వినాయక చవితి ఉత్సవాల నేపథ్యంలో హైదరాబాద్లో పోలీస్ శాఖ ఆంక్షలను మరింత కఠినతరం చేసింది. హైదరాబాద్, సైబరాబాద్, రాచకొండ కమిషనరేట్ పరిధిలో గణేష్ మండపాల ఏర్పాటుకు సంబంధించి ఆన్లైన్ ఇంటిమేషన్ తప్పనిసరి చేసింది. ముందస్తు అనుమతులు లేకుండా మండపాలు ఏర్పాటు చేస్తే కఠిన చర్యలు తీసుకుంటామని పోలీసులు హెచ్చరించారు.
మండపం ఏర్పాటు చేసే స్థలం, విగ్రహం ఎత్తు, బరువు, నిమజ్జనం తేదీ, సమయం, విగ్రహాన్ని తరలించే వాహనం, రూట్ తదితర వివరాలను ఆన్లైన్లో నమోదు చేయాల్సి ఉంటుంది. పోలీసులు వివరాలను పరిశీలించి నమోదు చేసిన అనంతరం మండపానికి QR కోడ్తో కూడిన అనుమతి పత్రాన్ని జారీ చేస్తారు.
ఈ QR కోడ్ను ప్రతి గణేష్ మండపం వద్ద స్పష్టంగా కనిపించేలా ప్రదర్శించాలి. దీంతో పాటు మండపాలన్నింటికీ జియో ట్యాగింగ్ చేయడం తప్పనిసరి చేశారు.
జియో ట్యాగింగ్తో పోలీసులకు ఏం ప్రయోజనం?
హైదరాబాద్లో ప్రతి వినాయక చవితికి భారీ సంఖ్యలో గణేష్ విగ్రహాలు ఏర్పాటు అవుతుంటాయి. ప్రధాన ప్రాంతాలతో పాటు చిన్న చిన్న కాలనీలు, గల్లీల్లోనూ పెద్ద సంఖ్యలో మండపాలు వెలుస్తాయి. నిమజ్జనం సమయంలో వేలాది విగ్రహాలు ఒకేసారి రోడ్లపైకి రావడంతో ట్రాఫిక్, భద్రత, రూట్ నిర్వహణ పోలీసులకు సవాల్గా మారుతుంది.
ఈ నేపథ్యంలో జియో ట్యాగింగ్ ద్వారా ఏ ప్రాంతంలో ఎన్ని మండపాలు ఉన్నాయి? వాటి నిర్వాహకులు ఎవరు? విగ్రహం ఎత్తు ఎంత? మండపం ఎక్కడ ఏర్పాటు చేశారు? నిమజ్జనం ఎప్పుడు, ఏ మార్గంలో జరగనుంది? వంటి వివరాలను ముందుగానే తెలుసుకునే అవకాశం పోలీసులకు ఉంటుంది.
మండపాలకు సంబంధించిన సమాచారాన్ని ఒకే వ్యవస్థలో అందుబాటులో ఉంచడం ద్వారా అవసరమైన ప్రాంతాల్లో ముందుగానే భద్రతా ఏర్పాట్లు చేయడానికి, ట్రాఫిక్ను నియంత్రించడానికి వీలవుతుంది.
QR కోడ్తో పూర్తి వివరాలు
మండపం వద్ద ఏర్పాటు చేసే QR కోడ్ను స్కాన్ చేస్తే సంబంధిత మండపానికి సంబంధించిన వివరాలను గుర్తించే అవకాశం ఉంటుంది. దీంతో ఏ ప్రాంతంలో ఏ విగ్రహం ఏర్పాటు చేశారో, దాని నిర్వాహకులు ఎవరో తెలుసుకోవడంతో పాటు భద్రతా నిర్వహణను మరింత క్రమబద్ధీకరించవచ్చు.
విద్యుత్ సంబంధిత అనుమతులు, ఇతర అవసరమైన అనుమతులు, నిమజ్జనానికి సంబంధించిన వివరాలను కూడా ముందుగానే నమోదు చేయడం ద్వారా ఉత్సవాల నిర్వహణపై స్పష్టమైన ప్రణాళిక రూపొందించుకునే అవకాశం ఉంటుంది.
