హైదరాబాద్: హిందూ ధర్మంలో అత్యంత భక్తిశ్రద్ధలతో జరుపుకునే పండుగలలో శ్రీరామనవమికి ప్రత్యేక స్థానం ఉంది. చైత్ర మాసంలోని శుక్ల పక్షం నవమి తిథి నాడు లోకాభిరాముడు శ్రీరామచంద్రుడు జన్మించారు. అందుకే ప్రతి ఏటా ఈ పవిత్ర దినాన దేశవ్యాప్తంగా ప్రతి పల్లె, ప్రతి పట్టణంలో రామయ్య జన్మదిన వేడుకలను , సీతారాముల కళ్యాణ మహోత్సవాన్ని అత్యంత వైభవంగా నిర్వహిస్తారు. అయితే, 2026 సంవత్సరంలో శ్రీరామనవమి జరుపుకోవాల్సిన తేదీ విషయంలో భక్తులలో కొంత సందిగ్ధత నెలకొంది.
తేదీల మధ్య సందిగ్ధత ఎందుకు వచ్చింది?
సాధారణంగా తిథులు ఒక రోజు మధ్యాహ్నం ప్రారంభమై మరుసటి రోజు వరకు ఉన్నప్పుడు ఇటువంటి చర్చలు వస్తుంటాయి. 2026 సంవత్సరానికి సంబంధించిన పంచాంగ వివరాల ప్రకారం నవమి తిథి సమయాలు ఇలా ఉన్నాయి.
- నవమి తిథి ప్రారంభం: మార్చి 26, 2026 మధ్యాహ్నం 2:18 గంటలకు.
- నవమి తిథి ముగింపు: మార్చి 27, 2026 మధ్యాహ్నం 12:36 గంటలకు.
చాలా క్యాలెండర్లలో మార్చి 26వ తేదీనే నవమిగా చూపించినప్పటికీ, భద్రాచలం వంటి ప్రముఖ క్షేత్రాల్లో సూర్యోదయ సమయానికి ఉన్న తిథినే ప్రామాణికంగా తీసుకుంటారు.
పండితులు ఏమంటున్నారు?
ధర్మశాస్త్రాల ప్రకారం, సూర్యోదయ వేళలో ఏ తిథి ఉంటుందో ఆ రోజే పండుగ నిర్వహించడం అత్యంత శుభప్రదం. మార్చి 27వ తేదీ శుక్రవారం ఉదయం సూర్యోదయ సమయానికి నవమి తిథి ఉన్నందున, ఆ రోజే శ్రీరామనవమిని జరుపుకోవాలని ప్రముఖ పండితులు సూచిస్తున్నారు. దక్షిణ అయోధ్యగా పిలవబడే భద్రాచల క్షేత్రంలో కూడా సీతారాముల కళ్యాణ మహోత్సవాన్ని మార్చి 27వ తేదీనే అధికారికంగా నిర్వహించనున్నారు.
పూజా సమయం , విశిష్టత:
శ్రీరాముడు అభిజిత్ లగ్నంలో (మధ్యాహ్న సమయం) జన్మించినందున, ఆ సమయంలో పూజ చేయడం విశేష ఫలితాలను ఇస్తుంది. మార్చి 27న ఉదయం 11:06 నుండి మధ్యాహ్నం 1:31 వరకు పూజకు అత్యంత శక్తివంతమైన ముహూర్తం (మధ్య ముహూర్తం). భద్రాద్రిలో స్వామివారి కళ్యాణం కూడా సరిగ్గా ఇదే సమయంలో కనులపండువగా జరుగుతుంది.
శ్రీరామనవమి కేవలం ఒక వేడుక మాత్రమే కాదు, అది ధర్మ మార్గంలో నడవాలని మనకు నేర్పే పవిత్ర దినం. ఈ రోజున రామ మందిరాల్లో ప్రత్యేక అర్చనలు, భజనలు నిర్వహించి, భక్తులకు పానకం, వడపప్పు ప్రసాదాలు పంపిణీ చేస్తారు. సీతారాముల కళ్యాణాన్ని వీక్షించడం వల్ల సకల శుభాలు కలుగుతాయని భక్తుల ప్రగాఢ విశ్వాసం.
Also Read: Bhadrachalam Temple : భద్రాచలం ఆలయ అభివృద్ధికి సీఎం గ్రీన్ సిగ్నల్… ఆగమశాస్త్రంతోనే పనులు!
