సొంత ప్రాణం లెక్కచేయకుండా బావిలోకి దూకి.. మహిళను కాపాడిన హెడ్ కానిస్టేబుల్!

తిరుపతి జిల్లాలో ఓ పోలీసు సిబ్బంది ప్రదర్శించిన అరుదైన సాహసం అందరి మన్ననలు అందుకుంటోంది. జూలై 21 ఉదయం సుమారు 7 గంటల సమయంలో జిల్లా పోలీస్ కమాండ్ అండ్ కంట్రోల్ సెంటర్‌కు అత్యవసర సమాచారం అందింది. శ్రీనివాస మంగాపురం సమీపంలో ఓ మహిళ బావిలో దూకి ఆత్మహత్యాయత్నానికి పాల్పడినట్లు కాల్ వచ్చింది.

సమాచారం అందిన క్షణాల్లోనే కమాండ్ కంట్రోల్ సెంటర్ సిబ్బంది అప్రమత్తమయ్యారు. వెంటనే చంద్రగిరి పోలీస్ స్టేషన్‌కు సమాచారం చేరవేసి, ఘటనా స్థలానికి పోలీసు బృందాన్ని పంపించారు.

క్షణం ఆలస్యం చేయకుండా బావిలోకి..

చంద్రగిరి ఇన్‌చార్జి ఇన్‌స్పెక్టర్ టీవీ. సత్యనారాయణ ఆదేశాల మేరకు, ఎస్‌ఐ ఈ. అరుణాచలం పర్యవేక్షణలో హెడ్ కానిస్టేబుల్ కె. చలపతి ఘటనా స్థలానికి చేరుకున్నారు.

పరిస్థితి అత్యంత ప్రమాదకరంగా ఉందని గమనించిన ఆయన ఏమాత్రం ఆలస్యం చేయలేదు. తన ప్రాణాలను సైతం లెక్కచేయకుండా బావిలోకి దూకి, మహిళను సాహసోపేతంగా రక్షించి సురక్షితంగా బయటకు తీసుకొచ్చారు.

ప్రాథమిక చికిత్స.. ఆసుపత్రికి తరలింపు

రక్షించిన మహిళకు అక్కడికక్కడే ప్రాథమిక చికిత్స అందించిన పోలీసులు, మెరుగైన వైద్యం కోసం సమీప ఆసుపత్రికి తరలించారు. కమాండ్ కంట్రోల్ సెంటర్ సమయానుకూల సమన్వయం, చంద్రగిరి పోలీసుల వేగవంతమైన స్పందన, చలపతి ధైర్యసాహసాల వల్ల ఒక నిండు ప్రాణం నిలిచింది.

విడాకుల అనంతర మనోవేదన

ప్రాథమిక విచారణలో మహిళకు గతంలో వివాహమై, అనంతరం విడాకులు జరిగినట్లు తెలిసింది. వ్యక్తిగత, కుటుంబ సమస్యల కారణంగా తీవ్ర మనోవేదనకు గురై ఈ నిర్ణయం తీసుకున్నట్లు అధికారులు గుర్తించారు. ఘటనపై పోలీసులు తదుపరి విచారణ కొనసాగిస్తున్నారు.

పోలీసు సేవా తత్వానికి నిదర్శనం

విధి నిర్వహణలో భాగంగా ప్రజల ప్రాణాలను రక్షించేందుకు తన ప్రాణాలను పణంగా పెట్టిన హెడ్ కానిస్టేబుల్ కె. చలపతి ధైర్యసాహసం పోలీసు శాఖ సేవాభావానికి ప్రతీకగా నిలిచింది. ఆపదలో ఉన్నవారిని కాపాడటమే తమ ప్రథమ కర్తవ్యమని చంద్రగిరి పోలీసులు మరోసారి నిరూపించారు.

ఎస్పీ కీలక సందేశం

ఈ సందర్భంగా జిల్లా ఎస్పీ ఎల్. సుబ్బరాయుడు మాట్లాడుతూ — ప్రజల ప్రాణాలను కాపాడటం, ఆపదలో ఉన్నవారికి వెంటనే అండగా నిలవడం పోలీసు శాఖ అత్యున్నత బాధ్యత అని పేర్కొన్నారు. అవసరమైతే సొంత ప్రాణాలను సైతం లెక్కచేయకుండా సేవ చేయడం ప్రతి పోలీసు అధికారికి, సిబ్బందికి విధి మాత్రమే కాదు, బాధ్యత కూడా అన్నారు. చలపతి చూపిన ధైర్యసాహసం పోలీసు శాఖ సేవాభావానికి ప్రతీక అని కొనియాడారు.

జీవితంలో ఎలాంటి సమస్య వచ్చినా ఆత్మహత్య ఎన్నటికీ పరిష్కారం కాదని ఎస్పీ ప్రజలకు విజ్ఞప్తి చేశారు. ప్రతి సమస్యకూ ఒక పరిష్కారం ఉంటుందని, క్షణికావేశంలో తీసుకునే నిర్ణయం కుటుంబ సభ్యులకు జీవితాంతం తీరని విషాదాన్ని మిగులుస్తుందని హెచ్చరించారు. “ఒక నిర్ణయం జీవితాన్ని ముగించవచ్చు.. కానీ ఒక సంభాషణ జీవితాన్ని కాపాడగలదు” అని ఆయన పేర్కొన్నారు.

మానసిక ఒత్తిడి, కుటుంబ సమస్యలు ఎదురైనప్పుడు ఒంటరిగా కుమిలిపోకుండా కుటుంబ సభ్యులు, స్నేహితులు లేదా సంబంధిత అధికారులను సంప్రదించి సహాయం పొందాలని సూచించారు. అత్యవసర పరిస్థితుల్లో ఎలాంటి సంకోచం లేకుండా వెంటనే డయల్–112కు సమాచారం అందించాలని, తిరుపతి జిల్లా పోలీసు శాఖ 24 గంటలూ ప్రజల భద్రత కోసం అప్రమత్తంగా ఉందని తెలిపారు.

మనోవేదనలో ఉన్నారా? సాయం అందుబాటులో ఉంది

జీవితంలో ఎదురయ్యే సమస్యలు ఎంత తీవ్రంగా అనిపించినా అవి తాత్కాలికమే. తీవ్ర ఒత్తిడి, నిరాశలో ఉన్నవారు ఒంటరిగా బాధపడకుండా మనసు విప్పి మాట్లాడటమే మొదటి అడుగు. అవసరమైతే ప్రభుత్వ టెలి-మానస్ మానసిక ఆరోగ్య హెల్ప్‌లైన్ 14416కు కాల్ చేసి ఉచిత కౌన్సెలింగ్ పొందవచ్చు. అత్యవసర పరిస్థితుల్లో డయల్ 112 అందుబాటులో ఉంది.

Also Read: హైదరాబాద్‌లో రూ.6 లక్షలకే సొంత ఫ్లాట్! ఇందిరమ్మ ఇళ్ల పూర్తి వివరాలు ఇవే