Global Food Exporters | ప్రపంచ ఆహార ఎగుమతుల్లో అగ్రదేశాల జాబితాను పరిశీలిస్తే అమెరికా మరోసారి మొదటి స్థానాన్ని నిలబెట్టుకుంది. ప్రపంచ వాణిజ్య సంస్థ (డబ్ల్యూటీఓ) విడుదల చేసిన 2024 గణాంకాల ప్రకారం వ్యవసాయ ఉత్పత్తులను అత్యధికంగా ఎగుమతి చేస్తున్న దేశాల్లో అమెరికా, బ్రెజిల్, చైనా ముందంజలో ఉన్నాయి. ఈ జాబితాలో భారత్ కూడా టాప్-10లో చోటు సంపాదించడం విశేషం. ప్రపంచ ఆహార సరఫరా వ్యవస్థ కొన్ని దేశాల ఆధిపత్యంలోనే కొనసాగుతోందని నివేదిక స్పష్టం చేసింది. 2024 సంవత్సరంలో అమెరికా 181.3 బిలియన్ డాలర్ల విలువైన వ్యవసాయ ఉత్పత్తులను ఎగుమతి చేసి అగ్రస్థానంలో నిలిచింది. దానికి సమీపంగా బ్రెజిల్ 144.4 బిలియన్ డాలర్ల ఎగుమతులతో రెండో స్థానాన్ని దక్కించుకోగా, చైనా 74.8 బిలియన్ డాలర్లతో మూడో స్థానంలో నిలిచింది. వ్యవసాయ రంగంలో వేగంగా ఎదుగుతున్న భారత్ 45.5 బిలియన్ డాలర్ల ఎగుమతులతో ఎనిమిదో స్థానంలో నిలవడం గమనార్హం. భారత కరెన్సీలో ఇది దాదాపు రూ.3.8 లక్షల కోట్లకు సమానం. ప్రపంచ ఆహార ఎగుమతుల్లో భారత్ వాటా సుమారు 3 శాతంగా నమోదైంది.
Read Also : పాకిస్తాన్ పోలికపై పొన్నం ఆగ్రహం – చంద్రబాబుకు లేఖ
ప్రపంచవ్యాప్తంగా ఆహార ఎగుమతుల మార్కెట్ విలువ ప్రస్తుతం సుమారు 1.5 ట్రిలియన్ డాలర్లుగా అంచనా వేస్తున్నారు. ఇందులో 80 శాతానికి పైగా ఎగుమతులు కేవలం 30 దేశాల నుంచే జరుగుతున్నాయి. ముఖ్యంగా అమెరికా, బ్రెజిల్, కెనడా, మెక్సికో దేశాలు కలిపి దాదాపు మూడో వంతు మార్కెట్ను నియంత్రిస్తున్నాయి. దీంతో అంతర్జాతీయ ఆహార సరఫరా వ్యవస్థలో ఈ దేశాల ప్రభావం మరింత పెరిగినట్లు విశ్లేషకులు చెబుతున్నారు. ఇటీవలి కాలంలో పెరుగుతున్న రవాణా ఖర్చులు, ఎరువుల ధరల పెరుగుదల, భౌగోళిక రాజకీయ ఉద్రిక్తతలు వంటి అంశాలు ప్రపంచ ఆహార వాణిజ్యంపై ప్రత్యక్ష ప్రభావం చూపుతున్నాయి. దీంతో వ్యవసాయ ఎగుమతులు ఇప్పుడు కేవలం వాణిజ్య అంశంగా కాకుండా వ్యూహాత్మక రంగంగా కూడా మారుతున్నాయి. భారీ స్థాయిలో వ్యవసాయ ఉత్పత్తులు పండించే చైనా, తన ఉత్పత్తుల్లో ఎక్కువ భాగాన్ని దేశీయ వినియోగానికే మళ్లించడం వల్ల ఎగుమతుల్లో అగ్రస్థానాన్ని అందుకోలేకపోయింది.
Read Also : ఏపీలో దేశ తొలి ప్రైవేట్ బంగారు గని – కర్నూలు జొన్నగిరిలో చారిత్రక ప్రారంభం
ప్రపంచ టాప్-15 ఆహార ఎగుమతి దేశాలు
అమెరికా – 181.3 బిలియన్ డాలర్లు (12.1శాతం)
బ్రెజిల్ – 144.4 బిలియన్ డాలర్లు (9.7శాతం)
చైనా – 74.8 బిలియన్ డాలర్లు (5.0శాతం)
కెనడా – 66.3 బిలియన్ డాలర్లు (4.4శాతం)
మెక్సికో – 49.9 బిలియన్ డాలర్లు (3.3శాతం)
ఇండోనేషియా – 49.7 బిలియన్ డాలర్లు (3.3శాతం)
ఆస్ట్రేలియా – 45.8 బిలియన్ డాలర్లు (3.1శాతం)
భారత్ – 45.5 బిలియన్ డాలర్లు (3.శాతం)
థాయ్లాండ్ – 41.8 బిలియన్ డాలర్లు (2.8శాతం)
ఫ్రాన్స్ – 38.7 బిలియన్ డాలర్లు (2.6శాతం)
నెదర్లాండ్స్ – 37.3 బిలియన్ డాలర్లు (2.5శాతం)
అర్జెంటీనా – 34.8 బిలియన్ డాలర్లు (2.3శాతం)
మలేషియా – 33.5 బిలియన్ డాలర్లు (2.2శాతం)
టర్కియే – 31.4 బిలియన్ డాలర్లు (2.1శాతం)
యునైటెడ్ కింగ్డమ్ – 30.9 బిలియన్ డాలర్లు (2.1శాతం)
Read Also : ఉపాధి హామీ పనుల్లో నిర్లక్ష్యం వద్దు – కలెక్టర్ హెచ్చరిక
