మునుగోడు ఎమ్మెల్యే కోమటిరెడ్డి రాజగోపాల్ రెడ్డి మరోసారి సంచలన వ్యాఖ్యలతో వార్తల్లో నిలిచారు. రాబోయే రోజుల్లో తనకు ఖచ్చితంగా మంత్రి పదవి వస్తుందని విశ్వాసం వ్యక్తం చేసిన ఆయన, ఒకవేళ మంత్రి కాకపోతే ముఖ్యమంత్రి అవుతానంటూ స్పష్టం చేశారు. శుక్రవారం మున్సిపల్ ఎన్నికల ఫలితాలు వెలువడిన అనంతరం యాదాద్రి భువనగిరి జిల్లా చౌటుప్పల్ మున్సిపల్ కేంద్రంలో నిర్వహించిన విజయోత్సవ ర్యాలీలో ఆయన ఈ వ్యాఖ్యలు చేశారు.
అడుక్కోవడం నాకు రాదు..
ఇండియన్ నేషనల్ కాంగ్రెస్ తరఫున గెలిచిన కౌన్సిలర్ అభ్యర్థులతో కలిసి నిర్వహించిన ఈ ర్యాలీలో ఎమ్మెల్సీ నెల్లికంటి సత్యం కూడా పాల్గొన్నారు.ఈ సందర్భంగా పార్టీ కార్యకర్తలనుద్దేశించి మాట్లాడిన రాజగోపాల్ రెడ్డి, పదవుల కోసం అడుక్కోవడం తనకు రాదని స్పష్టం చేశారు. పార్టీ తనను తిరిగి చేర్చుకున్న సమయంలో ఇచ్చిన హామీ ప్రకారం మంత్రి పదవి ఇవ్వాలని తేల్చిచెప్పారు. లేదంటే తానే పదవిని సాధించుకునే పరిస్థితి రాకుండా చూడాలని హెచ్చరించారు. ఇచ్చిన మాట నిలబెట్టుకోవాల్సిందేనని, లేకపోతే తన టార్గెట్ ముఖ్యమంత్రి పదవేనని స్పష్టం చేశారు.
ఇకపై మునుగోడు నియోజకవర్గాన్ని ప్రజలు చూసుకుంటే తాను రాష్ట్రాన్ని చూసుకుంటానని వ్యాఖ్యానించారు. రాష్ట్రంలో సరైన సమయం వచ్చినప్పుడు జెండా ఎగురవేస్తామని తెలిపారు. ఈ కార్యక్రమంలో కాంగ్రెస్ ఎన్నికల కన్వీనర్ పబ్బురాజు గౌడ్, మున్సిపల్ ఎన్నికల్లో విజయం సాధించిన కౌన్సిలర్లు, ఇతర నేతలు కూడా హాజరయ్యారు. రాజకీయ వర్గాల్లో ఈ వ్యాఖ్యలు మరోసారి చర్చకు దారి తీస్తున్నాయి.
మునుగోడు ఎమ్మెల్యే కోమటిరెడ్డి రాజగోపాల్ రెడ్డి కాంగ్రెస్లో సీనియర్ నాయకుడిగా గుర్తింపు పొందిన వ్యక్తి. అయితే ప్రతిపక్షంలో ఉన్న సమయంలో ఆయన కాంగ్రెస్కు రాజీనామా చేసి భారతీయ జనతా పార్టీ లో చేరారు. అనంతరం 2023 అసెంబ్లీ ఎన్నికల సమయానికి మళ్లీ ఇండియన్ నేషనల్ కాంగ్రెస్ గూటికి చేరారు. ఆ సమయంలో తనకు మంత్రి పదవి హామీ ఇచ్చినందుకే పార్టీలోకి తిరిగి తీసుకున్నారని ఆయన తరచూ పేర్కొంటూ వస్తున్నారు. ఇదే సమయంలో ఆయన సోదరుడు కోమటిరెడ్డి వెంకట్ రెడ్డి ఇప్పటికే రాష్ట్ర కేబినెట్లో మంత్రిగా కొనసాగుతున్నారు. ప్రస్తుత రాజకీయ సమీకరణాల ప్రకారం రాజగోపాల్ రెడ్డికి మరో మంత్రి పదవి ఇవ్వడం కష్టసాధ్యమని పార్టీ వర్గాలు భావిస్తున్నప్పటికీ, తాను మాత్రం మంత్రి పదవి కావాల్సిందేనంటూ పట్టుదలతో ఉన్నారు.
అవకాశం దొరికినప్పుడల్లా..
మంత్రి పదవిని ఏదైనా సాధించాలనే లక్ష్యంతో అవకాశం దొరికినప్పుడల్లా ప్రభుత్వంపై విమర్శలు గుప్పిస్తున్నారని రాజకీయ వర్గాలు చెబుతున్నాయి. ముఖ్యంగా ముఖ్యమంత్రి రేవంత్ రెడ్డి ను టార్గెట్ చేస్తూ వ్యాఖ్యలు చేయడం ఆయన శైలిగా మారిందని విశ్లేషకులు అంటున్నారు. అయితే ఆయన వ్యాఖ్యలను పార్టీ లోపల పెద్దగా సీరియస్గా తీసుకోవడం లేదనే అభిప్రాయం కూడా వ్యక్తమవుతోంది. ఒకటి రెండు సార్లు రాష్ట్ర పార్టీ నాయకత్వం పిలిచి చర్చించినా, తన వైఖరిలో మార్పు లేకపోవడంతో విమర్శల మోత మాత్రం రోజురోజుకూ పెరుగుతూనే ఉంది. తాజాగా మున్సిపల్ ఎన్నికల ఫలితాల నేపథ్యంలో స్పందించిన రాజగోపాల్ రెడ్డి మరోసారి మంత్రి పదవి అంశాన్ని ప్రస్తావించడం రాజకీయ వర్గాల్లో చర్చనీయాంశంగా మారింది.
