అపోలో ఆస్పత్రి ఉండగానే కోయంబత్తూరు వెళ్లడంపై చర్చ.

మెగా పవర్ స్టార్ రామ్ చరణ్కు కోయంబత్తూరులోని ప్రముఖ గంగా హాస్పిటల్‌లో మణికట్టు శస్త్రచికిత్స విజయవంతంగా పూర్తైంది. ‘పెద్ది‘ సినిమా షూటింగ్ సందర్భంగా ఆయన మణికట్టుకు గాయమవడంతో వైద్యులు పరీక్షలు నిర్వహించారు.

మొదట కొద్ది రోజుల విశ్రాంతితో సమస్య తగ్గుతుందని భావించినప్పటికీ, గాయం తీవ్రత ఎక్కువగా ఉండటంతో చివరకు శస్త్రచికిత్స చేయాలని వైద్యులు నిర్ణయించినట్లు సమాచారం.

రెండు నెలలు విశ్రాంతి.. ఫిజియోథెరపీ కూడా అవసరం

సోమవారం (జూలై 27) జరిగిన సర్జరీ విజయవంతంగా పూర్తయిందని సమాచారం. వైద్యులు రామ్ చరణ్‌కు కనీసం రెండు నెలల పాటు విశ్రాంతి తీసుకోవాలని సూచించినట్లు తెలుస్తోంది.

అలాగే మణికట్టు పూర్తిగా కోలుకునేందుకు ఫిజియోథెరపీ కూడా తప్పనిసరిగా చేయాలని వైద్య బృందం సూచించినట్లు సినీ వర్గాల్లో చర్చ జరుగుతోంది.

అపోలో ఉండగా గంగా హాస్పిటల్ ఎందుకు?

రామ్ చరణ్ భార్య ఉపాసన కొనిదెల కుటుంబానికి చెందిన అపోలో హాస్పిటల్స్ దేశంలోనే ప్రముఖ వైద్య సంస్థల్లో ఒకటి. అంతేకాకుండా కామినేని ఆస్పత్రులు కూడా వారి కుటుంబానికి చెందినవే. ప్రస్తుతం ఉపాసన అపోలో గ్రూప్‌లో కీలక బాధ్యతలు నిర్వహిస్తున్నారు.

ఈ నేపథ్యంలో హైదరాబాద్‌లోనే అత్యాధునిక వైద్య సదుపాయాలు అందుబాటులో ఉన్నప్పటికీ, రామ్ చరణ్ కోయంబత్తూరుకు వెళ్లడం సోషల్ మీడియాలో చర్చనీయాంశంగా మారింది. దీనిపై అనేక ఊహాగానాలు కూడా వినిపించాయి.

గంగా హాస్పిటల్ ప్రత్యేకత ఇదే

రామ్ చరణ్ గంగా హాస్పిటల్‌ను ఎంచుకోవడానికి ప్రధాన కారణం అక్కడి వైద్య నిపుణుల ప్రత్యేక అనుభవమేనని తెలుస్తోంది. ముఖ్యంగా ఆర్థోపెడిక్‌, హ్యాండ్ సర్జరీ, మణికట్టు శస్త్రచికిత్సలు, స్పోర్ట్స్ ఇంజరీ చికిత్సల్లో ఈ ఆస్పత్రికి జాతీయ, అంతర్జాతీయ స్థాయిలో మంచి గుర్తింపు ఉంది.

క్లిష్టమైన చేతి ఎముకలు, నరాలు, కండరాలకు సంబంధించిన మైక్రో సర్జరీల్లో ఈ ఆస్పత్రి నిపుణులు ప్రత్యేక అనుభవం కలిగి ఉండటంతోనే రామ్ చరణ్ కుటుంబం ఈ ఆస్పత్రిని ఎంపిక చేసినట్లు సమాచారం.

ప్రపంచస్థాయి వైద్యుల పర్యవేక్షణలో చికిత్స

రామ్ చరణ్‌కు శస్త్రచికిత్స చేసిన డాక్టర్ ప్రవీణ్ భరద్వాజ్ హ్యాండ్ సర్జరీలో నిపుణుడిగా పేరుపొందారు. అలాగే చికిత్సలో భాగమైన డాక్టర్ ఎన్. రాజశేఖరన్ కూడా ఆర్థోపెడిక్ రంగంలో అంతర్జాతీయ గుర్తింపు పొందిన వైద్యుడిగా గుర్తింపు పొందారు.

ఇలాంటి ప్రత్యేక నైపుణ్యం కలిగిన వైద్య బృందం అందుబాటులో ఉండటంతోనే కోయంబత్తూరులోని గంగా హాస్పిటల్‌ను ఎంపిక చేసినట్లు తెలుస్తోంది.

అపోలోలోనూ నిపుణులు ఉన్నా…

అపోలో హాస్పిటల్స్‌లో కూడా ప్రపంచస్థాయి ఆర్థోపెడిక్ వైద్యులు ఉన్న విషయం తెలిసిందే. అయితే మణికట్టు వంటి అత్యంత సున్నితమైన భాగాలకు సంబంధించిన మైక్రో సర్జరీలో ప్రత్యేక అనుభవం ఉన్న నిపుణులతో చికిత్స చేయించాలనే ఉద్దేశంతో గంగా హాస్పిటల్‌ను ఎంచుకున్నట్లు సినీ వర్గాలు చెబుతున్నాయి.

వైద్య చికిత్సలో అత్యుత్తమ నిపుణులను ఎంపిక చేయడం సాధారణ ప్రక్రియ అని, అందుకే కుటుంబానికి చెందిన ఆస్పత్రి కాకుండా ప్రత్యేక నైపుణ్యం ఉన్న కేంద్రాన్ని ఎంచుకున్నట్లు సమాచారం.