కార్పొరేట్ ఆసుపత్రుల్లో పైసా ఖర్చు లేకుండా ఇన్-పేషెంట్ సేవలు

తెలంగాణ రాష్ట్ర ప్రభుత్వ ఉద్యోగులు, పెన్షనర్ల దశాబ్దాల నిరీక్షణకు తెరదించుతూ ప్రజా ప్రభుత్వం సరికొత్త ఆరోగ్య భద్రతను అందుబాటులోకి తెచ్చింది.

సచివాలయం వేదికగా శుక్రవారం జరిగిన ఉన్నత స్థాయి కార్యక్రమంలో ఉప ముఖ్యమంత్రి భట్టి విక్రమార్క, వైద్య ఆరోగ్య శాఖ మంత్రి దామోదర రాజనర్సింహ కలిసి ‘న్యూ ఎంప్లాయిస్ హెల్త్ స్కీమ్’ (New Employees Health Scheme) ను అధికారికంగా ప్రారంభించారు. ఈ సందర్భంగా పలువురు ఉద్యోగులకు కొత్త డిజిటల్ హెల్త్ కార్డులను వారు స్వయంగా అందజేశారు.

ఉద్యోగులు అనారోగ్యం బారిన పడితే వైద్య ఖర్చుల కోసం అప్పులపాలయ్యే దుస్థితిని తొలగించడమే లక్ష్యంగా సీఎం రేవంత్ రెడ్డి నేతృత్వంలోని ఇందిరమ్మ ప్రభుత్వం ఈ నిర్ణయం తీసుకుంది.

ఎలాంటి భయాందోళనలు లేని పూర్తి స్థాయి ఉచిత వైద్య భరోసాను కల్పించడం ద్వారా ఉద్యోగుల పనితీరు, ఉత్పాదకత మరింత పెరుగుతుందని ప్రభుత్వం భావిస్తోంది.

క్యాబినెట్ సబ్ కమిటీ దార్శనికత: 38 లక్షల మందికి లబ్ధి

ఈ సరికొత్త హెల్త్ స్కీమ్ కేవలం ఒక ప్రకటనకే పరిమితం కాకుండా, అత్యంత పకడ్బందీగా రూపకల్పన చేయబడింది. దీని కోసం ఉప ముఖ్యమంత్రి భట్టి విక్రమార్క ఛైర్మన్‌గా ప్రత్యేక క్యాబినెట్ సబ్ కమిటీ ఏర్పాటయింది.

ఇందులో మంత్రులు దుద్దిళ్ళ శ్రీధర్ బాబు, పొన్నం ప్రభాకర్, సీతక్క సభ్యులుగా వ్యవహరించి ఉద్యోగ సంఘాలతో సుదీర్ఘంగా చర్చించారు.

ఈ పథకం యొక్క ప్రధాన ముఖ్యాంశాలు:

మొత్తం లబ్ధిదారులు: రాష్ట్రంలోని సుమారు 8 లక్షల మంది ప్రభుత్వ ఉద్యోగులు, పెన్షనర్లు. వారితో పాటు వారిపై ఆధారపడిన 29.80 లక్షల మంది కుటుంబ సభ్యులకు సైతం ఈ పథకం వర్తిస్తుంది. (మొత్తంగా దాదాపు 38 లక్షల మందికి ప్రయోజనం).

నెట్‌వర్క్ ఆసుపత్రులు: రాష్ట్రవ్యాప్తంగా ఉన్న 886 కార్పొరేట్ మరియు ప్రైవేట్ నెట్‌వర్క్ ఆసుపత్రులలో ఈ కార్డులు చెల్లుబాటు అవుతాయి.

నగదు రహిత సేవలు: ఆసుపత్రులలో చేరిన ఉద్యోగులు ఒక్క రూపాయి కూడా ముందుగా చెల్లించాల్సిన అవసరం లేకుండా సంపూర్ణ ఉచిత ఇన్‌పేషెంట్ (IP) సేవలు పొందవచ్చు.

చికిత్సల పరిధి: కేంద్ర ప్రభుత్వ ఆరోగ్య పథకం (CGHS) ప్యాకేజీ ధరల ప్రకారం ఏకంగా 1,816 రకాల వైద్య, శస్త్రచికిత్సలను ఈ పథకం కవర్ చేస్తుంది.

