ఒక్కసారిగా డీజిల్ కొరత ఎందుకు? తెలంగాణ, ఏపీలో బంకుల వద్ద భారీ క్యూలు

తెలంగాణ మరియు ఆంధ్రప్రదేశ్ రాష్ట్రాల్లో పెట్రోల్, డీజిల్ కొరత తీవ్ర సంక్షోభంగా మారింది. పలు జిల్లాల్లో బంకుల వద్ద “నో స్టాక్” బోర్డులు దర్శనమిస్తున్నాయి. వాహనదారులు గంటల తరబడి క్యూలలో నిలబడాల్సిన దుస్థితి నెలకొంది. తెలంగాణలో ఉమ్మడి ఖమ్మం, నల్లగొండ జిల్లాల్లో తీవ్రమైన కొరత నెలకొంది. సూర్యాపేట జిల్లా కేంద్రంలోని సగానికి పైగా పెట్రోల్ బంకుల్లో స్టాక్ అయిపోయింది.

ఆంధ్రప్రదేశ్‌లో రాజమండ్రి, సామర్లకోట, మర్రిపాడు, కర్నూల్, నంద్యాల జిల్లాల్లో బంకుల వద్ద భారీ రద్దీ నెలకొంది. ఈ సంక్షోభాన్ని సీరియస్‌గా తీసుకున్న సీఎం చంద్రబాబు నాయుడు శనివారం వీడియో మాధ్యమం ద్వారా సమీక్ష నిర్వహించారు.

సాధారణంగా ఆంధ్రప్రదేశ్‌లో రోజుకు 6,330 కిలో లీటర్ల పెట్రోల్, 9,048 కిలో లీటర్ల డీజిల్ అమ్మకాలు జరుగుతాయి. కానీ శనివారం ఒక్కరోజే 10,345 కిలో లీటర్ల పెట్రోల్, 14,156 కిలో లీటర్ల డీజిల్ అమ్మకాలు జరిగాయి. సాధారణ అమ్మకం కంటే ఒక్కసారిగా 50 శాతం పెరగడంతో బంకుల్లో నిల్వలు అడుగంటాయి. కొరత ఉందనే ఆందోళనతో వాహనదారులు భారీగా ప్యానిక్ కొనుగోళ్లు చేయడమే ఈ సమస్యకు ప్రధాన కారణమని అధికారులు వివరణ ఇచ్చారు.

ప్రభుత్వం స్పందన

సరఫరా 10 శాతం పెంచినా ప్యానిక్ కొనుగోళ్ల వల్ల పరిస్థితి చేయిదాటిందని అధికారులు పేర్కొన్నారు. ఆంధ్రప్రదేశ్ సీఎం చంద్రబాబు నాయుడు సమీక్షలో ప్రభుత్వ శాఖలు తీసుకున్న చర్యలు, సమస్య పరిష్కారంపై తక్షణమే నివేదిక ఇవ్వాలని అధికారులను ఆదేశించారు. రాష్ట్ర ప్రభుత్వ ప్రధాన కార్యదర్శి సాయిప్రసాద్ సహా ఉన్నత అధికారులు ఈ సమీక్షలో పాల్గొన్నారు. ఆయిల్ కంపెనీలు, డీలర్లతో సమావేశాలు నిర్వహించిన తర్వాత కూడా పరిస్థితి తీవ్రమవుతోందని తెలంగాణ నుండి వస్తున్న వార్తలు సూచిస్తున్నాయి.

ప్రజలకు విజ్ఞప్తి

అవసరమైన మేరకే పెట్రోల్, డీజిల్ కొనాలని అధికారులు విజ్ఞప్తి చేస్తున్నారు. ప్యానిక్ కొనుగోళ్లు చేయడం వల్ల కొరత మరింత తీవ్రమవుతుందని హెచ్చరిస్తున్నారు. సరఫరా త్వరలో సాధారణ స్థాయికి వస్తుందని, ప్రజలు ఆందోళన పడవద్దని వివరించారు. అయితే ప్రభుత్వం సమయానికి స్పందించకపోవడం వల్లనే పరిస్థితి ఇంత తీవ్రమైందని విపక్షాలు విమర్శిస్తున్నాయి.
Also Read : మణికొండలో తాగునీటి పైప్‌లైన్ పేలి కాలనీల్లో వరద .. అపార్ట్‌మెంట్ సెల్లార్లు జలమయం