Child Road Safety
-
కేరళలో చిన్నారి బస్సు ముందుకు రావడంతో ప్రమాదం అంచుల వరకు వెళ్లినా డ్రైవర్ సమయస్ఫూర్తితో బ్రేక్ వేయడంతో ప్రాణాపాయం తప్పింది.
-
ఈ ఘటన వీడియోను సీపీ సజ్జనార్ షేర్ చేస్తూ తల్లిదండ్రులు, వాహనదారులకు రోడ్డు భద్రతపై గట్టి హెచ్చరికలు చేశారు.
-
పిల్లల విషయంలో చిన్న నిర్లక్ష్యం కూడా తీరని విషాదానికి దారితీయవచ్చని ఈ ఘటన మరోసారి రుజువు చేసింది.
కేరళలో చోటుచేసుకున్న ఒక షాకింగ్ ఘటనకు సంబంధించిన వీడియో సోషల్ మీడియాలో వైరల్ అవుతోంది. ఈ వీడియోను చూస్తే ఒళ్లు గగుర్పొడుస్తోంది. రోడ్డుపై ఆడుకుంటూ వెళ్లిన ఓ చిన్నారి ఒక్కసారిగా బస్సు ముందుకు రావడంతో ప్రమాదం అంచుల్లోకి వెళ్లిన క్షణాలు అందరినీ ఉలిక్కిపడేలా చేస్తున్నాయి. అయితే ఆ బస్సు డ్రైవర్ అత్యంత సమయస్ఫూర్తితో బ్రేకులు వేయడంతో పెద్ద ప్రమాదం తప్పింది. క్షణాల వ్యవధిలో తీసుకున్న నిర్ణయం వల్ల చిన్నారి ప్రాణాలు దక్కాయి. ఈ ఘటనకు సంబంధించిన వీడియోను హైదరాబాద్ పోలీస్ కమిషనర్ సజ్జనార్ సోషల్ మీడియాలో షేర్ చేస్తూ తల్లిదండ్రులకు ముఖ్య సూచనలు చేశారు.
ఈ వీడియో చూస్తుంటేనే ఒళ్లు గగుర్పొడుస్తోంది. ఆ బస్సు డ్రైవర్ సమయస్ఫూర్తితో ఉండబట్టి పెను ప్రమాదం తప్పింది.
కానీ గుర్తుంచుకోండి.. అందరికీ ఈ చిన్నారిలా అదృష్టం ఉండదు.
తల్లిదండ్రులారా! రహదారుల పక్కన నడుస్తున్నప్పుడు మీ పిల్లల చేతిని వదలకండి. చిన్న నిర్లక్ష్యం తీరని శోకాన్ని… pic.twitter.com/FMrLhzZFkS
— V.C. Sajjanar, IPS (@SajjanarVC) February 4, 2026
సీపీ సజ్జనార్ ఈ వీడియోతో పాటు రోడ్డు భద్రతపై గట్టిగా హెచ్చరించారు. “అందరికీ ఈ చిన్నారిలాగే అదృష్టం కలిసి వస్తుందని అనుకోవడం తప్పు” అని పేర్కొన్నారు. రహదారులపై కేవలం క్షణకాలం దృష్టి మళ్లినా కోలుకోలేని నష్టం జరుగుతుందని తల్లిదండ్రులను అప్రమత్తం చేశారు. ముఖ్యంగా రద్దీగా ఉండే ప్రాంతాల్లో పిల్లల విషయంలో అత్యంత జాగ్రత్తగా ఉండాలని సూచించారు.
సజ్జనార్ కీలక సూచనలు :
- రోడ్లపై నడుస్తున్నప్పుడు పిల్లల చేతిని ఎట్టి పరిస్థితుల్లోనూ వదలకూడదు
- చిన్నపిల్లలు వాహనాల వేగం, ప్రమాదాన్ని అంచనా వేయలేరని గుర్తుంచుకోవాలి
- తల్లిదండ్రుల చిన్న నిర్లక్ష్యం కూడా కుటుంబానికి తీరని విషాదాన్ని మిగుల్చవచ్చు
- పిల్లల భద్రత విషయంలో ఎప్పుడూ అప్రమత్తంగా ఉండాలి, రాజీ పడకూడదు
వాహనదారులకు సూచనలు :
- స్కూల్స్, నివాస ప్రాంతాల వద్ద వేగం తగ్గించి నడపాలి
- చిన్నపిల్లలు ఎటు వైపు నుంచి వస్తారో అంచనా వేయలేము కాబట్టి అప్రమత్తంగా ఉండాలి
- రోడ్లపై నిర్లక్ష్యంగా డ్రైవ్ చేస్తే ప్రాణాలకు ముప్పు తప్పదని హెచ్చరించారు
రోడ్ సేఫ్టీపై అవగాహన అవసరం:
చిన్నప్పటి నుంచే పిల్లలకు రోడ్ సేఫ్టీపై అవగాహన కల్పించడం చాలా అవసరమని సీపీ సూచించారు. రహదారులు ఆట స్థలాలు కావని, ట్రాఫిక్ నియమాలు పాటించడం జీవన రక్షణకే అని తెలిపారు. ఈ వీడియో వైరల్ కావడంతో తల్లిదండ్రులు, వాహనదారుల్లో చర్చ మొదలైంది. ఒక క్షణం నిర్లక్ష్యం ఎంత పెద్ద ప్రమాదానికి దారితీస్తుందో ఈ ఘటన స్పష్టంగా చూపించిందని నెటిజన్లు అభిప్రాయపడుతున్నారు.
