చేయకూడదని, వారిపై చట్టపరమైన చర్యలు తీసుకోకూడదని తాజాగా డిమాండ్ చేశారు.
“శాంతియుత నిరసనకారులను కాపాడతాం”
ఉద్యమకారులనుద్దేశించి మాట్లాడిన పార్టీ ప్రతినిధి అశుతోష్ రాంకా – శాంతియుతంగా నిరసన తెలిపినా తమను లక్ష్యంగా చేసుకుంటారోనని చాలామంది ఆందోళన చెందుతున్నారని పేర్కొన్నారు. శాంతియుతంగా నిరసన తెలిపిన వారిపై ఎలాంటి చర్యలు లేకుండా తాము చూసుకుంటామని, వారికంటే ముందే తాము అరెస్టు కావడానికి సిద్ధంగా ఉన్నామని భరోసా ఇచ్చారు.
సీజేపీ 4 ప్రధాన డిమాండ్లు ఇవే
ప్రస్తుతం ఈ పోరాటం నాలుగు కీలక డిమాండ్లతో కొనసాగుతోందని రాంకా స్పష్టం చేశారు:
- సామాజిక కార్యకర్త సోనమ్ వాంగ్చుక్ విడుదల
- కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా
- ఆత్మహత్య చేసుకున్న NEET అభ్యర్థుల కుటుంబాలకు రూ.1 కోటి పరిహారం
- జూలై 20 నిరసనకారులపై ఎలాంటి కేసూ పెట్టకపోవడం
- ఉద్యమాన్ని తొక్కేయాలని చూసిన కొద్దీ అది మరింత బలపడుతోందని రాంకా వ్యాఖ్యానించారు.
జూలై 20 ఘటనలపై ఆరోపణలు
జూలై 20 నాటి ఘటనలను గుర్తుచేస్తూ – పోలీసు చర్యలు, టెంట్లు వేయకుండా విధించిన ఆంక్షలతో నిరసనలు ముగిసిపోతాయని అధికారులు భావించారని రాంకా ఆరోపించారు. ఆ రోజు లాఠీచార్జ్ చేయించి, టెంట్లు వేయనివ్వకపోతే ఉద్యమం ఆగిపోతుందని అనుకున్నారని, కానీ ఇప్పుడు ఆందోళన వంద రెట్లు పెద్దదిగా మారిందని అన్నారు.
ఆ రోజు ఢిల్లీ పోలీసులు వ్యవహరించిన తీరును విమర్శించిన ఆయన – నిన్నటివరకు తమను ‘బొద్దింకలు’, ‘వైరస్’ అని అవమానించిన ప్రభుత్వమే ఇప్పుడు చర్చలకు దిగివచ్చిందని పేర్కొన్నారు. ప్రజలు ప్రభుత్వాన్ని ప్రశ్నించడం ప్రారంభించడమే తమ నిరసన సాధించిన అతిపెద్ద విజయమని అభివర్ణించారు.
కేంద్రంతో తొలి అధికారిక చర్చలు
ఉద్యమం తీవ్రరూపం దాల్చడంతో కేంద్ర ప్రభుత్వం స్పందించి సీజేపీతో తొలిసారిగా అధికారిక చర్చలు జరపడం గమనార్హం. గత సోమవారం సీజేపీ ప్రతినిధులు అశుతోష్ రాంకా, సౌరవ్ దాస్లను కేంద్ర ఆరోగ్య మంత్రి జేపీ నడ్డా ఢిల్లీలోని తన నివాసానికి ఆహ్వానించి మాట్లాడారు.
ఈ భేటీలో తమ డిమాండ్లతో కూడిన లిఖితపూర్వక వినతిపత్రాన్ని సీజేపీ ప్రతినిధులు అందజేశారు. దీనిపై బీజేపీ అగ్రనాయకత్వంతో చర్చించి నిర్ణయం తీసుకునేందుకు జేపీ నడ్డా కొంత సమయం కోరారని రాంకా వెల్లడించారు.
