ఆంధ్రప్రదేశ్లో మహిళలకు ఆర్థికంగా అండగా నిలిచే ఆడబిడ్డ నిధి పథకం పై కీలక కదలికలు మొదలయ్యాయి. రాష్ట్రంలో ప్రస్తుతం కొనసాగుతున్న పింఛన్ల ప్రక్రియ పూర్తయిన తర్వాత ఈ పథకానికి సంబంధించిన దరఖాస్తుల ప్రక్రియను ప్రారంభించే దిశగా ప్రభుత్వం చర్యలు చేపట్టనున్నట్లు తెలుస్తోంది. అర్హత పొందిన మహిళలకు ఏడాదికి రూ.18 వేల ఆర్థిక సాయం అందించే ఈ పథకంపై మహిళల్లో ఆసక్తి నెలకొంది.
నెలకు రూ.1,500 చొప్పున అందించాల్సిన మొత్తాన్ని ఒకేసారి రూ.18 వేలుగా చెల్లించే విధానాన్ని అమలు చేసే అంశం పరిశీలనలో ఉన్నట్లు తెలుస్తోంది. అయితే దరఖాస్తుల ప్రారంభ తేదీ, తుది అర్హతలు, చెల్లింపు విధానం వంటి అంశాలపై ప్రభుత్వం అధికారిక మార్గదర్శకాలు విడుదల చేయాల్సి ఉంది.
18 నుంచి 59 ఏళ్లలోపు మహిళలకు అవకాశం?
ప్రస్తుతం అందుతున్న వివరాల ప్రకారం 18 నుంచి 59 ఏళ్లలోపు మహిళలు ఈ పథకానికి అర్హులయ్యే అవకాశం ఉంది. 60 ఏళ్ల నుంచి పింఛన్కు అర్హత ఉండే నేపథ్యంలో 59 ఏళ్లలోపు మహిళలను ఈ పథకం పరిధిలోకి తీసుకురావచ్చని తెలుస్తోంది. అయితే కొన్ని ప్రత్యేక కేటగిరీలకు వయోపరిమితిలో మార్పులు ఉండే అవకాశం ఉంది.
రేషన్ కార్డు ఆధారంగా లబ్ధిదారుల ఎంపిక చేపట్టే అవకాశం ఉండటంతో అర్హత కలిగిన మహిళలు తమ కుటుంబ వివరాలను ముందుగానే పరిశీలించుకోవడం మంచిది.
అవసరమైన పత్రాలు ఇవే..
దరఖాస్తుల ప్రక్రియ ప్రారంభమయ్యేలోపు కొన్ని కీలక పత్రాలను సిద్ధంగా ఉంచుకోవడం ఉపయోగకరంగా ఉంటుంది.
- రేషన్ కార్డు
- ఆధార్ కార్డు
- వ్యక్తిగత బ్యాంక్ ఖాతా
- ఆధార్కు అనుసంధానమైన మొబైల్ నంబర్
- ఆధార్ అప్డేట్ హిస్టరీ
- కుల ధ్రువీకరణ పత్రం
- ఆదాయ ధ్రువీకరణ పత్రం
కుల, ఆదాయ ధ్రువీకరణ పత్రాలు అవసరమయ్యే అవకాశం ఉన్నందున వాటిని ముందుగానే సిద్ధం చేసుకోవడం మంచిదని సూచిస్తున్నారు.
ఈ మూడు వివరాలు తప్పనిసరిగా చెక్ చేసుకోవాలి
పథకం నగదు ప్రయోజనానికి సంబంధించినది కావడంతో బ్యాంకు, ఆధార్ వివరాల్లో ఎలాంటి తప్పులు లేకుండా చూసుకోవడం కీలకం. ముఖ్యంగా హౌస్హోల్డ్ మ్యాపింగ్, ఆధార్కు మొబైల్ నంబర్ అనుసంధానం, బ్యాంక్ ఖాతాకు NPCI లింక్ వంటి అంశాలను పరిశీలించుకోవాల్సి ఉంటుంది.
హౌస్హోల్డ్ మ్యాపింగ్, కుటుంబ వివరాలను గ్రామ/వార్డు సచివాలయంలో చెక్ చేసుకోవచ్చు. NPCI లింక్ ఉందా లేదా అనే విషయాన్ని సంబంధిత బ్యాంకులో తెలుసుకోవచ్చు.
