Monsoon | దేశవ్యాప్తంగా ఎండలు దంచికొడుతున్నాయి. జూన్ వచ్చినా భానుడి ప్రతాపం చూపుతూనే ఉన్నాడు. దేశవ్యాప్తంగా జనం ఎండలు, ఉక్కపోతతో తీవ్ర ఇబ్బందులుపడుతున్నారు. జనంతో పాటు రైతాంగమంతా నైరుతి రుతుపవనాల కోసం ఆసక్తిగా ఎదురుచూస్తోంది. అయితే, ఐఎండీ వినియోగిస్తున్న గ్లోబల్ ఫోర్కాస్ట్ సిస్టమ్ (జీఎఫ్ఎస్) అంచనాల ప్రకారం.. తెలుగు రాష్ట్రాల్లో రుతుపవనాల ప్రవేశం ఆలస్యమయ్యే అవకాశాలు కనిపిస్తున్నాయి. దక్షిణ భారతదేశంలో రుతుపవనాల బలపాటుకు అవసరమైన ఎగువ స్థాయి గాలుల పరిస్థితులు జూన్ 5, 6 తర్వాతే పూర్తిస్థాయిలో అనుకూలించే అవకాశం ఉందని ఐఎండీ తెలిపింది. దీంతో కేరళలో రుతుపవనాల ప్రవేశం ఆశించినంత వేగంగా కాకుండా.. నెమ్మదిగా ప్రారంభమయ్యే సూచనలు కనిపిస్తున్నాయి. ఇప్పటికే పలుమార్లు అంచనాలు మారడంతో ఈ ఏడాది రుతుపవనాల గమనం కొంత అనిశ్చితంగా మారింది. తొలుత మే 26 నాటికే కేరళ తీరాన్ని తాకుతాయని భావించినప్పటికీ, ప్రస్తుతం జూన్ 2 నుంచి 4 మధ్య అధికారికంగా ప్రవేశించే అవకాశాలపై ఐఎండీ దృష్టి సారించింది. కేరళలో కొన్ని ప్రాంతాల్లో ముందస్తు వర్షాలు కురుస్తున్నప్పటికీ.. రుతుపవనాల రాకను అధికారికంగా ప్రకటించేందుకు అవసరమైన ప్రమాణాలు చేరుకోలేదని వాతావరణశాఖ అధికారులు పేర్కొంటున్నారు.
Read Also : భక్తులకు గుడ్న్యూస్.. తిరుమల తరహాలోనే ప్రముఖ ఆలయాల్లోనూ సేవ భాగ్యం..
రుతుపవనాల ప్రకటనకు ప్రమాణాలు..
దేశంలో రుతుపవనాలను ప్రవేశించాయని ప్రకటించేందుకు పలు ప్రమాణాలున్నాయి. నిర్దేశిత వాతావరణ కేంద్రాల్లో కనీసం 60 శాతం ప్రాంతాల్లో వరుసగా వర్షపాతం నమోదు కావాల్సి ఉంటుంది. అరేబియా సముద్రంపై పశ్చిమ దిశ గాలులు నిర్దిష్ట వేగంతో వీయాలి. అలాగే, విస్తృత స్థాయిలో మేఘాలు ఏర్పడాల్సి ఉంటుంది. ప్రస్తుతం వర్షపాతం, మేఘావరణ పరిస్థితులు అనుకూలంగానే ఉన్నప్పటికీ, బంగాళాఖాతంలో ఏర్పడిన తుఫాను ప్రభావంతో పశ్చిమ గాలుల బలం తగ్గిందని వాతావరణ నిపుణులు పేర్కొంటున్నారు. అయితే రానున్న రోజుల్లో ఈ గాలులు మళ్లీ పుంజుకునే అవకాశముందని వారు అంచనా వేస్తున్నారు. మరోవైపు పసిఫిక్ మహాసముద్రంలో ఎల్నినో పరిస్థితులు రూపుదిద్దుకోవడం వర్షపాతం అవకాశాలపై ప్రభావం చూపుతోంది. ఈ నేపథ్యంలో దేశవ్యాప్తంగా సాధారణ సగటు కంటే తక్కువ వర్షాలు నమోదయ్యే అవకాశముందని ఐఎండీ హెచ్చరించింది. మొదట దీర్ఘకాల సగటు (ఎల్పీఏ)లో 92 శాతం వర్షపాతం నమోదవుతుందని అంచనా వేసిన వాతావరణ శాఖ, తాజాగా ఆ అంచనాను 90 శాతానికి సవరించింది. ఈ అంచనాలు ఆందోళనలు రేకెత్తిస్తున్నాయి.
Read Also : ఆక్వా రైతులకు గుడ్న్యూస్ చెప్పిన కూటమి ప్రభుత్వం.. విద్యుత్ భారం తగ్గించేందుకు కీలక నిర్ణయం..!
ఖరీఫ్ సీజన్పై..
ఇదిలా ఉండగా ఉత్తర, మధ్య భారత రాష్ట్రాల్లో భానుడి ప్రతాపం కొనసాగుతోంది. పలు ప్రాంతాల్లో ఉష్ణోగ్రతలు 45 డిగ్రీల సెల్సియస్కు పైగా నమోదవుతుండటంతో ప్రజలు తీవ్ర ఉక్కపోతను ఎదుర్కొంటున్నారు. ఖరీఫ్ సాగుకు సన్నద్ధమవుతున్న రైతులకు రుతుపవనాల రాక అత్యంత కీలకంగా మారింది. వాతావరణ పరిస్థితులు ఎప్పటికప్పుడు మారే అవకాశం ఉన్నప్పటికీ.. ప్రస్తుత అంచనాల ప్రకారం రుతుపవనాలు తొలిదశలో మందగించినా, అనంతరం క్రమంగా బలపడే అవకాశాలు కనిపిస్తున్నాయి. దీంతో రైతాంగం ఆశలు, ఆందోళనలు రెండింటినీ సమానంగా మోస్తూ వర్షాల కోసం ఎదురుచూస్తోంది. దేశ ఆర్థిక వ్యవస్థకు వెన్నెముకగా నిలిచే వ్యవసాయ రంగం ప్రధానంగా నైరుతి రుతుపవనాలపైనే ఆధారపడి ఉంటుంది. ముఖ్యంగా ఖరీఫ్ సీజన్ సాగుకు వర్షాలు కీలకం కావడంతో రైతులు రుతుపవనాల రాక కోసం ఎదురుచూస్తున్నారు. అయితే, ఈ ఏడాది రుతుపవనాల ప్రవేశం కొంత ఆలస్యమయ్యే సూచనలు కనిపించడంతో రైతాంగంలో ఆందోళన వ్యక్తమవుతోంది. ప్రస్తుతం దేశవ్యాప్తంగా పలు రాష్ట్రాల్లో తీవ్ర ఎండలు కొనసాగుతున్నాయి. ఈ పరిస్థితుల్లో ఖరీఫ్ పంటల సాగుకు సమయానికి వర్షాలు పడకపోతే విత్తనాల నాట్లు, సాగు పనులు ప్రభావితమయ్యే అవకాశం ఉంది. రుతుపవనాలు ప్రారంభ దశలో మందగించినా, తర్వాత క్రమంగా బలపడే అవకాశాలున్నాయని వాతావరణ నిపుణులు చెబుతున్నారు. దీంతో రైతులు ఆశతోనే ఆకాశం వైపు చూస్తున్నారు.
Read Also : ఏపీలో కొత్తగా 38 ఎంఎస్ఎంఈ పార్కులు.. గ్రోత్ సమ్మిట్లో చంద్రబాబు ప్రకటన..
