పాత అద్దాలను మెరిపించే సింపుల్ ట్రిక్స్.. ఇలా ఇలా చేస్తే మరకలు మాయం!

Mirrors

హైదరాబాద్: డ్రస్సింగ్ టేబుల్ నుండి బాత్‌రూమ్ వరకు.. ఇంట్లో అద్దాలు ఎక్కడ ఉన్నా అవి నీటి మరకలతో లేదా దుమ్ముతో మసకబారిపోతుంటాయి. ఎంత తుడిచినా ఆ మొండి మరకలు వదలడం లేదని చాలామంది ఇబ్బంది పడుతుంటారు. అయితే, ఖరీదైన క్లీనర్ల అవసరం లేకుండానే మన ఇంట్లో ఉండే వస్తువులతో అద్దాలను కొత్తవాటిలా మెరిపించవచ్చని నిపుణులు చెబుతున్నారు. ఆ సులభమైన చిట్కాలు ఏమిటో ఇప్పుడు చూద్దాం..

షేవింగ్ క్రీమ్‌:

సాధారణంగా వేడినీటి స్నానం తర్వాత బాత్‌రూమ్ అద్దాలపై పొగమంచులాంటి పొర ఏర్పడి నీటి మరకలు పడిపోతుంటాయి. ఇది జరగకుండా ఉండాలంటే, స్నానానికి ముందే అద్దంపై కొద్దిగా షేవింగ్ క్రీమ్‌ను పూయాలి. స్నానం పూర్తయ్యాక మెత్తని బట్టతో తుడిచేస్తే అద్దం మెరిసిపోవడమే కాకుండా, మరకలు కూడా పడవు. ఇదే చిట్కాను కార్ అద్దాలకు, గ్లాస్ కిటికీలకు కూడా వాడవచ్చు.

నీటి ఎంపిక:

అద్దాలను శుభ్రం చేయడానికి మనం వాడే సాధారణ నీటిలో లవణాలు ఉంటాయి, దీనివల్ల తుడిచిన తర్వాత కూడా అద్దంపై గీతలు కనిపిస్తాయి. దీనికి బదులుగా డిస్టిల్డ్ వాటర్ (Distilled Water) ఉపయోగిస్తే ఫలితం మెరుగ్గా ఉంటుంది. ఇది అద్దంపై ఉన్న సూక్ష్మమైన ధూళిని కూడా తొలగించి, అద్దం తళతళలాడేలా చేస్తుంది.

Also Read: మహిళలూ.. మీ బ్యాగులో ఈ వస్తువులు పెడుతున్నారా? అయితే దరిద్రం వెంటే ఉన్నట్టే!

జిడ్డు మరకలు:

అద్దంపై చేతి ముద్రలు లేదా జిడ్డు మరకలు ఉన్నప్పుడు బేకింగ్ సోడా అద్భుతంగా పనిచేస్తుంది. ఒక శుభ్రమైన తడి గుడ్డను బేకింగ్ సోడాలో ముంచి అద్దంపై మృదువుగా రుద్దాలి. ఆ తర్వాత మంచి నీటితో క్లీన్ చేసి పొడి బట్టతో తుడిచేస్తే మొండి మరకలన్నీ మాయమవుతాయి.

తెల్లటి కాగితం:

చాలామంది అద్దాలు తుడవడానికి న్యూస్ పేపర్ వాడుతుంటారు, కానీ దానివల్ల పేపర్ లోని సిరా (Ink) అద్దానికి అంటుకునే ప్రమాదం ఉంది. అందుకే సాదా తెల్ల కాగితాన్ని (White Paper) ఉండగా చుట్టి, వెనిగర్ కలిపిన నీటితో అద్దాన్ని తుడవండి. అద్దం మూలల్లో ఉండే మురికిని తొలగించడానికి పాత టూత్ బ్రష్ లేదా కాటన్ స్వాబ్స్ వాడటం వల్ల ప్రతి మూల శుభ్రపడుతుంది.