భారీ మండపాల వద్ద ప్రత్యేక భద్రత
భారీ గణేష్ మండపాల వద్ద నిర్వాహకులు తప్పనిసరిగా CCTV కెమెరాలు, బారికేడ్లు ఏర్పాటు చేయాలని పోలీసులు సూచించారు. రాత్రి వేళల్లో వాలంటీర్లు అందుబాటులో ఉండేలా చూసుకోవాలని స్పష్టం చేశారు.
వినాయక చవితి సమయంలో భారీ సంఖ్యలో భక్తులు వచ్చే ప్రాంతాల్లో ప్రత్యేక భద్రతా చర్యలు చేపట్టనున్నారు. ముఖ్యంగా ఖైరతాబాద్, బాలాపూర్ వంటి ప్రధాన గణేష్ కేంద్రాల వద్ద భక్తుల రద్దీ ఎక్కువగా ఉండే అవకాశం ఉన్నందున భద్రత, ట్రాఫిక్ నిర్వహణపై ప్రత్యేక దృష్టి పెట్టనున్నారు.
మూడు కమిషనరేట్ల పోలీసులు పరస్పర సమన్వయంతో ట్రాఫిక్, విగ్రహాల తరలింపు, నిమజ్జన మార్గాలు, భద్రతా ఏర్పాట్లను పర్యవేక్షించాల్సి ఉంటుంది.
రాత్రి 10 తర్వాత లౌడ్స్పీకర్లకు నో
ఉత్సవాల్లో శబ్ద కాలుష్యాన్ని నియంత్రించేందుకు రాత్రి 10 గంటల తర్వాత మైకులు, లౌడ్స్పీకర్లు వినియోగించకూడదని పోలీసులు స్పష్టం చేశారు. నిబంధనలను ఉల్లంఘిస్తే DJలు, సౌండ్ పరికరాలతో పాటు వాటిని తరలించే వాహనాలను కూడా సీజ్ చేస్తామని హెచ్చరించారు.
బాలాపూర్ నుంచి ట్యాంక్బండ్ వరకు నిమజ్జన మార్గంలో నిరంతర పోలీస్ నిఘా కొనసాగనుంది. సోషల్ మీడియాలో పుకార్లు వ్యాప్తి చేయడం, రెచ్చగొట్టే పోస్టులు పెట్టడం వంటి చర్యలకు పాల్పడితే చట్టపరమైన చర్యలు తప్పవని అధికారులు హెచ్చరించారు.
విగ్రహాల తరలింపులో జాగ్రత్తలు తప్పనిసరి
గణేష్ విగ్రహాలను తరలించే సమయంలో విద్యుత్ వైర్లు ప్రమాదకరంగా మారే అవకాశం ఉంది. వైర్లను తొలగించే క్రమంలో ప్రమాదాలు చోటుచేసుకునే అవకాశం ఉన్నందున నిర్వాహకులు అత్యంత జాగ్రత్తగా వ్యవహరించాలి. విద్యుత్ వైర్లకు సంబంధించిన పనులపై అవగాహన లేని వ్యక్తులు స్వయంగా వాటిని తాకకుండా నిపుణుల సహాయం తీసుకోవడం మంచిది.
అలాగే భారీ శబ్దాలతో DJలు ఏర్పాటు చేసి ఎక్కువసేపు నృత్యాలు చేయడం, విగ్రహాల తరలింపు సమయంలో నిరంతరంగా శ్రమించడం వల్ల కూడా అనుకోని ప్రమాదాలు జరిగే అవకాశం ఉంది. నిర్వాహకులు, వాలంటీర్లు మధ్యలో తగినంత విశ్రాంతి తీసుకోవాలని సూచిస్తున్నారు.
వినాయక చవితి ఉత్సవాలు ఆనందంగా, ప్రశాంతంగా సాగాలంటే నిర్వాహకులు పోలీసుల సూచనలు, భద్రతా నిబంధనలు తప్పనిసరిగా పాటించాల్సిన అవసరం ఉంది.
