Water
హైదరాబాద్: భూమిపై ఉన్న ప్రతి జీవి మనుగడకు నీరు అత్యంత ఆవశ్యకమైనది. మన శరీరంలో ఉష్ణోగ్రతను క్రమబద్ధీకరించడం, కణాలకు పోషకాలను, ఆక్సిజన్ను చేరవేయడం, జీర్ణక్రియను మెరుగుపరచడం వంటి అనేక కీలక పనులలో నీరు ప్రధాన పాత్ర పోషిస్తుంది. అయితే, నీరు ఎలా తాగాలి, ఎంత తాగాలి అనే విషయంలో మన సమాజంలో ఎన్నో అపోహలు ప్రచారంలో ఉన్నాయి. వీటిని గుడ్డిగా నమ్మడం వల్ల కొన్నిసార్లు ఆరోగ్య ప్రయోజనాల కంటే నష్టాలే ఎక్కువగా కలిగే అవకాశం ఉంది.
1. రోజుకు ఎన్ని తాగాలి? చాలా మంది రోజుకు 8 గ్లాసుల నీరు తాగడం తప్పనిసరి అని భావిస్తారు. కానీ, దీనికి ఎటువంటి బలమైన శాస్త్రీయ ఆధారం లేదు. ఒక వ్యక్తికి అవసరమైన నీటి పరిమాణం ఆ వ్యక్తి వయస్సు, బరువు, నివసించే ప్రాంతంలోని వాతావరణం, వారు చేసే శారీరక శ్రమపై ఆధారపడి ఉంటుంది. ఉదాహరణకు, ఎండలో పని చేసే వ్యక్తికి, ఏసీ గదిలో కూర్చునే వ్యక్తికి నీటి అవసరాలు వేర్వేరుగా ఉంటాయి. మనం తినే పండ్లు, కూరగాయలు, ఇతర ద్రవ పదార్థాల నుండి కూడా శరీరానికి హైడ్రేషన్ అందుతుంది.
2. విష పదార్థాలు: ఎక్కువ నీరు తాగితే శరీరంలోని విష పదార్థాలు (టాక్సిన్స్) అన్నీ వాటంతట అవే కొట్టుకుపోతాయని చాలా మంది నమ్ముతారు. కానీ నిజానికి, రక్తాన్ని ఫిల్టర్ చేసి వ్యర్థాలను మూత్రం రూపంలో పంపే పనిని మూత్రపిండాలు చేస్తాయి. తగినంత నీరు తాగడం వల్ల మూత్రపిండాలు సజావుగా పనిచేస్తాయి. అంతేకానీ, అతిగా నీరు తాగడం వల్ల అదనపు ప్రయోజనం ఏమీ ఉండదు పైగా రక్తంలో సోడియం స్థాయిలు తగ్గి ‘వాటర్ టాక్సిసిటీ’ అనే ప్రమాదకర పరిస్థితి ఏర్పడవచ్చు.
3. కెఫిన్, డీహైడ్రేషన్ : కాఫీ, టీ వంటి కెఫిన్ కలిగిన పానీయాలు తాగడం వల్ల శరీరం డీహైడ్రేట్ అవుతుందని ఒక అపోహ ఉంది. కానీ, వీటిని మితంగా తీసుకున్నప్పుడు ఇవి కూడా శరీరానికి హైడ్రేషన్ను అందిస్తాయి. వీటిలో ఉండే మూత్రవిసర్జన ప్రభావం చాలా తక్కువగా ఉంటుంది, కాబట్టి వీటిని తాగడం వల్ల శరీరంలోని నీరు పూర్తిగా తగ్గిపోదు.
4. దాహం, జీర్ణక్రియ: దాహం వేసినప్పుడు మాత్రమే నీరు (Water)తాగడం సరికాదు. ముఖ్యంగా వృద్ధులు వారిలో దాహం వేసే లక్షణం తగ్గుతుంది. అందుకే దాహంతో సంబంధం లేకుండా క్రమం తప్పకుండా నీరు తీసుకోవడం మంచిది. అలాగే భోజనం చేసేటప్పుడు లేదా భోజనం తర్వాత నీరు తాగడం వల్ల జీర్ణక్రియ పాడవుతుందనే దానికి కూడా ఎటువంటి శాస్త్రీయ ఆధారాలు లేవు. మీ శరీరానికి సౌకర్యంగా ఉన్నప్పుడు నీరు తాగవచ్చు.
నీరు (Water)తాగడం ఆరోగ్యానికి మంచిదే అయినప్పటికీ, అది మితంగా, శరీర అవసరాలకు అనుగుణంగా ఉండాలి. కేవలం నీటిపైనే కాకుండా నీటి శాతం ఎక్కువగా ఉండే ఆహార పదార్థాలపై కూడా దృష్టి సారించాలి. అపోహలను వీడి, వాస్తవాలను అనుసరించడమే ఆరోగ్యానికి అసలైన సూత్రం.
