రేషన్ బియ్యంలో భారీ మార్పు.. ఇక నుంచి స్టీమ్ రైస్, కందిపప్పు కూడా!

రాష్ట్రంలో చౌకధరల దుకాణాల ద్వారా అందిస్తున్న పీడీఎస్ బియ్యాన్ని ప్రజలు పూర్తిస్థాయిలో వినియోగించడం లేదని ప్రభుత్వం గుర్తించింది. ప్రస్తుతం ప్రతి కిలో బియ్యంపై ప్రభుత్వం సుమారు రూ.56 సబ్సిడీ ఇస్తున్నప్పటికీ, ప్రజలు ఎక్కువగా స్టీమ్ రైస్‌ను ఇష్టపడుతున్నట్లు నిపుణులు, ఆర్థికవేత్తలు, ప్రజల నుంచి సేకరించిన అభిప్రాయాల్లో తేలిందని మంత్రి నాదెండ్ల మనోహర్ తెలిపారు.

ఈ నేపథ్యంలో ప్రజా పంపిణీ వ్యవస్థను మరింత సమర్థవంతంగా మార్చేందుకు చౌకధరల దుకాణాల ద్వారా స్టీమ్ రైస్ అందించాలని నిర్ణయించినట్లు వెల్లడించారు.

కాకినాడ జిల్లాతో పైలట్ ప్రాజెక్టు ప్రారంభం

దేశంలోనే తొలిసారిగా కాకినాడ జిల్లాలో రేషన్ దుకాణాల ద్వారా స్టీమ్ రైస్ పంపిణీ చేపట్టనున్నారు. పైలట్ ప్రాజెక్టు కింద ప్రతి నెల సుమారు 9 వేల మెట్రిక్ టన్నుల స్టీమ్ రైస్‌ను రేషన్ కార్డుదారులు, పాఠశాలలు, హాస్టళ్లకు పంపిణీ చేయనున్నట్లు ప్రభుత్వం తెలిపింది.

ఈ ప్రయోగం విజయవంతమైతే రాష్ట్రవ్యాప్తంగా అన్ని జిల్లాల్లోనూ స్టీమ్ రైస్ పంపిణీ విస్తరించే అవకాశముందని మంత్రి వెల్లడించారు.

ఆగస్టు 1 నుంచి తక్కువ ధరకే బియ్యం

బహిరంగ మార్కెట్లో పెరుగుతున్న బియ్యం ధరలను దృష్టిలో ఉంచుకుని రాష్ట్ర ప్రభుత్వం మరో కీలక నిర్ణయం తీసుకుంది.

ఆగస్టు 1 నుంచి

• మార్కెట్లో రూ.62–64 పలుకుతున్న BPT స్టీమ్ రైస్‌ను రూ.52కే
• మార్కెట్లో రూ.58 ఉన్న గ్రేడ్-1 రా రైస్‌ను రూ.50కే

రాష్ట్రంలోని 130 రైతు బజార్లు, 500 ప్రత్యేక విక్రయ కేంద్రాల ద్వారా అందుబాటులోకి తీసుకురానున్నారు.

అలాగే ఎఫ్‌సీఐ గోదాముల్లో నిల్వ ఉన్న స్వర్ణ రకం బియ్యాన్ని కూడా రూ.40కే విక్రయించే అంశంపై కేంద్ర ప్రభుత్వం సానుకూలంగా స్పందించినట్లు మంత్రి తెలిపారు.

రేషన్ షాపుల్లో కందిపప్పు కూడా

త్వరలో రాష్ట్రంలోని 30 వేల చౌకధరల దుకాణాల ద్వారా బియ్యం, పంచదారతో పాటు ప్రతి రేషన్ కార్డుదారుకు 500 గ్రాముల నాణ్యమైన కందిపప్పు అందించేలా చర్యలు తీసుకుంటామని నాదెండ్ల మనోహర్ వెల్లడించారు.

ఈ మేరకు రాష్ట్ర అవసరాలకు అనుగుణంగా 73 వేల మెట్రిక్ టన్నుల కందిపప్పు కేటాయించాలని కేంద్రాన్ని కోరినట్లు తెలిపారు.

1000 ‘మీ మార్ట్’లు రానున్నాయి

సామాన్యులకు తక్కువ ధరల్లో నిత్యావసర వస్తువులు అందించేందుకు ప్రభుత్వం 1000 ‘మీ మార్ట్’ స్టోర్లను ప్రారంభించనుంది.

ఈ మార్ట్‌లలో 70 రకాల నిత్యావసర వస్తువులు మార్కెట్ కంటే తక్కువ ధరలకు అందుబాటులో ఉంటాయని మంత్రి చెప్పారు. ఈ ప్రాజెక్టును రాష్ట్ర పౌర సరఫరాల శాఖ, NCCF భాగస్వామ్యంతో అమలు చేయనుంది.

డిజిటల్ వాలెట్‌కు శ్రీకారం

రేషన్ సబ్సిడీని నేరుగా ప్రజలకు అందించే దిశగా ప్రభుత్వం CBDC ఆధారిత డిజిటల్ వాలెట్ విధానాన్ని కూడా పరిశీలిస్తోంది.

మొదటి దశలో ఉమ్మడి కృష్ణా మరియు ఉమ్మడి విశాఖపట్నం జిల్లాల్లో పైలట్ ప్రాజెక్టుగా అమలు చేయనున్నారు. ఈ విధానం ద్వారా ప్రభుత్వం ఇచ్చే రాయితీ నేరుగా లబ్ధిదారుల డిజిటల్ వాలెట్‌లో జమ అవుతుంది. ఆ మొత్తంతో తమకు అవసరమైన వస్తువులను కొనుగోలు చేసుకునే అవకాశం ఉంటుంది.

RFID టెక్నాలజీతో బియ్యం ట్రాకింగ్

రేషన్ బియ్యం పారదర్శకంగా లబ్ధిదారులకు చేరేందుకు ప్రభుత్వం RFID ట్యాగ్ వ్యవస్థను కూడా తీసుకురానుంది.

రైస్ మిల్లులో ప్యాకింగ్ నుంచి లబ్ధిదారుడి చేతికి చేరే వరకు ప్రతి బస్తాను ట్రాక్ చేసే విధంగా ఈ సాంకేతికతను అమలు చేయనున్నారు. మొదట కాకినాడ జిల్లాలోనే దీనిని పైలట్ ప్రాజెక్టుగా అమలు చేస్తారు.

రైతులకు మరో శుభవార్త

బాయిల్డ్ రైస్ ధాన్యం సేకరణ కోటాను కేంద్ర ప్రభుత్వం 2 లక్షల మెట్రిక్ టన్నుల నుంచి అదనంగా మరో 20 వేల మెట్రిక్ టన్నులు పెంచేందుకు అంగీకరించినట్లు మంత్రి తెలిపారు. రైతులు పండించిన ప్రతి గింజను కొనుగోలు చేస్తామని ప్రభుత్వం ఇచ్చిన హామీని నిలబెట్టుకుంటామని చెప్పారు.

అలాగే కేంద్రం నుంచి రావాల్సిన రూ.281 కోట్ల బకాయిల విడుదలకు కూడా గ్రీన్ సిగ్నల్ లభించినట్లు వెల్లడించారు.