Hair growth
హైదరాబాద్: ప్రస్తుతం సోషల్ మీడియాలో, ఇంటర్నెట్లో జుట్టు పెరుగుదల(Hair growth) కోసం అత్యంత ప్రాచుర్యం పొందుతున్న పేరు రోజ్మేరీ ఆయిల్. నిరంతర చుండ్రు సమస్యతో బాధపడుతున్నా లేదా తల దువ్విన ప్రతిసారీ విపరీతంగా జుట్టు రాలుతున్నా, ఈ సహజ సిద్ధమైన నూనె ఒక గొప్ప పరిష్కారంగా మారుతోంది. చర్మ నిపుణులు సైతం రోజ్మేరీ ఆయిల్ను జుట్టు సంరక్షణ దినచర్యలో చేర్చుకోవాలని సూచిస్తున్నారు.
రోజ్మేరీ నూనెలో శక్తివంతమైన యాంటీఆక్సిడెంట్లు, యాంటీమైక్రోబయల్, యాంటీ ఇన్ఫ్లమేటరీ లక్షణాలు పుష్కలంగా ఉన్నాయి. ఇందులో ఉండే కార్నోసిక్ ఆమ్లం, రోస్మరినిక్ ఆమ్లం తల భాగంలో రక్త ప్రసరణను వేగవంతం చేస్తాయి. రక్త ప్రసరణ పెరగడం వల్ల జుట్టు కుదుళ్లకు అవసరమైన పోషకాలు అందుతాయి, దీనివల్ల జుట్టు మూలాలు బలోపేతమై ఆరోగ్యకరమైన ఎదుగుదలకు అలటఅీనువైన వాతావరణం ఏర్పడుతుంది.
చుండ్రు, జుట్టు రాలడాన్ని తగ్గించడం:
తలలో మంటను (inflammation) తగ్గించి, రక్త ప్రవాహాన్ని మెరుగుపరచడం ద్వారా జుట్టు రాలడాన్ని అరికడుతుంది. దీనిలోని యాంటీ ఫంగల్, క్రిమినాశక లక్షణాలు నెత్తిమీద పేరుకుపోయిన మురికి, చెమట, అదనపు నూనెలను తొలగిస్తాయి. ఇది చుండ్రుకు కారణమయ్యే శిలీంధ్రాలను నిరోధించి, దురద నుండి ఉపశమనం కలిగిస్తుంది. ఇది జుట్టు చిట్లిపోకుండా చూస్తుంది, పెళుసైన వెంట్రుకలను దృఢంగా మారుస్తుంది.
ఉపయోగించే విధానం :
రోజ్మేరీ ఆయిల్ అనేది ఒక ఎసెన్షియల్ ఆయిల్ , కాబట్టి దీనిని నేరుగా తలకు పట్టించకూడదు.
ఒక టేబుల్ స్పూన్ క్యారియర్ ఆయిల్ (కొబ్బరి నూనె, బాదం నూనె లేదా జోజోబా నూనె) తీసుకుని, అందులో 3 నుండి 4 చుక్కల రోజ్మేరీ ఆయిల్ కలపాలి. ఈ మిశ్రమాన్ని తలకు పట్టించి 5 నుండి 10 నిమిషాల పాటు సున్నితంగా మసాజ్ చేయాలి. దీనిని కనీసం ఒక గంట పాటు లేదా రాత్రిపూట అలాగే ఉంచి, మరుసటి రోజు ఉదయం కెమికల్స్ లేని షాంపూతో కడుక్కోవాలి. మీరు నేరుగా నూనె పెట్టుకోలేకపోతే, స్నానం చేసే ముందు షాంపూలో కొన్ని చుక్కల రోజ్మేరీ ఆయిల్ కలిపి కూడా వాడుకోవచ్చు. దీనిని మొదటిసారి వాడే ముందు, చర్మంపై ఎక్కడైనా కొంచెం రాసి చూసి , ఎటువంటి చికాకు లేదని నిర్ధారించుకోవడం మంచిది.
రోజ్మేరీ ఆయిల్ ఒక అద్భుతమైన సహజ పరిష్కారం అయినప్పటికీ, ఇది ఒక రాత్రిలో ఫలితాన్ని ఇచ్చేది కాదు. వారానికి రెండు నుండి మూడు సార్లు, కనీసం కొన్ని నెలల పాటు నిరంతరం ఉపయోగిస్తేనే ఆశించిన ఫలితాలు కనిపిస్తాయి. వ్యక్తిని బట్టి ఫలితాలు మారవచ్చు, కాబట్టి ఓపికతో ప్రయత్నించడం అవసరం.