గత బకాయిలపై భట్టి విక్రమార్క సంచలన వ్యాఖ్యలు

గత పాలకులు ఉద్యోగుల ఆరోగ్య భద్రతను పదేళ్ల పాటు పూర్తిగా నిర్లక్ష్యం చేశారని డిప్యూటీ సీఎం భట్టి విక్రమార్క తీవ్రంగా విమర్శించారు. గత ప్రభుత్వం పెండింగ్‌లో పెట్టిన దాదాపు రూ. 10 వేల కోట్ల వైద్య మరియు ఇతర బకాయి బిల్లులను ప్రస్తుత ప్రజా ప్రభుత్వం మానవీయ కోణంలో క్లియర్ చేస్తోందని ఆయన వెల్లడించారు.

ఉద్యోగుల ఇబ్బందులను తొలగించేందుకు నెలకు రూ. 2,000 కోట్ల చొప్పున నిధులను విడుదల చేస్తున్నామని, ప్రతి 15 రోజులకోసారి తానే స్వయంగా ఆర్థిక శాఖ పరంగా సమీక్ష నిర్వహిస్తూ ఒక్క రూపాయి కూడా పెండింగ్ లేకుండా చూస్తున్నానని స్పష్టం చేశారు.

“వైద్య ఖర్చుల అప్పులతో ఆందోళనగా ఉన్న ఉద్యోగి ప్రభుత్వం ఆశించిన స్థాయిలో ఔట్‌పుట్ ఇవ్వలేడు. అందుకే ఉద్యోగులను మా కుటుంబ సభ్యులుగా భావించి, పారదర్శక నిర్వహణ కోసం ప్రభుత్వ అధికారులు, ఉద్యోగ సంఘాల ప్రతినిధులతో సమాన భాగస్వామ్యంతో ఒక ప్రత్యేక ‘ట్రస్ట్’ ను ఏర్పాటు చేశాం.”
— భట్టి విక్రమార్క, డిప్యూటీ సీఎం

ప్రజా సంక్షేమానికి వారధులుగా నిలవాలి

రాష్ట్రంలో ఇప్పటికే పేద ప్రజల కోసం రాజీవ్ ఆరోగ్యశ్రీ పరిమితిని రూ. 5 లక్షల నుంచి రూ. 10 lakhs కు పెంచిన విషయాన్ని మంత్రులు గుర్తుచేశారు.

ఒకవైపు 1.06 కోట్ల పేద కుటుంబాలకు ఉచిత కార్పొరేట్ వైద్యం అందిస్తూనే, మరోవైపు ప్రభుత్వ యంత్రాంగాన్ని నడిపించే ఉద్యోగులకు ఈ కొత్త హెల్త్ స్కీమ్ ద్వారా కొండంత అండగా నిలిచామన్నారు.

ప్రభుత్వం ఇంతటి చిత్తశుద్ధితో వ్యవహరిస్తున్నందున, ఉద్యోగులంతా రెట్టింపు ఉత్సాహంతో ప్రజలకు సేవ చేయాలని పిలుపునిచ్చారు.

మహిళలకు ఉచిత బస్సు ప్రయాణం, పేదలకు సన్నబియ్యం, గృహాలకు 200 యూనిట్ల ఉచిత విద్యుత్ వంటి ఇందిరమ్మ ప్రభుత్వ ఆశయాలను క్షేత్రస్థాయిలోకి తీసుకెళ్లడంలో ఉద్యోగులే నిజమైన వారధులు కావాలని ఆకాంక్షించారు.

ఈ చారిత్రాత్మక ప్రారంభోత్సవ కార్యక్రమంలో రాష్ట్ర ప్రభుత్వ ప్రధాన కార్యదర్శి సంజయ్ జాజు, హెల్త్ ప్రిన్సిపల్ సెక్రటరి డా. క్రిస్టినా జడ్ చోంగ్తూ, ఫైనాన్స్ సెక్రటరి సందీప్ కుమార్ సుల్తానియా మరియు పలువురు ఉద్యోగ సంఘాల నేతలు పాల్గొన్నారు.

Also read: హైకోర్టు అనుమతిచ్చినా బీఆర్ఎస్ నేతలకు హౌస్ అరెస్ట్.. హైదరాబాద్‌లో హైడ్రామా!