కొండాపూర్ జిల్లా ప్రభుత్వ ఆసుపత్రిలో చికిత్స విషయంలో ఎలాంటి ఫిర్యాదులు లేవని.. అయితే ఆసుపత్రి నిర్వహణ, రోగుల భద్రత విషయంలో మాత్రం పలు తీవ్రమైన సమస్యలు కనిపించాయని ఓ సామాజిక కార్యకర్త ఆసుపత్రి సందర్శన అనంతరం వెల్లడించారు.
ఆసుపత్రిలో వైద్యులు రోగులను బాగానే చూసుకుంటున్నారని, చికిత్స విషయంలో ఎలాంటి కంప్లైంట్ లేదని స్పష్టం చేశారు. అయితే ప్రాథమిక సౌకర్యాలు, పరిశుభ్రత, నిర్వహణ, పేషెంట్ సేఫ్టీ విషయంలో కొన్ని సమస్యలు ఉన్నాయని పేర్కొన్నారు.
ఆక్సిజన్పై ప్రశ్నలు
ఒక రోగి ఆక్సిజన్ అడిగినా అందించలేదనే ఫిర్యాదు వచ్చిందని తెలిపారు. ఆసుపత్రిలో ఆక్సిజన్ ప్లాంట్లు ఉన్నాయని చెబుతున్నారని.. వాటిని ఎందుకు ఉపయోగించడం లేదని ప్రశ్నించారు. అత్యవసర పరిస్థితుల్లో ఆక్సిజన్ సరఫరా ఎలా జరుగుతుందో అధికారులు స్పష్టత ఇవ్వాలని కోరారు.
ఫైర్ సేఫ్టీపై ఆందోళన
అత్యవసర సమయంలో ఉపయోగించే ఫైర్ సిలిండర్ల పరిస్థితిపైనా ప్రశ్నలు లేవనెత్తారు. కొన్ని సిలిండర్లు ఖాళీగా, మరికొన్ని సగం నిండిన స్థితిలో కనిపించాయని తెలిపారు. ఇంకొన్ని సిలిండర్ల ఎక్స్పైరీ తేదీ కూడా దాటిపోయినట్లు కనిపించిందని చెప్పారు.
అత్యవసర పరిస్థితి తలెత్తితే వీటిని ఎలా ఉపయోగిస్తారని ప్రశ్నించారు. ఆసుపత్రిలో ఫైర్ సేఫ్టీ వ్యవస్థను అధికారులు వెంటనే పరిశీలించాలని కోరారు.
తాగునీరు, పరిశుభ్రత పరిస్థితి ఎలా?
ఆసుపత్రిలో తాగునీటి సమస్య ఉందని తెలిపారు. వాటర్ ఫ్రిజ్ వద్ద కూడా పరిశుభ్రత సరిగా నిర్వహించడం లేదని పేర్కొన్నారు.
అలాగే ఆసుపత్రి వాష్రూమ్లు కూడా సక్రమంగా నిర్వహించడం లేదని ఆరోపించారు. రోగులు, వారి సహాయకులు ఉపయోగించే వాష్రూమ్ల విషయంలో కనీస నిర్వహణ కూడా లేకపోవడంపై ప్రశ్నించారు.
హ్యాండ్ వాష్ ప్రాంతంలోనూ సమస్యలు
హ్యాండ్ వాష్ ఏరియా వద్ద నీటి లీకేజీ కనిపించిందని తెలిపారు. హ్యాండ్ వాష్ జెల్ డిస్పెన్సర్ ఉన్నప్పటికీ.. నొక్కితే జెల్ రావడం లేదని చెప్పారు. కొన్ని చోట్ల ట్యాప్స్ కూడా దెబ్బతిన్నాయని పేర్కొన్నారు.
జనరేటర్ పనిచేయకపోతే ఎలా?
ఆసుపత్రిలో జనరేటర్ పనిచేయడం లేదని, ప్రస్తుతం రిపేరింగ్లో ఉందని తెలిపారు. ఆసుపత్రి వంటి కీలక ప్రదేశాల్లో పవర్ బ్యాకప్ ఎంతో ముఖ్యమని అన్నారు.
కరెంట్ లేని సమయంలో మొబైల్ టార్చ్ లైట్ ఉపయోగించి గర్భిణులకు ఆపరేషన్లు చేస్తున్నారనే విషయం తెలిసిందని పేర్కొన్నారు. ఆసుపత్రిలో విద్యుత్ సరఫరా నిలిచిపోయినప్పుడు ప్రత్యామ్నాయ ఏర్పాట్లు లేకపోవడంపై ఆందోళన వ్యక్తం చేశారు.
లిఫ్ట్ పనిచేయడం లేదని ఆరోపణ
ఆసుపత్రిలో లిఫ్ట్ కూడా పనిచేయడం లేదని తెలిపారు. వృద్ధులు, గర్భిణులు, తీవ్ర అనారోగ్యంతో ఉన్న రోగులకు లిఫ్ట్ సౌకర్యం లేకపోతే ఎలా అని ప్రశ్నించారు.
తాళాల విషయంలోనూ నిర్లక్ష్యమా?
కొన్ని తలుపులకు సరైన లాక్స్ లేకుండా.. బైక్ హెల్మెట్కు ఉపయోగించే తరహా లాక్స్ను ఉపయోగిస్తున్నట్లు కనిపించిందని తెలిపారు. ఆసుపత్రి భద్రత విషయంలో ఇలాంటి పరిస్థితులు ఎందుకు ఉన్నాయని ప్రశ్నించారు.
చికిత్సతో పాటు సౌకర్యాలు కూడా ముఖ్యం
డాక్టర్లు రోగులను బాగా చూసుకుంటున్నారనే విషయాన్ని తప్పకుండా అభినందించాలని అన్నారు. అయితే జిల్లా ఆసుపత్రి అంటే కేవలం చికిత్స అందించడం మాత్రమే కాదని.. ప్రాథమిక సౌకర్యాలు, పరిశుభ్రత, నిర్వహణ, రోగుల భద్రత కూడా అంతే ముఖ్యమని పేర్కొన్నారు.
కొండాపూర్ ఆసుపత్రిలోని సమస్యలపై ఆసుపత్రి సూపరింటెండెంట్, డీఎంహెచ్ఓ, టీవీవీపీ, జిల్లా కలెక్టర్, ఆరోగ్య శాఖ మంత్రి బాధ్యత తీసుకుని వెంటనే స్పందించాలని కోరారు. క్షేత్రస్థాయిలో సమస్యలు పరిష్కారమయ్యే వరకు చర్యలు తీసుకోవాలని డిమాండ్ చేశారు.
ఈ అంశంపై తాను ప్రశ్నిస్తూనే ఉంటానని, సమస్యలు పరిష్కారమయ్యే వరకు ఫాలోఅప్ చేస్తానని తెలిపారు. ఎవరినీ వ్యక్తిగతంగా టార్గెట్ చేయడం తన ఉద్దేశం కాదని.. జిల్లా ఆసుపత్రికి వచ్చే ప్రతి రోగికి చికిత్సతో పాటు కనీస సౌకర్యాలు, భద్రత ఉండాలన్నదే తన ప్రశ్న అని స్పష్టం చేశారు.
