Mukul Choudhary IPL Record: ఓటమి అంచుల్లో ఉన్న లక్నో జట్టును 21 ఏళ్ల ముకుల్ చౌదరి తన అద్భుత ఆటతో గెలిపించాడు. చివరి ఐదు ఓవర్లలోనే 53 పరుగులు చేసి అరుదైన ఘనత సాధించాడు. ఆయన సునామి ఇన్నింగ్స్తో లక్నో తమ ఖాతాలో మరో విజయాన్ని నమోదు చేసుకుంది.
ఐపీఎల్ చరిత్రలో ఎన్నో అద్భుత ప్రదర్శనలు జరిగినా, తాజాగా జరిగిన మ్యాచ్లో ముకుల్ చౌదరి చేసిన ఇన్నింగ్స్ ప్రత్యేకంగా నిలిచింది. విరాట్ కోహ్లీ, రోహిత్ శర్మ, ఎంఎస్ ధోనీ వంటి దిగ్గజాలు కూడా సాధించని రికార్డును ఈ యువ ఆటగాడు తన ఖాతాలో వేసుకున్నాడు.
లక్నో జట్టు, కోల్కతా జట్టు మధ్య జరిగిన ఉత్కంఠభరిత పోరులో 182 పరుగుల లక్ష్యంతో బరిలోకి దిగిన లక్నో జట్టు ఒక దశలో 128 పరుగులకే 7 వికెట్లు కోల్పోయి పూర్తిగా కష్టాల్లో పడింది. ఆ సమయంలో కోల్కతా విజయం ఖాయమని అందరూ భావించారు.
మ్యాచ్ స్వరూపాన్ని మార్చేసిన ముకుల్..
అయితే ఏడవ స్థానంలో బ్యాటింగ్కు వచ్చిన ముకుల్ చౌదరి మ్యాచ్ను పూర్తిగా మార్చేశాడు. కేవలం 27 బంతుల్లో 2 ఫోర్లు, 7 సిక్సర్లతో 54 పరుగులు చేసి అజేయంగా నిలిచాడు. ఇందులో 53 పరుగులు చివరి ఐదు ఓవర్లలో రావడం విశేషం.
సక్సెస్ఫుల్ లక్ష్య ఛేదనలో చివరి ఐదు ఓవర్లలో 50కి పైగా పరుగులు చేసిన తొలి భారతీయ ఆటగాడిగా ముకుల్ చౌదరి నిలిచాడు. ఇంతకుముందు ఈ ఘనతను కీరన్ పోలార్డ్, ఏబీ డివిలియర్స్ మాత్రమే సాధించారు.
ధోనీ స్టైల్ షాట్
ముకుల్ ప్రారంభంలో నెమ్మదిగా ఆడినా, తర్వాత ఒక్కసారిగా దూకుడును పెంచాడు. ముఖ్యంగా వైభవ్ అరోరా బౌలింగ్లో ఆడిన హెలీకాప్టర్ షాట్ ప్రేక్షకులను ఆకట్టుకుంది. ఆ షాట్ ఎంఎస్ ధోనీని గుర్తు చేసింది.
చివరి ఓవర్లో 14 పరుగులు అవసరమైన సమయంలో కూడా ముకుల్ ఒత్తిడిని అద్భుతంగా ఎదుర్కొన్నాడు. ఐదో బంతికి సిక్సర్ బాది స్కోరు సమం చేసి, చివరి బంతికి ఒక పరుగు తీసి జట్టుకు చిరస్మరణీయ విజయాన్ని అందించాడు.
జట్టు ప్రదర్శన
ముందుగా బ్యాటింగ్ చేసిన కోల్కతా జట్టు 181 పరుగులు చేసింది. లక్నో తరపున అయుష్ బదోని 54 పరుగులతో కీలక పాత్ర పోషించాడు. కోల్కతా బౌలర్లలో వైభవ్ అరోరా, అనుకూల్ రాయ్ రెండేసి వికెట్లు తీశారు.
ఈ విజయంతో లక్నో జట్టు తన స్థానాన్ని బలపరుచుకుంది. మరోవైపు కోల్కతాకు ఇది మరో ఓటమిగా నిలిచింది. మొత్తానికి, ముకుల్ చౌదరి ఇన్నింగ్స్ ఐపీఎల్ చరిత్రలో చిరస్థాయిగా నిలిచిపోతుంది.
Also read: అభిమానితో సెల్ఫీ… పగిలిన ఫోన్ చూసి రూ.40 వేల స్మార్ట్ఫోన్ గిఫ్ట్గా ఇచ్చిన సంజూ శాంసన్
