భారత క్రికెట్ జట్టులో స్టార్ వికెట్ కీపర్ బ్యాటర్గా గుర్తింపు పొందిన సంజూ శాంసన్ మరోసారి తన ఉదారతతో వార్తల్లో నిలిచాడు. కేరళలో జరిగిన ఒక చిన్న సంఘటన ఇప్పుడు దేశవ్యాప్తంగా చర్చనీయాంశంగా మారింది.
కేరళ రాష్ట్రంలోని పాలక్కాడ్ జిల్లాలోని కడంపజిపురం ప్రాంతానికి చెందిన శబరీష్ అనే యువకుడు కేబుల్ టెక్నీషియన్గా పనిచేస్తూ, స్థానిక క్రికెట్ క్లబ్లో వికెట్ కీపర్గా ఆడుతున్నాడు. ఏప్రిల్ 7 సాయంత్రం అతను తన స్నేహితుడితో కలిసి మైదానానికి వెళ్తుండగా, రోడ్డుపక్కన నిలిపిన ఒక లగ్జరీ కారులో సంజూ శాంసన్ ఉన్నట్టు గమనించాడు.
అభిమానితో ఆప్యాయంగా..
తన అభిమాన క్రికెటర్ను చూసిన ఆనందంలో ఉబ్బితబ్బిబ్బైన శబరీష్, అతనితో సెల్ఫీ తీసుకోవాలని కోరాడు. అప్పటికి సంజూ వీడియో కాల్లో ఉండటంతో కాసేపు వేచి ఉండమని సూచించాడు. కాల్ ముగిసిన తర్వాత కారులో నుంచి దిగిన సంజూ, అభిమానులతో ఆప్యాయంగా మాట్లాడాడు.
ఈ సమయంలో శబరీష్ తన ఫోన్తో సెల్ఫీ తీసేందుకు ప్రయత్నించగా, ఆ ఫోన్ డిస్ప్లే పగిలిపోయి ఉండటంతో ఫోటో సరిగా రావడం లేదని సంజూ గమనించాడు. వెంటనే స్పందించిన సంజూ, తన కారు డిక్కీ తెరిచి అందులో ఉన్న కొత్త స్మార్ట్ఫోన్ బాక్స్ను తీసి, ఎలాంటి ఆలోచన లేకుండా శబరీష్కు బహుమతిగా ఇచ్చాడు.
ఆనందంతో గిఫ్ట్ అందుకున్న అభిమాని..
“నీ ఫోన్ పాడైపోయింది కదా… ఇది నువ్వే వాడుకో” అంటూ ప్రేమగా చెప్పడంతో శబరీష్ మొదట ఆశ్చర్యపోయినా, చివరకు ఆనందంతో ఆ గిఫ్ట్ను స్వీకరించాడు. వెళ్లే సమయంలో “క్రికెట్ బాగా ఆడు” అంటూ ప్రోత్సహించడం సంజూ వ్యక్తిత్వానికి మరో ఉదాహరణగా నిలిచింది.
ప్రస్తుతం ఐపీఎల్ 2026 సీజన్లో చెన్నై సూపర్ కింగ్స్ తరపున ఆడుతున్న సంజూ శాంసన్, మైదానంలో ఆశించిన స్థాయిలో రాణించకపోయినా, మైదానం వెలుపల మాత్రం తన మంచి మనసుతో అభిమానులను గెలుచుకుంటున్నాడు.
ఈ సంఘటన సోషల్ మీడియాలో వైరల్ కావడంతో నెటిజన్లు సంజూను ప్రశంసలతో ముంచెత్తుతున్నారు. “నిజమైన హీరో అంటే ఇదే”, “మనసు బంగారం” అంటూ అభిమానులు కొనియాడుతున్నారు. ఇలా ఒక చిన్న సంఘటనతోనే సంజూ శాంసన్ మరోసారి తన మనసు గొప్పదనాన్ని చాటుకుని, అభిమానుల గుండెల్లో ప్రత్యేక స్థానం సంపాదించాడు.
