Delhi EV Policy: కొత్త ఈవీ కొనేవారికి పండగే.. ఏకంగా రూ. 30,000 సబ్సిడీ ప్రకటించిన కేబినెట్

ఢిల్లీలో ఎలక్ట్రిక్ టూ-వీలర్ల విప్లవం: 2028 నుండి సరికొత్త రూల్స్

దేశ రాజధాని ఢిల్లీలో వాయు కాలుష్యాన్ని అదుపు చేయడానికి మరియు పర్యావరణహిత రవాణాను ప్రోత్సహించడానికి ఢిల్లీ ప్రభుత్వం సోమవారం నాడు సరికొత్త ఎలక్ట్రిక్ వెహికల్ (EV) పాలసీకి ఆమోదం తెలిపింది. ఈ కొత్త విధానం ద్వారా ఎలక్ట్రిక్ ద్విచక్ర వాహనాల (టూ-వీలర్స్) వాడకాన్ని విపరీతంగా పెంచాలని ప్రభుత్వం లక్ష్యంగా పెట్టుకుంది. ఇందుకోసం భారీ కొనుగోలు రాయితీలు, మౌలిక వసతుల కల్పన మరియు కఠినమైన రిజిస్ట్రేషన్ నిబంధనలను తీసుకువచ్చింది.

ఈ పాలసీలోని అత్యంత కీలకమైన అంశం ఏమిటంటే.. ఏప్రిల్ 1, 2028 నుండి ఢిల్లీలో కేవలం ఎలక్ట్రిక్ ద్విచక్ర వాహనాలకు మాత్రమే కొత్తగా రిజిస్ట్రేషన్లు (Fresh Registration) చేస్తారు. అంటే ఆ తేదీ తర్వాత పెట్రోల్ బైకులు, స్కూటర్ల కొత్త రిజిస్ట్రేషన్లు పూర్తిగా నిలిచిపోతాయి. అయితే, ప్రస్తుతం ఉన్న పాత పెట్రోల్, డీజిల్ వాహనాలను ప్రస్తుత నిబంధనల ప్రకారం యథావిధిగా వాడుకోవచ్చని ప్రభుత్వం స్పష్టం చేసింది.

వాహనాల వారీగా లభించే సబ్సిడీల వివరాలు:

కొత్త ఈవీ పాలసీ కింద వాహనదారులను ప్రోత్సహించడానికి ప్రభుత్వం భారీగా నగదు రాయితీలను (Purchase Incentives) ప్రకటించింది.

ఎలక్ట్రిక్ టూ-వీలర్స్: ఈవీ బైక్ లేదా స్కూటర్ కొనుగోలు చేసే వారికి మొదటి ఏడాది రూ. 30,000, రెండో ఏడాది రూ. 20,000, మరియు మూడో ఏడాది రూ. 10,000 చొప్పున సబ్సిడీ లభిస్తుంది.

ఎలక్ట్రిక్ త్రీ-వీలర్స్: ఆటోల కొనుగోలుపై మొదటి ఏడాది గరిష్టంగా రూ. 50,000 వరకు సబ్సిడీ అందజేస్తారు.

కమర్షియల్ వాహనాలు (N1 Trucks): పారిశ్రామిక, రవాణా అవసరాలకు వాడే ఎలక్ట్రిక్ సరుకు రవాణా ట్రక్కులపై ఏకంగా రూ. 1 లక్ష ఇన్సెంటివ్ లభిస్తుంది.

స్క్రాపేజ్ ఇన్సెంటివ్స్: పాత కాలుష్య కారక బీఎస్-IV (BS IV) వాహనాలను తుక్కుగా మార్చి కొత్త ఈవీలను ఎంచుకునే వారికి ప్రత్యేకంగా స్క్రాపేజ్ రాయితీలను కూడా ప్రకటించారు.

32,000 చార్జింగ్ పాయింట్లు.. రూ. 15,000 కోట్ల బడ్జెట్

ఢిల్లీ రవాణా శాఖ కమిషనర్ నిహారిక తెలిపిన వివరాల ప్రకారం.. ఢిల్లీ నగర కాలుష్యంలో కమర్షియల్ గూడ్స్ వాహనాల వాటా 33 శాతంగా ఉంటే, టూ-వీలర్స్ మరియు త్రీ-వీలర్స్ వాటా 46 శాతంగా ఉంది. అందుకే ప్రభుత్వం ఈ విభాగాలపై ప్రత్యేక దృష్టి సారించింది. ఈ పాలసీని సమర్థవంతంగా అమలు చేయడానికి ప్రభుత్వం రూ. 15,000 కోట్లను కేటాయించింది. వాహనదారులకు చార్జింగ్ సమస్యలు తలెత్తకుండా ఉండటం కోసం కేంద్ర ప్రభుత్వ ‘పీఎం ఈ-డ్రైవ్’ (PM eDrive) పథకం మరియు రాష్ట్ర నిధుల సహాయంతో రాబోయే నాలుగేళ్లలో ఏకంగా 32,000 చార్జింగ్ పాయింట్లను ఏర్పాటు చేయాలని ప్రభుత్వం ప్రణాళికలు సిద్ధం చేసింది.

