Khammam Ganesh Nimajjanam: కాంగ్రెస్ పాలనలో ఖమ్మం నగరంలో వినాయక నిమజ్జనానికి సైతం నీటి కరువు ఏర్పడిందని స్థానికులు మండిపడుతున్నారు. బీఆర్ఎస్ ప్రభుత్వ హయాంలో మున్నేరు నదిపై నిర్మించిన చెక్ డ్యామ్లను తొలగించడంతోనే ఈ పరిస్థితి వచ్చిందని ఆరోపిస్తున్నారు. గతంలో నిమజ్జనాలకు అనువుగా ఉన్న ప్రాంతాల్లో ప్రస్తుతం చుక్క నీరు కూడా లేకపోవడంతో అధికారులు ప్రత్యామ్నాయ నీటి వనరుల కోసం అన్వేషించాల్సిన పరిస్థితి ఏర్పడింది.
నిమజ్జన ఘాట్లో నీళ్లు కరువు
ఖమ్మం నగరంలోని పాత వంతెన సమీపంలో ఉన్న నిమజ్జన ఘాట్ వద్ద ప్రతి ఏటా గణేష్ విగ్రహాలను సంప్రదాయబద్ధంగా నిమజ్జనం చేసేవారు. వందలాది విగ్రహాలు తరలిరావడంతో పాటు వేలాది మంది భక్తులు నిమజ్జన కార్యక్రమాన్ని తిలకించేవారు. అయితే ప్రస్తుతం మున్నేరులో నీటి ప్రవాహం లేకపోవడంతో ఈసారి నిమజ్జనం ఎక్కడ నిర్వహించాలనే ప్రశ్న తలెత్తింది.
గతంలో మున్నేరు నదిపై నిర్మించిన చెక్ డ్యామ్ల కారణంగా నీరు నిల్వ ఉండేదని స్థానికులు గుర్తుచేస్తున్నారు. ప్రకాశ్ నగర్ బ్రిడ్జి సమీపంలో నిర్మించిన చెక్ డ్యామ్ వల్ల నదిలో నీరు నిల్వ ఉండటంతో పాటు చుట్టుపక్కల ప్రాంతాల్లో భూగర్భ జలాలు కూడా అందుబాటులో ఉండేవని చెబుతున్నారు. త్రీ టౌన్ ప్రాంతంలో బోర్లు, బావుల్లో నీటి లభ్యతకు ఈ నీటి నిల్వలు దోహదపడేవని పేర్కొంటున్నారు.
అలాగే కాల్వ ఒడ్డు సమీపంలోని స్మశానవాటిక వెనుక సుమారు రెండు దశాబ్దాల క్రితం నిర్మించిన మరో చెక్ డ్యామ్ వల్ల పాత వంతెన సమీపంలోని నిమజ్జన ఘాట్ వద్ద నీరు నిల్వ ఉండేదని స్థానికులు చెబుతున్నారు. గణేష్ నిమజ్జనాలు, బతుకమ్మల నిమజ్జనాలతో పాటు ఇతర సంప్రదాయ కార్యక్రమాలకు కూడా ఈ ప్రాంతాన్ని వినియోగించేవారు.
వరదల సాకుతో కూల్చివేత?
2023లో వచ్చిన వరదలను సాకుగా చూపి చెక్ డ్యామ్లను తొలగించారని స్థానికులు ఆరోపిస్తున్నారు. కొత్తగా నిర్మిస్తున్న రిటైనింగ్ వాల్స్, వంతెనలకు ప్రమాదం పొంచి ఉందనే కారణంతో ప్రజలకు ఉపయోగపడే నీటి నిల్వ నిర్మాణాలను తొలగించారని విమర్శిస్తున్నారు.
చెక్ డ్యామ్లు బీఆర్ఎస్ ప్రభుత్వ హయాంలో నిర్మించినవనే కారణంతోనే రాజకీయ కక్షతో వాటిని కూల్చివేశారని అప్పట్లో ఆ పార్టీ నేతలు ఆరోపించిన విషయాన్ని స్థానికులు ప్రస్తావిస్తున్నారు. సరైన ప్రత్యామ్నాయ ప్రణాళిక లేకుండా నిర్మాణాలను తొలగించడం వల్లే ప్రస్తుతం నీటి సమస్య తలెత్తిందని అంటున్నారు.
