- కేంద్ర బొగ్గు, గనుల శాఖ మంత్రి జి. కిషన్ రెడ్డి, బీఆర్ఎస్ నేత హరీష్ రావు
- సింగరేణిలో 40 లక్షల టన్నుల బొగ్గు నిల్వలకు సంబంధించిన ఆరోపణలపై విచారణ కోరారు
- సింగరేణి కాలరీస్ కంపెనీ లిమిటెడ్ (SCCL), తెలంగాణ
సింగరేణి బొగ్గు నిల్వలపై రాజకీయ దుమారం
సింగరేణి కాలరీస్ కంపెనీ లిమిటెడ్ (SCCL)లో 40 లక్షల మెట్రిక్ టన్నుల బొగ్గు నిల్వలకు సంబంధించి తెలంగాణ రాజకీయాల్లో కొత్త వివాదం మొదలైంది. ఈ అంశంపై కేంద్ర బొగ్గు, గనుల శాఖ మంత్రి జి. కిషన్ రెడ్డి తెలంగాణ ముఖ్యమంత్రి రేవంత్ రెడ్డికి లేఖ రాయడం ప్రాధాన్యత సంతరించుకుంది.
అదే సమయంలో బీఆర్ఎస్ సీనియర్ నేత హరీష్ రావు కూడా ఈ అంశంపై స్పందిస్తూ, “40 లక్షల టన్నుల బొగ్గు ఎటుపోయింది? ఎక్కడ దాచిపెట్టారు?” అంటూ ప్రశ్నలు సంధించారు.
కిషన్ రెడ్డి లేఖలో ఏముంది?
జూన్ 10, 2026 తేదీతో సీఎం రేవంత్ రెడ్డికి రాసిన లేఖలో కిషన్ రెడ్డి, సింగరేణి తెలంగాణ ఆర్థిక వ్యవస్థకు కీలక సంస్థ అని పేర్కొన్నారు.
ఇటీవల కొన్ని మీడియా కథనాల్లో సింగరేణిలో అక్రమాలు, అనైతిక పద్ధతులపై ఆరోపణలు వెలువడ్డాయని, ముఖ్యంగా రూ.1,600 కోట్ల విలువైన 40 లక్షల టన్నుల బొగ్గు నిల్వలకు సంబంధించిన అంశం సంస్థ ఆర్థిక పరిస్థితిపై ప్రభావం చూపే అవకాశం ఉందని ఆయన పేర్కొన్నారు.
ఈ ఆరోపణల్లో నిజానిజాలు ఏంటో తక్షణమే విచారణ జరిపి వాస్తవాలను వెలికి తీయాలని ముఖ్యమంత్రిని కోరారు.
అలాగే భవిష్యత్తులో ఇలాంటి ఘటనలు పునరావృతం కాకుండా టెక్నాలజీ ఆధారిత పర్యవేక్షణ వ్యవస్థలు, పీరియాడిక్ రివ్యూలు అమలు చేయాలని కూడా సూచించారు.
’40 లక్షల టన్నుల బొగ్గుపై పన్నులు కూడా కట్టారు’ : హరీష్ రావు
ఈ అంశంపై బీఆర్ఎస్ నేత హరీష్ రావు స్పందిస్తూ పలు ప్రశ్నలు లేవనెత్తారు.
“రాష్ట్ర ప్రభుత్వ అధికారిక వెబ్సైట్ ప్రకారం 40 లక్షల మెట్రిక్ టన్నుల బొగ్గు స్టాక్ ఉందని చూపిస్తున్నారు. ఈ బొగ్గుపై కోల్ సెస్, ఆదాయపు పన్ను సహా అన్ని నిబంధనలను పాటించినట్లు రికార్డులు చెబుతున్నాయి. అయితే దాదాపు రూ.1,600 కోట్ల విలువైన ఈ బొగ్గు ఇప్పుడు ఎక్కడ ఉంది? అది ఎటుపోయింది?” అని ప్రశ్నించారు.
హరీష్ రావు చేసిన ఈ వ్యాఖ్యలు ఇప్పుడు రాజకీయ వర్గాల్లో చర్చనీయాంశంగా మారాయి.
విచారణ కోరిన కేంద్ర మంత్రి
కిషన్ రెడ్డి తన లేఖలో నేరుగా “బొగ్గు మాయమైంది” అని చెప్పకుండా, మీడియాలో వచ్చిన ఆరోపణలను ప్రస్తావిస్తూ వాటిపై విచారణ జరపాలని కోరడం గమనార్హం.
సింగరేణి సంస్థలో సరైన అంతర్గత నియంత్రణ వ్యవస్థలు ఉన్నాయా? నిల్వల లెక్కల్లో ఏవైనా లోపాలు ఉన్నాయా? అనే అంశాలను కూడా పరిశీలించాలని ఆయన సూచించారు.
సింగరేణి స్పందన కోసం ఎదురుచూపు
ఇప్పటివరకు ఈ ఆరోపణలపై సింగరేణి కాలరీస్ సంస్థ లేదా తెలంగాణ ప్రభుత్వం నుంచి అధికారిక వివరణ వెలువడలేదు.
40 లక్షల టన్నుల బొగ్గు నిల్వలపై వచ్చిన ఆరోపణల్లో ఎంతవరకు వాస్తవం ఉంది? మీడియా కథనాల్లో పేర్కొన్న అంశాలు నిజమేనా? లేదా లెక్కల నిర్వహణలో ఏవైనా సాంకేతిక కారణాలున్నాయా? అనే విషయాలు విచారణ తర్వాతే స్పష్టత వచ్చే అవకాశం ఉంది.
ప్రస్తుతం ఈ అంశం తెలంగాణ రాజకీయాల్లో ప్రధాన చర్చగా మారగా, కేంద్ర మంత్రి లేఖకు రాష్ట్ర ప్రభుత్వం ఎలా స్పందిస్తుందన్నది ఆసక్తికరంగా మారింది.