ఈవీ పరిశ్రమ హర్షం: “ఐసీఈ వాహనాల ముగింపునకు నాంది”

ఢిల్లీ ప్రభుత్వ చారిత్రాత్మక నిర్ణయంపై ఎలక్ట్రిక్ వాహనాల తయారీ సంస్థలైన ఏథర్ ఎనర్జీ, ఓలా ఎలక్ట్రిక్, టీవీఎస్ మోటార్ కంపెనీ, బజాజ్ ఆటో మరియు అల్ట్రావైలెట్ ఆటోమోటివ్ సంతోషం వ్యక్తం చేశాయి. ఢిల్లీ దేశంలోనే అతిపెద్ద టూ-వీలర్ మార్కెట్లలో ఒకటి కావడం వల్ల ఈ పాలసీ ఈవీ రంగానికి దీర్ఘకాలిక భరోసా ఇస్తుందని కంపెనీలు భావిస్తున్నాయి.

తరుణ్ మెహతా (ఏథర్ ఎనర్జీ కో-ఫౌండర్ & సీఈఓ): “భారతదేశంలోనే అత్యంత ప్రతిష్టాత్మకమైన సిటీ-లెవెల్ ఈవీ పాలసీలలో ఇది ఒకటి. రాయితీలు, దశలవారీ ఎలక్ట్రిఫికేషన్ మరియు చార్జింగ్ మౌలిక వసతుల సమ్మేళనం ఈ రంగానికి గట్టి పునాది వేస్తుంది. ఢిల్లీ మెజారిటీ ఈవీ మార్కెట్‌గా మారితే, అది మిగిలిన దేశానికి రోల్ మోడల్‌గా నిలుస్తుంది” అని ‘X’ వేదికగా పేర్కొన్నారు.

నారాయణ్ సుబ్రమణియన్ (అల్ట్రావైలెట్ ఆటోమోటివ్ సీఈఓ): ధరతో సంబంధం లేకుండా అందరికీ సమానంగా ఇన్సెంటివ్స్ ఇవ్వడం వల్ల వినియోగదారులు రేంజ్, టెక్నాలజీ మరియు డిజైన్ ఆధారంగా నచ్చిన బ్రాండ్‌ను ఎంచుకునే అవకాశం లభిస్తుందన్నారు. చార్జింగ్ మౌలిక వసతులపై దృష్టి పెట్టడం అభినందనీయమన్నారు.

అనురాగ్ మెహ్రోత్రా (జేఎస్‌డబ్ల్యూ ఎంజీ మోటార్ ఇండియా ఎండీ): ప్రతిపాదిత స్క్రాపేజ్ విధానం పాత వాహనాల స్థానంలో కొత్త ఈవీల కొనుగోలును పెంచుతుందని, దీనివల్ల గాలి నాణ్యత మెరుగుపడటంతో పాటు క్రూడాయిల్ (కనిజ నూనె) దిగుమతులపై భారం తగ్గుతుందని ఆశాభావం వ్యక్తం చేశారు.

భవిష్ అగర్వాల్ (ఓలా ఎలక్ట్రిక్ వ్యవస్థాపకుడు): ఈ విధానం సాంప్రదాయ ఐసీఈ (ఇంటర్నల్ కంబషన్ ఇంజన్ – పెట్రోల్/డీజిల్) వాహనాల ముగింపునకు నాంది అని గతంలోనే ప్రశంసించారు.

రేఖా గుప్తా నేతృత్వంలోని కేబినెట్ ఆమోదించిన ఈ సరికొత్త ఈవీ పాలసీ జూలై 1, 2026 నుండి అమల్లోకి రానుంది. ఇది మార్చి 31, 2030 వరకు చట్టబద్ధంగా అమలులో ఉంటుంది.

Also read: Indian Railways Rules 2026: జూలై 2026 నుండి ఇండియన్ రైల్వేస్ కొత్త రూల్స్.. టికెట్ లేని ప్రయాణం, మహిళల కోచ్ లపై భారీ జరిమానాలు!