ఉద్యమ నేపథ్యం
NEET 2026 పరీక్ష జరిగిన కొద్ది రోజులకే – ప్రశ్నపత్రం లీక్ అయినట్లు, ఇతర అవకతవకలు జరిగినట్లు ఆరోపణలు రావడంతో పరీక్ష రద్దయింది. ఏళ్ల తరబడి చేసిన కృషి వృథా కావడంతో పలువురు NEET అభ్యర్థులు తీవ్ర మనోవేదనకు గురయ్యారు. ఈ అంశమే సీజేపీ నిరసనకు ప్రధాన కేంద్రబిందువుగా మారింది.
జూన్ 28న సోనమ్ వాంగ్చుక్ ఈ నిరసనలకు మద్దతుగా నిరాహార దీక్ష ప్రారంభించారు. ఆయన ఆరోగ్యం క్షీణించడంతో పోలీసులు జంతర్ మంతర్ నుంచి తరలించారు. లక్షలాది మంది అభ్యర్థులు పోటీపడే NEET వంటి కీలక పరీక్షల్లో పారదర్శకత లోపించడంపై విద్యార్థుల్లో ఆగ్రహం ఈ ఉద్యమానికి బలం చేకూర్చింది.
పరిష్కారం కోసం ఎదురుచూపు
ప్రస్తుతం కేంద్రం, సీజేపీ మధ్య చర్చలు కొనసాగుతున్నందున – ఈ ఉద్యమం ఎటువైపు మలుపు తిరుగుతుందన్నది ఆసక్తికరంగా మారింది. పరీక్షా వ్యవస్థలో సంస్కరణలు, జవాబుదారీతనం అనేవి లక్షలాది విద్యార్థులు, వారి కుటుంబాలకు సంబంధించిన అంశాలు కావడంతో — దీనిపై కేంద్రం తీసుకునే నిర్ణయం కీలకం కానుంది.
ఈ కథనంలో ఆత్మహత్యల ప్రస్తావన ఉంది. ఇది సున్నితమైన అంశం. తీవ్ర ఒత్తిడి, నిరాశలో ఉన్నవారు ఒంటరిగా బాధపడకుండా – కుటుంబ సభ్యులు, స్నేహితులతో మాట్లాడాలి. అవసరమైతే ప్రభుత్వ టెలి-మానస్ మానసిక ఆరోగ్య హెల్ప్లైన్ 14416కు కాల్ చేసి ఉచిత సహాయం పొందవచ్చు.
తరచుగా అడిగే ప్రశ్నలు
Q1. సీజేపీ ప్రధాన డిమాండ్లు ఏమిటి?
సోనమ్ వాంగ్చుక్ విడుదల, కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా, ఆత్మహత్య చేసుకున్న NEET అభ్యర్థుల కుటుంబాలకు రూ.1 కోటి పరిహారం, జూలై 20 నిరసనకారులపై కేసులు వద్దు - ఇవే నాలుగు ప్రధాన డిమాండ్లు.
Q2. కేంద్రంతో చర్చలు ఎవరు జరిపారు?
సీజేపీ ప్రతినిధులు అశుతోష్ రాంకా, సౌరవ్ దాస్లను కేంద్ర ఆరోగ్య మంత్రి జేపీ నడ్డా తన నివాసానికి ఆహ్వానించి చర్చలు జరిపారు. డిమాండ్లపై నాయకత్వంతో సంప్రదించి నిర్ణయం తీసుకునేందుకు నడ్డా సమయం కోరారు. Q3. ఈ నిరసనకు మూల కారణం ఏమిటి? NEET 2026 పరీక్షలో ప్రశ్నపత్రం లీక్ సహా అవకతవకలు జరిగినట్లు ఆరోపణలు రావడంతో పరీక్ష రద్దయింది. ఈ పరిణామాలతో పలువురు అభ్యర్థులు మనోవేదనకు గురికావడం ఈ ఉద్యమానికి ప్రధాన కారణమైంది.
