కొత్తగా జిమ్‌లో అడుగు పెడుతున్నారా? ఈ జాగ్రత్తలు తీసుకోకపోతే లాభం కంటే నష్టమే ఎక్కువ!

Before Workout

హైదరాబాద్: ఆరోగ్యంపై శ్రద్ధ పెంచి, ఫిట్‌గా ఉండాలని నిర్ణయించుకోవడం ఒక అద్భుతమైన ప్రారంభం. ఈ క్రమంలో చాలామంది ఉత్సాహంగా జిమ్‌లో జాయిన్ అవుతుంటారు. అయితే, వ్యాయామం అంటే కేవలం బరువులు ఎత్తడం లేదా ట్రెడ్‌మిల్ మీద పరిగెత్తడం మాత్రమే కాదు. కొత్తగా జిమ్‌కు వెళ్లేవారు చేసే కొన్ని చిన్న చిన్న పొరపాట్లు ఒక్కోసారి దీర్ఘకాలిక గాయాలకు దారి తీయవచ్చు. మనం చేసే వ్యాయామాలు శరీరానికి బలాన్ని ఇవ్వాలి కానీ ఇబ్బందిని కలిగించకూడదు. అందుకే మొదటిసారి జిమ్‌(Before Workout)లో అడుగుపెట్టే వారు కొన్ని ప్రాథమిక నియమాలను పాటించడం తప్పనిసరి.

నాణ్యమైన పాదరక్షలు, దుస్తుల ప్రాధాన్యత: చాలామంది “ముందు కొన్ని రోజులు వెళ్దాం, అలవాటు పడ్డాక మంచి బూట్లు కొందాం” అని భావిస్తారు. కానీ ఇది సరైన పద్ధతి కాదు. వ్యాయామం చేసేటప్పుడు శరీర బరువు మొత్తం పాదాల మీద పడుతుంది. నాసిరకం బూట్లు వాడటం వల్ల మడమలు, మోకాళ్ల నొప్పులు రావడమే కాకుండా, కండరాల లోపల గాయాలయ్యే ప్రమాదం ఉంది. అలాగే దుస్తుల విషయంలో కూడా అశ్రద్ధ వద్దు. గాలి ఆడని బిగుతైన దుస్తులు వేసుకోవడం వల్ల శరీరం త్వరగా వేడెక్కి, విపరీతంగా చెమట పడుతుంది. దీనివల్ల డీహైడ్రేషన్ వచ్చి కళ్లు తిరగడం వంటివి జరగవచ్చు. కాబట్టి శరీరానికి సౌకర్యంగా ఉండే, శ్వాస తీసుకోవడానికి వీలుండే దుస్తులనే ఎంచుకోవాలి.

మంచినీళ్లు: వ్యాయామం చేసే సమయంలో శరీరం నుండి చెమట రూపంలో నీరు బయటకు పోతుంటుంది. అందుకే జిమ్‌కు వెళ్లేటప్పుడు తప్పనిసరిగా వెంట మంచినీళ్ల సీసా ఉంచుకోవాలి. వ్యాయామం మధ్యలో గొంతు తడుపుకుంటూ ఉండటం వల్ల గుండె వేగం అదుపులో ఉంటుంది. భారీ వ్యాయామాలు చేసేటప్పుడు నీరసం రాకుండా ఉండాలన్నా, కండరాల తిమ్మిర్లు తగ్గాలన్నా నీరు ఎంతగానో తోడ్పడుతుంది. ఒకేసారి గటగటా తాగేయకుండా, చిన్న చిన్న గుటకలతో శరీరాన్ని హైడ్రేటెడ్‌గా ఉంచుకోవాలి.

వార్మ్‌అప్‌,స్ట్రెచింగ్: జిమ్‌లోకి వెళ్లగానే నేరుగా పెద్ద పెద్ద బరువులు ఎత్తకూడదు. మీరు చేసేది సులభమైన వ్యాయామమైనా సరే, దానికి ముందు ‘వార్మ్‌-అప్’ చేయడం చాలా ముఖ్యం. ఇది శరీరానికి, కండరాలకు ఒక సంకేతాన్ని పంపి సిద్ధం చేస్తుంది. ఉదాహరణకు, మీరు వేగంగా పరిగెత్తాలనుకుంటే, దానికి ముందు ఐదు నుండి పది నిమిషాలు మెల్లగా నడవాలి. మీ వ్యాయామ సమయంలో దాదాపు నాలుగో వంతు సమయం వార్మ్‌-అప్‌కే కేటాయించాలి. ఇక కండరాలను సాగదీసే ‘స్ట్రెచింగ్’ వ్యాయామాలు ఎప్పుడూ వర్కవుట్ చివర్లో మాత్రమే చేయాలని గుర్తుంచుకోండి.

ఈ చిన్నపాటి జాగ్రత్తలు పాటిస్తే మీ జిమ్ ప్రయాణం సురక్షితంగా సాగడమే కాకుండా, మీరు ఆశించిన ఫలితాలను త్వరగా సాధించవచ్చు.

Also Read: బరువు తగ్గాలంటే అన్నం మానేయాలా? అసలైన ‘డైట్’ రహస్యం ఇదే!