మీ ఓటు ఉంటుందా? 2002 డేటాతో లింక్ లేకపోతే నోటీసు వచ్చే అవకాశం!

ఓటర్ల జాబితాలో భారీ మార్పులు.. 2002 ఓటర్ డేటాతో లింక్ తప్పనిసరి, ఇంటింటికీ BLOల సర్వే!

దేశంలో ఓటర్ల జాబితా సమగ్రతను మరింత బలోపేతం చేసేందుకు ఎన్నికల సంఘం (ECI) కీలక నిర్ణయం తీసుకుంది. 2026 స్పెషల్ ఇంటెన్సివ్ రివిజన్ (SIR) పేరుతో ప్రత్యేక సమగ్ర సవరణ చేపడుతూ, ప్రస్తుతం ఉన్న ఓటర్ల వివరాలను 2002 నాటి ఓటర్ల జాబితాతో డిజిటల్‌గా లింక్ చేయనుంది. ఈ ప్రక్రియలో భాగంగా జూన్ 25 నుంచి జులై 24 వరకు బూత్ స్థాయి అధికారులు (BLOలు) ఇంటింటికీ వెళ్లి సర్వే నిర్వహించనున్నారు.

ఈ ప్రత్యేక సవరణ ద్వారా చనిపోయిన వారి పేర్లు, శాశ్వతంగా ఇతర ప్రాంతాలకు వెళ్లిపోయిన వారి పేర్లు, నకిలీ ఓట్లు వంటి అంశాలను గుర్తించి తొలగించనున్నారు. అదే సమయంలో కొత్తగా 18 ఏళ్లు నిండిన యువతను ఓటర్ల జాబితాలో చేర్చడం కూడా ప్రధాన లక్ష్యంగా ఉంది.

BLOలు ఇంటింటికీ వెళ్లి డేటా సేకరణ

ఈ ప్రక్రియలో బూత్ లెవల్ ఆఫీసర్ (BLO) కీలక పాత్ర పోషించనున్నారు. వారు అధికారిక BLO యాప్ ద్వారా ప్రస్తుత ఓటర్ల వివరాలను 2002 నాటి ఓటర్ల జాబితాలోని కుటుంబ సభ్యులతో డిజిటల్‌గా లింక్ చేస్తారు.

జూన్ 25 నుంచి జులై 24 వరకు ప్రతి ఇంటిని సందర్శించి ముందుగానే ముద్రించిన ఎన్యూమరేషన్ ఫారమ్‌లను రెండు ప్రతుల్లో అందజేస్తారు. వాటిని ఎలా పూరించాలో కూడా ఓటర్లకు మార్గనిర్దేశం చేస్తారు.

ఓటర్లు ఫారమ్‌ను పూర్తి చేసిన తర్వాత BLOలు తిరిగి సేకరిస్తారు. రాజకీయ పార్టీల తరఫున పనిచేసే బూత్ లెవల్ ఏజెంట్లు (BLAలు) కూడా ఈ ప్రక్రియలో సహాయపడతారు.

2002 ఓటర్ల జాబితాలో పేరు ఉంటే..

ఒకవేళ మీ పేరు లేదా మీ కుటుంబ సభ్యుల పేరు 2002 నాటి ఓటర్ల జాబితాలో ఉంటే, ఎన్యూమరేషన్ ఫారమ్‌లో ఆ వివరాలను సంబంధిత కాలమ్‌లో నమోదు చేయాలి.

అలాగే:

• తాజా కలర్ ఫోటో అంటించాలి
• ఆధార్ నంబర్ ఇవ్వాలి
• మొబైల్ నంబర్ నమోదు చేయాలి
• ఇతర వ్యక్తిగత వివరాలు పూరించి సంతకం చేయాలి

ఇంత చేసిన తర్వాత ఫారమ్‌ను BLOకు అందజేస్తే సరిపోతుంది.

2002 జాబితాలో పేరు లేకపోతే?

2002 ఓటర్ల జాబితాలో పేరు లేకపోతే ఆందోళన చెందాల్సిన అవసరం లేదు. అలాంటి వారు తమ తల్లిదండ్రులు లేదా తాతయ్య, నాయనమ్మల ఓటరు వివరాలను సేకరించి ఫారమ్‌లో నమోదు చేయాలి.