నిమజ్జనానికి ప్రత్యామ్నాయ ప్రాంతాల పరిశీలన
మున్నేరులో నీళ్లు లేకపోవడంతో అధికారులు ఖమ్మం చుట్టుపక్కల ఉన్న నీటి వనరులను పరిశీలిస్తున్నారు. ధంసలాపురం చెరువుతో పాటు తీర్థాల, కామంచి ప్రాంతాల సమీపంలోని చెక్ డ్యామ్ల వద్ద నిమజ్జనం నిర్వహించే అవకాశాలను పరిశీలిస్తున్నట్లు తెలుస్తోంది.
అయితే గ్రామీణ ప్రాంతాల్లోని చెరువుల్లో గణేష్ విగ్రహాల నిమజ్జనంపై స్థానికుల నుంచి అభ్యంతరాలు వ్యక్తమవుతున్నాయి. ముఖ్యంగా ప్లాస్టర్ ఆఫ్ పారిస్ విగ్రహాల నిమజ్జనం వల్ల నీరు కలుషితమయ్యే అవకాశం ఉందని, పంటలకు, పశువుల తాగునీటికి ఇబ్బందులు తలెత్తవచ్చని వారు అధికారుల దృష్టికి తీసుకొస్తున్నారు. గ్రామ చెరువుల్లో నిమజ్జనాలు నిర్వహించవద్దని కొందరు గ్రామస్థులు విజ్ఞప్తి చేస్తున్నట్లు సమాచారం.
వర్షాలు లేకపోతే నీటి నిల్వలను ఎందుకు తొలగించారు?
ఎల్నినో ప్రభావం కారణంగా వర్షాలు తక్కువగా ఉండే అవకాశం ఉందని ముందుగానే అంచనాలు ఉన్నప్పటికీ, నీటి నిల్వలను కాపాడుకోకుండా చెక్ డ్యామ్లను ఎందుకు తొలగించారని స్థానికులు ప్రశ్నిస్తున్నారు. వర్షాలు కురవని పరిస్థితుల్లో మున్నేరులో వరదలు వచ్చే అవకాశం తక్కువగా ఉన్నప్పటికీ, ఉన్న నీటిని నిల్వ చేసుకునే నిర్మాణాలను తొలగించడం ఎంతవరకు సమంజసమని నిలదీస్తున్నారు.
“గతంలో కరకట్ట, చెక్ డ్యామ్ల వల్ల మున్నేరులో నీరు నిల్వ ఉండేది. నిమజ్జనాలకు ఎలాంటి ఇబ్బంది ఉండేది కాదు. ఇప్పుడు నది మొత్తం ఎండిపోయి, గుర్రపు డెక్కలు, చెత్తాచెదారంతో నిండిపోయింది. విగ్రహాలను ధంసలాపురం వైపు తీసుకెళ్లి నిమజ్జనం చేయాల్సిన పరిస్థితి ఏర్పడింది.”
అని స్థానికులు ఆవేదన వ్యక్తం చేస్తున్నారు.
భూగర్భ జలాలపైనా ప్రభావం
చెక్ డ్యామ్ల తొలగింపుతో మున్నేరు పరిసర ప్రాంతాల్లో భూగర్భ జలాలు తగ్గిపోతున్నాయని స్థానికులు చెబుతున్నారు. త్రీ టౌన్, ప్రకాశ్ నగర్ ప్రాంతాల్లో బోర్లు, బావుల్లో నీటి లభ్యత క్రమంగా తగ్గుతోందని, భవిష్యత్తులో తాగునీటి సమస్య మరింత తీవ్రమయ్యే అవకాశం ఉందని ఆందోళన వ్యక్తం చేస్తున్నారు.
బీఆర్ఎస్ ప్రభుత్వ హయాంలో మాజీ మంత్రి పువ్వాడ అజయ్ కుమార్ ఆధ్వర్యంలో నిర్మించిన చెక్ డ్యామ్లకు పేరు వస్తుందనే రాజకీయ ఉద్దేశంతోనే వాటిని తొలగించారని కొందరు స్థానికులు ఆరోపిస్తున్నారు. రాజకీయ విభేదాల ప్రభావం ప్రజలపై, ఇప్పుడు భగవంతుడి కార్యక్రమమైన గణేష్ నిమజ్జనంపైనా పడిందని విమర్శిస్తున్నారు.
మున్నేరులో నీరు లేకపోవడం, ప్రత్యామ్నాయ చెరువుల్లో నిమజ్జనానికి అభ్యంతరాలు వ్యక్తమవుతుండటంతో జిల్లా అధికారులు సమస్య పరిష్కారానికి మార్గాలను అన్వేషిస్తున్నారు. నిమజ్జన ఏర్పాట్లపై త్వరితగతిన స్పష్టత ఇవ్వాలని భక్తులు, ప్రజలు కోరుతున్నారు.