అలాగే ఆధార్లో బయోమెట్రిక్ వివరాలు, మొబైల్ నంబర్ అప్డేట్గా ఉన్నాయో లేదో కూడా ముందుగానే పరిశీలించుకోవడం మంచిది.
ఆదాయ పరిమితి కూడా కీలకం
పథకం అర్హతల్లో కుటుంబ ఆదాయానికి సంబంధించిన పరిమితులు కూడా ఉండనున్నట్లు తెలుస్తోంది. గ్రామీణ ప్రాంతాల్లో కుటుంబ వార్షిక ఆదాయం రూ.1.50 లక్షలు, పట్టణ ప్రాంతాల్లో రూ.2 లక్షలు మించకూడదనే నిబంధనను ప్రస్తావిస్తున్నారు.
అయితే తుది అర్హతలను ప్రభుత్వం విడుదల చేసే అధికారిక మార్గదర్శకాలే నిర్ధారించనున్నాయి.
ఎవరికి పథకం వర్తించకపోవచ్చు?
లబ్ధిదారుల ఎంపికలో కుటుంబ ఆర్థిక పరిస్థితిని అంచనా వేసేందుకు పలు అంశాలను పరిశీలించే అవకాశం ఉంది. ఇందులో భాగంగా వ్యవసాయ భూమి, వాహనాలు, విద్యుత్ వినియోగం, ఆదాయపు పన్ను చెల్లింపు, ఆస్తులు, ప్రభుత్వ ఉద్యోగం వంటి వివరాలను పరిగణనలోకి తీసుకునే అవకాశం ఉంది.
ప్రస్తుతం అందుబాటులో ఉన్న వివరాల ప్రకారం..
- 10 ఎకరాలకు మించి మెట్ట భూమి ఉండటం
- 3 ఎకరాలకు మించి మాగాణి భూమి ఉండటం
- కుటుంబం పేరుతో నాలుగు చక్రాల వాహనం ఉండటం
- విద్యుత్ వినియోగం 300 యూనిట్లకు మించడం
- కుటుంబంలో ఆదాయపు పన్ను చెల్లించే వ్యక్తి ఉండటం
- మున్సిపల్ ప్రాంతంలో 1,000 చదరపు అడుగులకు మించి ఆస్తి ఉండటం
- ప్రభుత్వ ఉద్యోగం ఉండటం
వంటి అంశాలు అనర్హతకు కారణమయ్యే అవకాశం ఉంది. అంగన్వాడీ, ఆశా కార్యకర్తలకు కూడా పథకం వర్తించదనే నిబంధనను ప్రస్తావిస్తున్నారు.
ఒక కుటుంబంలో ఎంతమందికి రూ.18 వేలు?
ఈ అంశంపై కూడా స్పష్టత రావాల్సి ఉంది. గతంలో ఒక కుటుంబంలో అర్హత కలిగిన మహిళలందరికీ ప్రయోజనం అందే అవకాశం ఉందనే చర్చ ఉండగా.. ప్రస్తుతం ఆర్థిక వనరులను బట్టి కుటుంబానికి ఒక మహిళకే ప్రయోజనం అందించే అవకాశం ఉందనే వాదన వినిపిస్తోంది.
అయితే దీనిపై తుది నిర్ణయం ప్రభుత్వం అధికారికంగా ప్రకటించాల్సి ఉంటుంది.
దరఖాస్తుల ప్రక్రియ ప్రారంభమైన తర్వాత పత్రాల కోసం పరుగులు పెట్టకుండా.. ముందుగానే ఆధార్, రేషన్ కార్డు, బ్యాంక్ ఖాతా, మొబైల్ నంబర్, NPCI లింక్, కుల మరియు ఆదాయ ధ్రువీకరణ పత్రాలను సిద్ధంగా ఉంచుకోవడం మంచిది.
ఆడబిడ్డ నిధి పథకం ద్వారా ఏడాదికి రూ.18 వేల ఆర్థిక సాయం అందించే అంశంపై మహిళల్లో ఇప్పటికే భారీ అంచనాలు ఉన్నాయి. అయితే దరఖాస్తు తేదీ, అర్హతలు, లబ్ధిదారుల ఎంపిక, కుటుంబానికి ఎంతమందికి ప్రయోజనం వంటి అంశాలపై ప్రభుత్వం అధికారిక ప్రకటన చేసిన తర్వాతే పూర్తి స్పష్టత రానుంది.
