ఛత్తీస్గఢ్ రాష్ట్రంలోని బస్తర్ అడవుల్లో మావోయిస్టు సమస్యను సమర్థంగా ఎదుర్కొనేందుకు పోలీసులు కొత్త వ్యూహాన్ని అమలు చేస్తున్నారు. “ముల్లును ముల్లుతోనే తీయాలి” అనే సిద్ధాంతంతో, శత్రువును అర్థం చేసుకోవడానికి అదే శత్రువు పద్ధతులను నేర్చుకోవాలని నిర్ణయించారు. ఈ క్రమంలో లొంగిపోయిన మావోయిస్టులను ట్రైనర్లుగా ఉపయోగించడం ప్రస్తుతం చర్చనీయాంశంగా మారింది.
బస్తర్ ఐజీ సుందర్రాజ్ ఆదేశాల మేరకు ఈ కార్యక్రమం రూపుదిద్దుకుంది. సుక్మా, బీజాపూర్, దంతేవాడ, కాంకేర్ జిల్లాల నుంచి ఎంపిక చేసిన మాజీ మావోయిస్టులను ప్రత్యేక నోడల్ అధికారుల పర్యవేక్షణలో శిక్షణా కేంద్రాలకు తరలించారు. అక్కడ వారు పోలీసులకు నేరుగా శిక్షణ అందిస్తున్నారు.
ప్రత్యేక శిక్షణ
కాంకేర్లోని కౌంటర్ టెర్రరిజం అండ్ జంగిల్ వార్ఫేర్ (CTJW) కాలేజ్లో ఈ ప్రత్యేక శిక్షణ ప్రారంభమైంది. డజనుకు పైగా లొంగిపోయిన మావోయిస్టులు ఇప్పుడు సబ్-ఇన్స్పెక్టర్లు (SI), డిప్యూటీ సూపరింటెండెంట్ ఆఫ్ పోలీస్ (DSP) స్థాయి అధికారులకు ఒక నెలపాటు శిక్షణ ఇస్తున్నారు.
ఈ శిక్షణలో ప్రధానంగా మావోయిస్టులు అనుసరించే గెరిల్లా యుద్ధ వ్యూహాలు, వారి కదలికలు, దాడి పద్ధతులు వంటి అంశాలపై క్షేత్రస్థాయి అవగాహన కల్పిస్తున్నారు. ముఖ్యంగా బస్తర్ అడవుల్లో పెద్ద సవాలుగా మారిన IEDలు (మందుపాతరలు) గుర్తించే పద్ధతులపై ప్రత్యేక శిక్షణ ఇస్తున్నారు.
ప్రాణ రక్షణలో కీలకం
లొంగిపోయిన మావోయిస్టుల సమాచారం ప్రకారం, IEDలను అమర్చిన ప్రాంతాల్లో ఆకులను ఒక ప్రత్యేక విధంగా అమర్చడం ద్వారా సంకేతాలు ఇస్తారని తెలుస్తోంది. ఆధునిక పరికరాలతో గుర్తించలేని పరిస్థితుల్లో, ఈ తరహా సూక్ష్మ సంకేతాలను గుర్తించడం ప్రాణరక్షణలో కీలకంగా మారుతుందని అధికారులు చెబుతున్నారు.
అదే సమయంలో, మావోయిస్టుల మెడికల్ వింగ్లో పనిచేసిన మాజీ సభ్యులు కూడా ఈ శిక్షణలో భాగమయ్యారు. ఎన్కౌంటర్లలో తీవ్రంగా గాయపడినప్పటికీ, అడవుల్లో తక్కువ వనరులతో ఎలా ప్రాణాలు నిలబెట్టుకోవాలి? అనే అంశాలపై వారు పోలీసులకు ఉపయోగకరమైన సూచనలు ఇస్తున్నారు. అల్లోపతి వైద్యంతో పాటు, ప్రాథమిక చికిత్స పద్ధతులు కూడా నేర్పిస్తున్నారు.
ప్రమాదాన్ని గుర్తించే నైపుణ్యం
టెక్నాలజీపై మాత్రమే ఆధారపడకుండా, అనుభవంతో కూడిన నిర్ణయాలు తీసుకోవడం ఎంత ముఖ్యమో ఈ శిక్షణ ద్వారా పోలీసులకు అవగాహన కలుగుతోంది. అడవుల్లో ప్రతి చిన్న మార్పును గమనించి ప్రమాదాన్ని ముందుగానే గుర్తించే నైపుణ్యాన్ని పెంపొందించడమే ఈ కార్యక్రమం లక్ష్యం.
మొత్తానికి, బస్తర్ పోలీసులు అమలు చేస్తున్న ఈ కొత్త వ్యూహం దేశవ్యాప్తంగా చర్చకు దారితీస్తోంది. మావోయిస్టులపై పోరాటంలో ఇది గేమ్చేంజర్గా మారుతుందా? అన్నది రాబోయే రోజుల్లో తేలనుంది.
