జనగామ కలెక్టర్ ప్రత్యేక క్లాస్.. విద్యార్థులకు ఇంగ్లీష్, మ్యాథ్స్ బోధన

జనగామ జిల్లా తరిగొప్పుల మండలంలోని కస్తూర్బా గాంధీ బాలికల విద్యాలయం (KGBV)లో జిల్లా కలెక్టర్ సందీప్ కుమార్ ఝా ఆకస్మికంగా తనిఖీ నిర్వహించారు. పాఠశాల నిర్వహణ, విద్యా ప్రమాణాలు, విద్యార్థుల అభ్యాస స్థాయిని పరిశీలించిన ఆయన.. విద్యార్థులతో నేరుగా మమేకమై చదువుల పురోగతి, భవిష్యత్ లక్ష్యాలపై చర్చించారు.

ఈ సందర్భంగా విద్యార్థులకు దాదాపు గంటసేపు ఇంగ్లీష్, గణిత సబ్జెక్టులపై ప్రత్యేక తరగతి నిర్వహించడం ప్రత్యేక ఆకర్షణగా నిలిచింది. గణితంలో సులభ పద్ధతులు, సమస్యల పరిష్కారానికి ఉపయోగపడే మెళకువలను వివరించిన కలెక్టర్.. ఇంగ్లీష్‌లో సరైన ఉచ్చారణ, పఠన నైపుణ్యాలు, వాక్య నిర్మాణంపై కూడా సూచనలు చేశారు.

Unacademy సద్వినియోగం చేసుకోవాలి

ప్రభుత్వం అందిస్తున్న మూడు సంవత్సరాల Unacademy సబ్‌స్క్రిప్షన్‌ను ప్రతి విద్యార్థి పూర్తిగా వినియోగించుకోవాలని కలెక్టర్ సూచించారు. పోటీ పరీక్షలు, ఉన్నత విద్యకు అవసరమైన నైపుణ్యాలను పెంపొందించుకోవడానికి ఈ డిజిటల్ వేదిక ఎంతో ఉపయోగపడుతుందని చెప్పారు.

విద్యార్థులు క్రమశిక్షణతో చదువుకుని జీవితంలో ఉన్నత లక్ష్యాలను చేరుకోవాలని సూచించారు. ప్రభుత్వం కల్పిస్తున్న అవకాశాలను సద్వినియోగం చేసుకుంటే మంచి భవిష్యత్తు సాధ్యమవుతుందని పేర్కొన్నారు.

ప్రతి 15 రోజులకు మాక్ టెస్టులు

పాఠశాల ఉపాధ్యాయులతో సమావేశమైన కలెక్టర్.. విద్యార్థుల అభ్యాస స్థాయిని నిరంతరం అంచనా వేయాలని సూచించారు. ఇందుకోసం ప్రతి 15 రోజులకు ఒకసారి మాక్ టెస్టులు నిర్వహించాలని ఆదేశించారు.

మాక్ టెస్టుల ద్వారా విద్యార్థుల బలహీనతలను గుర్తించి, ప్రత్యేక శ్రద్ధతో వారిని మెరుగైన ఫలితాల దిశగా తీసుకెళ్లాలని చెప్పారు. అలాగే ప్రతి కేజీబీవీలో క్వికర్ మ్యాథ్స్, ఎం-టైర్ పుస్తకాలు అందుబాటులో ఉండేలా చర్యలు తీసుకోవాలని సూచించారు.

ఆహార నాణ్యతపై రాజీ లేదు

విద్యార్థుల వసతి గృహం, భోజనశాలను కూడా కలెక్టర్ పరిశీలించారు. ఉదయం టిఫిన్‌గా ఏమి అందించారో విద్యార్థులను అడిగి తెలుసుకున్నారు. పెరుగు పరిమాణం తక్కువగా ఉన్నట్లు గుర్తించి, విద్యార్థుల అవసరాలకు అనుగుణంగా సరిపడా అందించాలని అధికారులను ఆదేశించారు.

“విద్యార్థుల ఆరోగ్యం విషయంలో ఎలాంటి నిర్లక్ష్యం ఉండకూడదు. పాలలో నీళ్లు కలపడం, ఆహార నాణ్యతలో లోపాలు గమనించిన వెంటనే ఫిర్యాదు చేయాలి. ఫిర్యాదులను గోప్యంగా స్వీకరించి తక్షణ చర్యలు తీసుకుంటాం” అని కలెక్టర్ స్పష్టం చేశారు.

ఉన్నత లక్ష్యాలతో ముందుకు సాగాలి

ఈ సందర్భంగా విద్యార్థులతో మాట్లాడిన కలెక్టర్ సందీప్ కుమార్ ఝా.. కష్టపడి చదివి తల్లిదండ్రులు, పాఠశాల, జిల్లాకు మంచి పేరు తీసుకురావాలని ఆకాంక్షించారు. ఇంగ్లీష్, గణితంపై పట్టు సాధిస్తే భవిష్యత్‌లో మరిన్ని అవకాశాలు వస్తాయని చెప్పారు.

ఈ తనిఖీలో సంబంధిత విద్యాశాఖ అధికారులు, కేజీబీవీ ప్రత్యేకాధికారి, ఉపాధ్యాయులు, విద్యార్థినులు, సిబ్బంది పాల్గొన్నారు.

Also Read: Madhira : మధిరలో చర్చనీయాంశంగా మారిన లైవ్-ఇన్ రిలేషన్‌షిప్స్