- ముఖ్యమంత్రి ఎ. రేవంత్ రెడ్డి
- తెలంగాణ తొలి పబ్లిక్ స్కూల్ ప్రారంభం, బ్రేక్ఫాస్ట్ పథకం ప్రారంభం
- ఆరుట్ల గ్రామం, మంచాల మండలం, రంగారెడ్డి జిల్లా
తెలంగాణ ప్రభుత్వ విద్యా రంగంలో మరో కీలక అడుగు పడింది. రంగారెడ్డి జిల్లా మంచాల మండలం ఆరుట్ల గ్రామంలో అత్యంత ప్రతిష్ఠాత్మకంగా నిర్మించిన తెలంగాణ పబ్లిక్ స్కూల్ (TPS) ను ముఖ్యమంత్రి ఎ. రేవంత్ రెడ్డి ఘనంగా ప్రారంభించారు.
ఈ సందర్భంగా రాష్ట్రంలోని ప్రభుత్వ పాఠశాలల్లో చదువుతున్న దాదాపు 27 లక్షల మంది విద్యార్థులకు ఈ ప్రారంభోత్సవాన్ని అంకితం చేస్తున్నట్లు సీఎం ప్రకటించారు. విద్యను ప్రపంచ స్థాయికి తీసుకెళ్లాలన్న లక్ష్యంతో ఈ పాఠశాలను నిర్మించినట్లు పేర్కొన్నారు.
బ్రేక్ఫాస్ట్ పథకానికి శ్రీకారం
పాఠశాల ప్రారంభం అనంతరం సీఎం రేవంత్ రెడ్డి విద్యార్థులతో కలిసి ఉదయం అల్పాహారం చేశారు. ఇదే వేదికగా రాష్ట్రవ్యాప్తంగా అమలు చేయనున్న బ్రేక్ఫాస్ట్ పథకాన్ని కూడా ప్రారంభించారు.
“పిల్లలు ఆరోగ్యంగా ఉంటేనే విద్యలో రాణించగలరు” అనే లక్ష్యంతో ప్రభుత్వం ఈ పథకాన్ని తీసుకొచ్చిందని తెలిపారు.
కిచెన్లో పూరీలు చేసిన సీఎం
పాఠశాల కిచెన్ను సందర్శించిన ముఖ్యమంత్రి అక్కడ పనిచేస్తున్న మహిళా వంటవారితో మాట్లాడారు. అనంతరం వారితో కలిసి స్వయంగా పూరీలు తయారు చేసి అందరినీ ఆశ్చర్యపరిచారు.
సీఎం సాధారణంగా వ్యవహరించడం, వంటశాల సిబ్బందితో మమేకం కావడం అక్కడున్న వారిని ఆకట్టుకుంది. మహిళా చెఫ్స్ కూడా సీఎంతో మాట్లాడే అవకాశం రావడంతో ఆనందం వ్యక్తం చేశారు.
revanth_anumula
personally visited the school kitchen and joined the staff in preparing puris.
ల్యాబ్లపై సీఎం ప్రత్యేక ఆసక్తి
పాఠశాలలో ఏర్పాటు చేసిన అత్యాధునిక సైన్స్ ల్యాబ్లు సీఎం ప్రత్యేక దృష్టిని ఆకర్షించాయి.
ఫిజిక్స్, కెమిస్ట్రీ, బాటనీ ల్యాబరేటరీలను సందర్శించిన ఆయన విద్యార్థులు ఉపయోగిస్తున్న ఆధునిక పరికరాలను పరిశీలించారు. ముఖ్యంగా మైక్రోస్కోప్ను స్వయంగా పరీక్షించి, విద్యార్థులకు అందిస్తున్న ప్రయోగాత్మక విద్యా అవకాశాలను అభినందించారు.
డిజిటల్ క్లాస్రూమ్లు, లైబ్రరీ
సీఎం పాఠశాలలోని:
- డిజిటల్ క్లాస్రూమ్లు
- ఆధునిక లైబ్రరీ
- సంగీతం, నృత్యం బోధించే ప్రత్యేక తరగతి గదులు
- విద్యార్థులకు ఉచిత రవాణా కోసం ఏర్పాటు చేసిన బస్సులు
అన్నింటినీ పరిశీలించారు.
పాఠశాల మేనేజ్మెంట్ కమిటీ సభ్యులు, ఉపాధ్యాయులతో మాట్లాడి విద్యా విధానం, విద్యార్థులకు కల్పిస్తున్న సౌకర్యాలపై వివరాలు అడిగి తెలుసుకున్నారు.
విద్యార్థులతో ఫుట్బాల్ ఆడిన సీఎం
పాఠశాల ఆవరణలో ఏర్పాటు చేసిన వాలీబాల్, క్రికెట్, ఫుట్బాల్, కబడ్డీ మైదానాలను పరిశీలించిన సీఎం కొద్దిసేపు విద్యార్థులతో కలిసి ఫుట్బాల్ ఆడారు.
ఈ సందర్భంగా విద్యార్థులతో సరదాగా మాట్లాడి, పలువురితో కరచాలనం చేశారు. అనంతరం పాఠశాల ఆవరణలో ఒక మొక్కను కూడా నాటారు.
అంతర్జాతీయ ప్రమాణాలతో తెలంగాణ పబ్లిక్ స్కూల్
ఆరుట్లలో ప్రారంభించిన ఈ పబ్లిక్ స్కూల్లో:
- ప్రీ-ప్రైమరీ నుంచి ఇంటర్మీడియట్ వరకు విద్య
- ఇంగ్లీష్ మీడియంలో బోధన
- అత్యాధునిక సైన్స్ ల్యాబ్లు
- డిజిటల్ తరగతి గదులు
- అంతర్జాతీయ ప్రమాణాల క్రీడా మైదానాలు
- టెన్నిస్, క్యారమ్స్ హాళ్లు
- విద్యార్థుల రవాణా సౌకర్యం
కల్పించారు.
ప్రభుత్వ పాఠశాలలను ప్రైవేట్, అంతర్జాతీయ పాఠశాలలకు దీటుగా తీర్చిదిద్దాలన్న ప్రభుత్వ లక్ష్యానికి ఈ పాఠశాల నాంది పలుకుతుందని అధికారులు చెబుతున్నారు.
ప్రముఖుల హాజరు
ఈ కార్యక్రమంలో మంత్రి దామోదర రాజనర్సింహ, ఎంపీలు వేమ్ నరేందర్ రెడ్డి, రఘువీర్ రెడ్డి, సలహాదారు కె. కేశవరావు, ఎమ్మెల్యే మల్రెడ్డి రంగారెడ్డి, విద్యా కమిషన్ చైర్మన్ మురళీ ఐఏఎస్ (రిటైర్డ్), ఇతర ప్రజాప్రతినిధులు, అధికారులు పాల్గొన్నారు.
