ఎండలు మండిపోతున్న ఈ కాలంలో చల్లని బీరు కోసం ఎదురుచూస్తున్న వారికి నిరాశ కలిగించే వార్త బయటకు వచ్చింది. అంతర్జాతీయ పరిస్థితులు, దేశీయ సరఫరా సమస్యలు కలిసి బీరు మార్కెట్పై తీవ్ర ప్రభావం చూపుతున్నాయి. పరిశ్రమ వర్గాల హెచ్చరికల ప్రకారం, రాబోయే రోజుల్లో బీరు కొరత ఏర్పడడమే కాకుండా ధరలు కూడా గణనీయంగా పెరిగే అవకాశం ఉంది. ప్రస్తుతం అమెరికా, ఇరాన్ మధ్య నెలకొన్న ఉద్రిక్తతలు ప్రపంచవ్యాప్తంగా సహజవాయువు సరఫరాపై ప్రభావం చూపుతున్నాయి. గాజు సీసాల తయారీకి అత్యంత కీలకమైన ఈ సహజవాయువు కొరత కారణంగా దేశీయ గాజు పరిశ్రమలు ఇబ్బందులు ఎదుర్కొంటున్నాయి.
గాజు సీసాల ఉత్పత్తిపై ప్రభావం
ప్రత్యేకంగా ఉత్తరప్రదేశ్లోని ఫైన్ ఆర్ట్ గ్లాస్ వర్క్స్ వంటి సంస్థలు గ్యాస్ కొరత వల్ల తమ ఉత్పత్తిని దాదాపు 40 శాతం వరకు తగ్గించుకోవాల్సి వచ్చింది. దీనితో పాటు గాజు సీసాల ధరలు కూడా 17-18 శాతం వరకు పెరిగాయి. ఈ ప్రభావం కేవలం బీర్లపైనే కాకుండా శీతల పానీయాలు, ఆహార ఉత్పత్తుల ప్యాకేజింగ్పైనా పడుతోంది.
Also Read: రామ్ చరణ్ బర్త్డే బ్లాస్ట్ .. ‘పెద్ది పహిల్వాన్’గా మెగా పవర్ స్టార్ మాస్ విస్ఫోటనం
క్యాన్ల కొరత కూడా తీవ్రం
ఇదిలా ఉంటే, అల్యూమినియం క్యాన్ల పరిస్థితి కూడా అంతే క్లిష్టంగా మారింది. క్యాన్ల తయారీకి అవసరమైన ముడి పదార్థాల దిగుమతులు మందగించడం వల్ల క్యాన్ల కొరత ఏర్పడుతోంది. ఫలితంగా బీర్ల ప్యాకేజింగ్ వ్యవస్థ మొత్తం ఒత్తిడిలో పడింది.
ప్రముఖ కంపెనీల హెచ్చరిక
ఈ పరిస్థితులపై అంతర్జాతీయ వార్తా సంస్థ రాయిటర్స్ ప్రత్యేక కథనం ప్రచురించింది. ఇందులో హైనెకెన్, ఏబీ ఇన్బెవ్, కార్ల్స్బెర్గ్ వంటి ప్రముఖ బ్రూవరీ కంపెనీలు ఉత్పత్తి కొనసాగించాలంటే ధరల పెంపు తప్పదని స్పష్టం చేసినట్లు పేర్కొంది. ప్రస్తుతం ఉన్న పరిస్థితుల్లో కనీసం 12-15 శాతం ధరలు పెంచాల్సిందేనని పరిశ్రమ వర్గాలు చెబుతున్నాయి.
పెరుగుతున్న కంపెనీల ఖర్చులు
ఇక బ్రూవర్స్ అసోసియేషన్ ఆఫ్ ఇండియా డైరెక్టర్ జనరల్ వినోద్ కూడా ఈ సంక్షోభంపై ఆందోళన వ్యక్తం చేశారు. ఉత్పత్తి వ్యయాలు పెరిగిపోవడంతో కంపెనీలకు ధరలు పెంచడం తప్ప మరో మార్గం లేదని తెలిపారు. ఈ పరిణామాలు చివరికి సామాన్య వినియోగదారులపై ప్రభావం చూపనున్నాయి.
ఇప్పటికే ప్యాకేజ్డ్ వాటర్ బాటిళ్ల ధరలు పెరిగిన నేపథ్యంలో, ఇప్పుడు బీర్ల ధరలు కూడా పెరగడం ఖాయం అవుతోంది. రాష్ట్ర ప్రభుత్వాలు ఎక్సైజ్ ఆదాయాల కోసం చూస్తుండగా, కంపెనీలు ఖర్చులు పెరిగాయని చెబుతున్నాయి. ఈ పరిస్థితుల్లో వినియోగదారుడే నష్టపోవాల్సి వస్తోంది.
వేసవిలో బీరు ప్రియులకు నిరాశ
వేసవిలో చల్లగా గడపాలని భావించిన బీరు ప్రియులకు ఈసారి నిరాశ తప్పేలా కనిపించడం లేదు. ఒకవైపు కొరత, మరోవైపు ధరల పెరుగుదల… ఈ సీజన్లో ‘చిల్’ అనుభూతి ఖరీదైనదిగా మారే సూచనలు స్పష్టంగా కనిపిస్తున్నాయి.
