మున్సిపల్ ఎన్నికల వేళ మేడ్చల్‌లో ఉద్రిక్తత… కాంగ్రెస్‌పై మల్లారెడ్డి ఆరోపణలు, దాడిని ఖండించిన కేటీఆర్

Medchal Municipal Elections Clash

తెలంగాణ రాష్ట్రంలో మున్సిపల్ ఎన్నికల ప్రచారం వేడెక్కుతున్న నేపథ్యంలో మేడ్చల్ జిల్లాలో రాజకీయ ఉద్రిక్తత నెలకొంది. బీఆర్ఎస్ మాజీమంత్రి, ఎమ్మెల్యే మల్లారెడ్డి తమపై కాంగ్రెస్ పార్టీ నాయకులు, కార్యకర్తలు దాడికి పాల్పడ్డారని ఆరోపించారు. అలియాబాద్ మున్సిపాలిటీ పరిధిలో ఎన్నికల ప్రచారంలో భాగంగా సమావేశం నిర్వహిస్తుండగా ఈ ఘటన చోటుచేసుకుందని తెలిపారు. ఈ సందర్భంగా కాంగ్రెస్ నాయకుల ప్రవర్తనపై తీవ్ర అసంతృప్తి వ్యక్తం చేసిన మల్లారెడ్డి, “నన్ను కూడా చంపేస్తారేమో అనిపించింది” అంటూ వాపోయారు.

మల్లారెడ్డి వివరాల ప్రకారం, తమ పార్టీ కౌన్సిలర్లు, నాయకులతో కలిసి ఓ ఇంట్లో సమావేశం నిర్వహిస్తుండగా డీసీసీ అధ్యక్షుడు వజ్రేష్ యాదవ్ కావాలనే డీజే వాహనం తెచ్చి అధిక శబ్దంతో పాటలు పెట్టించి సమావేశాన్ని డిస్టర్బ్ చేశారని ఆరోపించారు. సౌండ్ తగ్గించాలని కోరినందుకు తమ కార్యకర్తలపై కాంగ్రెస్ అనుచరులు దాడి చేశారని పేర్కొన్నారు. ప్రజల్లో ఆదరణ లేకపోవడంతోనే ఇలాంటి చర్యలకు పాల్పడుతున్నారని ఆయన విమర్శించారు.

ఘటనకు సంబంధించిన వివరాలు:

• మేడ్చల్ జిల్లా అలియాబాద్ మున్సిపాలిటీ పరిధిలో ఘటన చోటుచేసుకుంది.
• బీఆర్ఎస్ పార్టీకి చెందిన శ్రీనివాస్ రెడ్డి నివాసంలో మల్లారెడ్డి సమావేశం ఏర్పాటు చేశారు.
• అదే సమయంలో కాంగ్రెస్ కార్యకర్తలు డీజే వాహనంతో అక్కడికి రావడం జరిగింది.
• శబ్దం ఎక్కువగా ఉందని బీఆర్ఎస్ నేతలు అభ్యంతరం వ్యక్తం చేశారు.
• సౌండ్ తగ్గించాలని కోరగా ఇరు పార్టీల మధ్య వాగ్వాదం చెలరేగింది.
• ఘర్షణలో బీఆర్ఎస్ నేత ఢిల్లీ పరమేశ్ తలకు గాయాలు అయినట్లు సమాచారం.
• కాంగ్రెస్ శ్రేణులు దాడికి పాల్పడ్డారని మల్లారెడ్డి ఆరోపించారు

కేటీఆర్ స్పంద‌న:

ఈ ఘటనపై స్పందించిన బీఆర్ఎస్ వర్కింగ్ ప్రెసిడెంట్ కేటీఆర్, కాంగ్రెస్ గూండాల దాడిని తీవ్రంగా ఖండిస్తున్నట్లు ఎక్స్ (ట్విట్టర్) వేదికగా వెల్లడించారు. అనంతరం మల్లారెడ్డికి ఫోన్ చేసి ఘటన వివరాలు అడిగి తెలుసుకున్నారు. మర్రి రాజశేఖర్ రెడ్డితో కూడా మాట్లాడి పరిస్థితిని సమీక్షించారు. వెంటనే మేడ్చల్ జిల్లా పార్టీ అధ్యక్షుడు, ఎమ్మెల్సీ రాజు శంభీపూర్, ఎమ్మెల్యే కేపీ వివేకానందలను బాధితులను పరామర్శించాలని ఆదేశించారు.

ఇదే సమయంలో జూబ్లీహిల్స్‌లో కార్పొరేటర్ దేదీప్యపై జరిగిన దాడిని కూడా కేటీఆర్ ఖండించారు. దేదీప్యతో ఫోన్‌లో మాట్లాడి ధైర్యం చెప్పారు. మాజీ మంత్రి తలసాని శ్రీనివాస్ యాదవ్‌ను ఆమెను పరామర్శించేందుకు పంపించారు. పార్టీ శ్రేణులు దేదీప్యను కలిసి సంఘీభావం తెలిపారు.

మున్సిపల్ ఎన్నికల ప్రచారం రోజురోజుకీ ఉత్కంఠభరితంగా మారుతుండగా అధికార కాంగ్రెస్, ప్రతిపక్ష బీఆర్ఎస్ మధ్య మాటల యుద్ధం, ఆరోపణలు, ప్రతిఆరోపణలు కొనసాగుతున్నాయి. ఈ పరిణామాలు ఎన్నికల వాతావరణాన్ని మరింత వేడెక్కిస్తున్నాయి.

Also Read: బీఆర్‌ఎస్ నుంచి కాంగ్రెస్‌కు వెళ్లిన ఎమ్మెల్యేలకు కీలక బాధ్యతలు… స్పీకర్ తీర్పుపై మళ్లీ సందేహాలు