సరైన వివరాలు కనుగొనడంలో BLOలు సహాయం చేస్తారని ఎన్నికల అధికారులు చెబుతున్నారు.

కొత్త ఓటర్లకు ప్రత్యేక నిబంధనలు

కొత్తగా ఓటరుగా నమోదు చేసుకునే వారికి వయస్సు ఆధారంగా పత్రాల సమర్పణలో కొన్ని నిబంధనలు ఉన్నాయి.

01 జూలై 1987కి ముందు జన్మించిన వారు

తమ సొంత జనన ధృవీకరణ పత్రం లేదా ఇతర గుర్తింపు పత్రం సమర్పిస్తే సరిపోతుంది.

01 జూలై 1987 నుంచి 02 డిసెంబర్ 2004 మధ్య జన్మించిన వారు

తమ పత్రంతో పాటు తల్లి లేదా తండ్రిలో ఎవరో ఒకరి పత్రాన్ని జత చేయాలి.

02 డిసెంబర్ 2004 తర్వాత జన్మించిన యువ ఓటర్లు

తమ పత్రాలతో పాటు తల్లిదండ్రుల ఇద్దరి ధృవీకరణ పత్రాలు తప్పనిసరిగా సమర్పించాల్సి ఉంటుంది.

లింక్ కాకపోతే నోటీసు

ముసాయిదా ఓటర్ల జాబితా విడుదలైన తర్వాత, 2002 డేటాతో లింక్ కాని ఓటర్లు లేదా వివరాల్లో వ్యత్యాసాలు ఉన్నవారికి ఎన్నికల రిజిస్ట్రేషన్ అధికారి (ERO) నోటీసులు జారీ చేస్తారు.

అలాంటి సందర్భాల్లో సంబంధిత ఓటరు తన అర్హతను నిరూపించేందుకు అవసరమైన పత్రాలను సమర్పించాల్సి ఉంటుంది.

సమర్పించాల్సిన ముఖ్య పత్రాలు

ఎన్నికల సంఘం సూచించిన పత్రాల్లో ముఖ్యమైనవి:

• ప్రభుత్వ ఉద్యోగి లేదా పెన్షనర్ ఐడీ కార్డు / పెన్షన్ ఉత్తర్వులు
• జనన ధృవీకరణ పత్రం
• పాస్‌పోర్ట్
• పదో తరగతి లేదా ఇతర విద్యా ధృవీకరణ పత్రాలు
• శాశ్వత నివాస ధృవీకరణ పత్రం
• OBC / SC / ST కుల ధృవీకరణ పత్రం
• నేషనల్ రిజిస్టర్ ఆఫ్ సిటిజన్స్ (NRC) పత్రాలు
• కుటుంబ రిజిస్టర్
• ప్రభుత్వం జారీ చేసిన భూమి లేదా ఇంటి కేటాయింపు పత్రాలు

కీలక తేదీలు ఇవే
జూన్ 25 – జులై 24, 2026: ఇంటింటి సర్వే, ఎన్యూమరేషన్ ఫారమ్ పంపిణీ
జులై 31, 2026: ముసాయిదా ఓటర్ల జాబితా ప్రచురణ
జులై 31 – ఆగస్టు 30: క్లెయిమ్‌లు, అభ్యంతరాల స్వీకరణ
జులై 31 – సెప్టెంబర్ 28: నోటీసులు, విచారణ, ఫిర్యాదుల పరిష్కారం
అక్టోబర్ 1, 2026: తుది ఓటర్ల జాబితా ప్రచురణ

ఈ ప్రత్యేక సవరణ ద్వారా ఓటర్ల జాబితాను మరింత పారదర్శకంగా, ఖచ్చితంగా రూపొందించాలన్నదే ఎన్నికల సంఘం లక్ష్యంగా కనిపిస్తోంది. అయితే కొత్త విధానంపై ప్రజల్లో అవగాహన పెంచడం, అవసరమైన పత్రాలను సులభంగా అందుబాటులో ఉంచడం కూడా అంతే కీలకంగా మారనుంది.