దేశవ్యాప్తంగా పాఠశాల విద్యలో కీలక మార్పులకు శ్రీకారం చుడుతూ ఎన్సీఈఆర్టీ (NCERT) కొత్త పాఠ్యపుస్తకాలపై అధికారిక ప్రకటన విడుదల చేసింది. జాతీయ విద్యా విధానం (NEP-2020) లక్ష్యాలకు అనుగుణంగా రూపొందించిన ఈ పుస్తకాలు విద్యార్థుల్లో నైపుణ్యాభివృద్ధి, ఆలోచనా శక్తి పెంపుపై దృష్టి పెట్టనున్నాయి. ఇప్పటికే 1 నుంచి 8వ తరగతి వరకు కొత్త పాఠ్యపుస్తకాలు ముద్రిత, డిజిటల్ రూపాల్లో అందుబాటులోకి వచ్చాయి.
అయితే, 9వ తరగతి పాఠ్యపుస్తకాలపై ఇంకా స్పష్టత లేకపోవడం గమనార్హం. ప్రస్తుతం సిలబస్ డ్రాఫ్ట్ మాత్రమే విడుదల చేసి ప్రజల అభిప్రాయాలు కోరుతున్న ఎన్సీఈఆర్టీ, 2026–27 విద్యా సంవత్సరంలో వాటిని అమల్లోకి తీసుకురానుంది. ఈ ఆలస్యం విద్యార్థులు, ఉపాధ్యాయుల్లో అయోమయాన్ని పెంచుతోంది. ముఖ్యంగా గతంలో 8వ తరగతి పుస్తకాల విడుదల ఆలస్యం జరిగిన నేపథ్యంలో ఈసారి కూడా అదే పరిస్థితి తలెత్తుతుందేమోనన్న భయం వ్యక్తమవుతోంది.
ఇక 10, 11 తరగతులకు కొత్త పుస్తకాలు 2027–28 నుంచి అమలులోకి వస్తాయని స్పష్టం చేశారు. అప్పటివరకు పాత పాఠ్యపుస్తకాలనే కొనసాగించాల్సి ఉంటుంది. ఈ మార్పుల నేపథ్యంలో ఉపాధ్యాయులు ముందస్తు జ్ఞానాన్ని బలపరచాలని ఎన్సీఈఆర్టీ సూచించింది.
ప్రజల్లో పెరుగుతున్న సందేహాలు
సోషల్ మీడియాలో తల్లిదండ్రులు, ఉపాధ్యాయులు అనేక ప్రశ్నలు లేవనెత్తుతున్నారు. చాలా స్కూళ్లు ఇప్పటికీ ఎన్సీఈఆర్టీ పుస్తకాలు కాకుండా ప్రైవేట్ ప్రచురణల పుస్తకాలను ఉపయోగిస్తున్నాయని విమర్శలు వినిపిస్తున్నాయి. “పాఠశాలలు ఎందుకు తమే పుస్తకాలు కొనాలని ఒత్తిడి చేస్తున్నాయి?” అన్న ప్రశ్న కూడా తలెత్తుతోంది.
మరోవైపు, 22 భాషల్లో అన్ని తరగతుల పుస్తకాలు అందుబాటులో లేకపోవడం కూడా సమస్యగా మారింది. ముఖ్యంగా గ్రామీణ ప్రాంతాల్లో ఈ సమస్య ఎక్కువగా కనిపిస్తోంది.
ఈ మార్పులు సాధారణ పాఠ్యపుస్తకాల మార్పులు మాత్రమే కావు. ఇది భారత విద్యా వ్యవస్థను rote learning నుంచి competency-based learning వైపు మళ్లించే పెద్ద అడుగు. అయితే అమలు దశలో స్పష్టత లేకపోతే విద్యార్థులపై ప్రతికూల ప్రభావం పడే అవకాశం ఉంది.
పాఠ్యపుస్తకాల ఆలస్యం, భాషా అందుబాటు సమస్యలు, ప్రైవేట్ పుస్తకాల ఆధిపత్యం వంటి అంశాలు సరిచేయకపోతే ఈ సంస్కరణల ప్రయోజనం పూర్తిగా అందకపోవచ్చు. అందుకే సమయానికి పుస్తకాలు, స్పష్టమైన మార్గదర్శకాలు ఇవ్వడం అత్యవసరం.
Also Read : ఏపీ జాబ్ క్యాలెండర్ షాక్! 10,000 పోస్టులు… కానీ అసలు ట్విస్ట్ ఇదే
